Курс валют
$
57.51
0.06
67.89
0.04
Курс валют
Меню
Поиск по сайту

“Туруусугунан сараҥнааһын”, кыыһа-уола биллибэт дьон, айар үлэҕэ уорсуу туһунан

14.05.2017 13:55 4
“Туруусугунан сараҥнааһын”, кыыһа-уола биллибэт дьон, айар үлэҕэ уорсуу туһунан

Дарья Лаврова  саха эстрадатын биир ураты суоллаах-иистээх артыыһа буолар.

Кини чаҕылхай сулуһа биир күн тырымныы умайбатаҕа, билигин баар дьон таптала, истээччи биһирэбилэ — барыта күүстээх дьаныар, улахан үлэ түмүгэ буолар.

Даша кыра эрдэҕиттэн кыһалҕаны билэн улааппыт буолан эбитэ дуу,  туохтан да толлон турбат. Маныаха, олоҕор көрсүбүт ыарахаттар  кини көрсүө-сэмэй  майгытын самнарбатахтар.

Мин иннибэр күлэн мичилийэр, элэккэй кэрэ аҥар олорор.

 

«Аартык»: Дарья, эн Тааттаттан төрүттээххин. Таатта төрүт саха улууһа дэнэр, бу дойдуга хантан нууччалар кэлэн хааллылар?

Дарья ЛАВРОВА: Мин ийэм  куорат төгүрүк тулаайах оҕото эбит. Мэҥэ Хаҥаласка оҕо дьиэтигэр олорор кыра киһини,  Таатта дьоно иитэ ылбыттар. Дьиҥэр,  уол оҕону ыла кэлбит эбиттэр. Ону  ийэм кытыгыраһа, сытыыта бэрт буолан: “Паапа, паапа барсабын!” — диэн кэнниттэн батыһа хаһыытаабытын иһин, аһынан икки оҕону илдьэ барбыттар.

Ол эрээри хомойуох иһин, бу төрөппүттэрэ олохтон эрдэ туораабыттар, онон ийэм убайын кытта оҕо дьиэтигэр төннүбүттэр. Онон иккистээн  күүстээх охсууну ылбыт оҕолор буолаллар.

Оскуоланы бүтэрэн баран, ийэм, Тааттабар төннөбүн диэн сананнан  салайтаран, Харбалаахха СПТуга үөрэнэ киирбит уонна “овощевод” идэтигэр үөрэнэн баран, устунан олохсуйа хаалар. 16-лаах кыыс Ытык-Күөл бэкэээринэтигэр  киириэҕиттэн, күн бүгүнүгэр диэри онно үлэлии-хамсыы сылдьар.

Биэс бииргэ төрөөбүттэртэн  мин саамай улаханнара буолабын: түөрт кыыс биир уол. Кыра балтыбыт устудьуон, атыттар бары сирдээҕи аналбытын толорон ыал, оҕо-уруу буолан этэҥҥэ олоробут.

Ол аата эн кыра эрдэххиттэн  балтыларгын, бырааккын тэҥинэн көрсүбүт буоллаҕыҥ?

Ийэбит соҕотох ииппит буолан, бары даҕаны оҕо эрдэхпититтэн үлэҕэ миккиллэн улааппыппыт. Бэкээринэҕэ индия оҕолорун  курдук бары суксуруһан, ийэбитигэр илии-атах, күүс-көмө буоларбыт. Ол иһин буолуо, билигин биир сиргэ сатаан  өр олорбоппун, тугу эрэ гыннахпына, үлэлээтэхпинэ-хамсаатахпына астынабын.

Оттон идэҕин таларгар ким, туох сабыдыаллаабытай?

Оскуолаҕа үөрэнэ сылдьан, ким да “онно үөрэн”, “манна туттарыс” диэн, бу санаатахха, сүбэлээбэт эбит. 7-с кылааска гимназияҕа үөрэнэ киирбитим, онно биология предметин сөбүлээн, медик буолар баҕалаах этим.

Дьокуускайга туттарса кэлэн баран, химиябын кыайбакка  сатаан киирбэтэҕим. Санаабын түһэрбэккэ, аны  физкультура орто салаатыгар бардым. Экзмен кэмигэр өлүү түбэлтэлээх  атахпын дьүккү түһэн кэбистим, уонна сол курдук сүүс миэтэрэни, уһун дистанцияны хаан-билик буолан нэһиилэ сүүрдүм. Түмүгэр,  ирдэнэр көрдөрүүгэ  биир баал тиийбэтэ, онон дойдубар төннөргө күһэлинним.

Бу санаатахха, барыта дьылҕа-хаан ыйааҕынан эбит. Төннөн, ыаллыы сытар нэһилиэк уолугар кэргэн тахсан, күндү киһибин — уолбун оҕолоннум. Хомойуох иһин, ол кэргэмминээн сатаспатахпыт. Олоххо көрүүбүт ураты баҕайы эбит: мин, ол тухары, киин, киэҥ-куоҥ сиргэ талаһар баҕа санаам уостубатаҕа, өрүү үөрэхтэниэм, оҕобун киин сиргэ үөрэттэриэм этэ диэн баҕа санаалааҕым. Онтон кэргэним, тыа киһи сиэринэн, ынах-сүөһү көрөн, нус-хас олорор баҕалааҕа… Арахсан баран, Дьокуускайга кэлэн, дьэ ыра санаам туолла. Үрдүк үөрэх кыһатыгар киирэн хааллым. Оччолорго “маркетинг” диэн үөрэх сонун этэ, ким-туох буоларбыт чуолкай биллибэт курдуга, хата, онтукам билигин олус туһалаах буолан таҕыста. Ырыаһыт киһиэхэ реклама, пиар эйгэтэ син биир чугас буоллаҕа.

Оччоҕуна хара маҥнайгыттан ырыаһыт буолар баҕа санааҥ олох суох эбит дии. Идэҕинэн үлэлээн барбытын дуо?

Дьокуускайдааҕы судаарыстыбаннай инженернэй-техническэй институт диэн этэ оччолорго. Ону бүтэрэн, устунан преподавателинэн хаалбытым. Бастаан  воспитательнай управленияҕа саҕалаан, кэлин преподаватель буолбутум. 2003 сыллаахха, бу институт Хотугулуу-Илиҥҥи федеральнай университеккэ холбонон, Үп-экономика инситутугар көспүппүт.

Оттон билигин тугу гынаҕын?

Билигин оҕобун көрөр сынньалаҥҥа олоробун. Эстрада театрыгар контрагынан үлэлэһэр баҕалаах этим да, билигин сүрүн болҕомтом – дьиэ кэргэммэр, оҕобор.

Бэйэтин кэмигэр “Кофе” диэн ситиһиилээх бырайыак баара. Дуэт соһуччу үрэллибитэ.  Туохтан арахсыбыккытый, “сатаспатахтар”  диэн кэпсэтии эмиэ иһиллэр этэ.

Кырдьыгынан эттэххэ — сылайбыппыт. Сылаалаах ээ, бастаан бииргэ үлэлииргэ наһаа үчүгэй курдуга. Барыта саҥа, сонун…онтон сылайан бараҕын. Гонорарбыт икки киһиэхэ биир. Аны туран, таҥаспытыгар, сценическай уобараспытыгар биир эрэ киһи баҕа санаата учуоттаммат. Барыта иккиэммит фигуратыттан, тус санаатыттан тутулуктаах.

Паша иккис оҕолонуом этэ диэн хат буолбута, ол да иннинэ күн аайы бүтүөхпут этэ диирэ…. Ол курдук, төрдүс сылбытыгар улахан кыыһырсыыта суох арахсарга санаммыммыт.  Мин санаабар, туох барыта бэйэтин кэмигэр буолбута. Этиспэккэ арахсыбыппыт үчүгэй. Билигин эн-мин дэсиһэн, ол кэмнэри күндүтүк ахтабыт.

Бу дуэт эйигин элбэххэ үөрэттэҕэ дии?

Биллэн турар. Ырыаһыт буолан бу дуэттан кынаттанан тахсыбытым. Пашаҕа ол өттүнэн махталым улахан. Кини — сытыы кыыс мин олохпор холорук курдук ытыллан киирэн, ис турукпун арыйарбар көмөлөспүтэ.

Билэргит курдук, сыанаҕа биир бастакынан кылгас шортик, чулку эҥин кэтэн тахсыбыппыт. Соһуйаргыт буолуо да, бастаан кыбыста-кыбыста  тахсар этибит ээ. Аны туран, нуучча дьүһүннээх кыыс сахалыы ыллыыра эмиэ киэҥ сэҥээриини ылбыта. Ол эрээри, үйэбит тухары “туруусугунан сараҥныы” сылдьыбаппыт буо. Эбиитин институкка үлэлиибин, устудьуоннардаахпын, үлэбэр сөбүлүө суохтара дии саныырым.  Онон син биир тохтуохтаах этим.

Шоу-бизнес баарын суоҕун ырыта барбаппыт. Ол эрээри, бу эйгэ туспа уратылаах буоларын билэбит. Ол курдук, элбэх артыыс аһыы утаҕынан үлүһүйэр, маны тэҥэ нууччалыы  эттэххэ, “нетрадиционнай” сыһыаны талар, онтукатын аһаҕастык көрдөрөр буолла. Эн санааҕар, сыанаҕа тахсар дьон ыччат инигэр эппиэтинэһи сүгүөхтээх дуо?

Уопсастыбаҕа биллэриэ суохтаахтар дии саныыбын. Инниги олох өйдөөбөппүн уонна ылыммапын. Саҥа улаатан эрэр оҕо, “итинник” дьону көрө сылдьан буолуохтааҕын курдук ылыныан, бисексуальнай сыһыаҥҥа охтуон сөп. Аны туран, билиҥҥи ыччаты көрдөххө, кыыс да уол да араастаһыыта биллэ ачаабыт. Таҥна-симэнэ, тута-хапта сылдьаллара..  Ону тохтотуоха наада.

Дьиэлэригэр хайдах да  буолбуттарын иһин, уулуссаҕа общественнай сиргэ итинник аһаҕастык көрдөрөллөрө сатаммат.

Уонна шоу-бизнес биир мөкү көстүүтэ-сурах садьык тарҕанара буолар. Эн, бэйэҥ тускунан тугу эмит «соһуйа» истибитиҥ дуо?

Хаһан эрэ ватсабынан фотошоптаммыт хаартыска кэлбитэ. Онно  сыгынньах дьахтарга  мин сирэйим сыһыарыллыбыт этэ.  Соһуйдаҕым дии, атын дьон туох дии санаабыттарын билбэппин. Ол эрээри, миигин билэр дьон, фотошоп диэн тута сэрэйбиттэрэ буолуо дии саныыбын. Уопсайынан, билигин итинник араас сурахтан, дьон тылыттан эҥин хомойбот буолбуппун, урут ытаан да биэрэр этим (күлэр). “Эмис, кырдьаҕас»-диэн дьон кэпсэтэрин “үтүө дьон” бэйэбэр тиэрдэ охсоро. Билигин “куһаҕан” буоллаҕына “куһаҕан буоллаҕа” дии,  барыларыгар  син биир үчүгэй буобаккын диир санаалаахпын. Билбэт дьонум туох дии саныыллара миигин “тыыппат” буолбут.

Ол да буоллар, сөптөөх кириитиикэ, эйигин, инниҥ хоту барарга үөрэппит курдук көрөбүн. Холобур, аҥардас итинник түргэнник ырбытыҥ элбэх ыйытыгы үөскэтэр. Кистэлэҥиҥ?

Туох да улахан кистэлэҥ суох. Эти-сиини эрчийии, спорт уонна сөптөөх ас. Уонна удьуорунан да бэриллибит буолуон сөп, холобур, ийэм кырдьар сааһыгар ыран хаалбыта, ону да баппытым буолуо.

Артыыстар бырааһынньыктарыгар, “тусовкаларга” сылдьа5ын дуу?

Суох. Итинниккэ эҥин олох солом суох. Оннук бара-кэлэ  сырыттахпына, оттон дьиэ кэргэним нус-хас олоҕо ыһыллар буоллаҕа. Онон итинник ыҥырыылартан дьаахханабын. Ырыаҕа ылланарын курдук, бастатан туран, дьиэм иһинээҕи истиҥ сыһыаны өрө тутабын.

Кэргэҥҥинээн ханна билсибиккитий, туох-хайдах эйгэҕэ үлэлиир киһиний?

Үөрэммит институтум, бу санаатахха, иккис дьиэм кэриэтэ буолбут эбит. Кэргэним, үлэм, айар дьоҕурум — барыта бу үөрэх кыһатын кытары ситимнээх. Кэргэним институкка кэтэхтэн  үөрэнэ киирбитэ. Хас эмэ сыл харахпытынан хайҕаһан ыал буолбуппут.

“Сулус” диэн куттана санаабатаҕа дуо?

Суох, бу эйгэттэн олох ыраах буолан, киммин-туохпун билбэт этэ. Саха эстрадатын эҥин истибэт эбит. Билигин да билбэт. Онон “Дарья Лаврова” дии-дии өрө туппат (күлэр). Бу маннык сыһыан миэхэ ордук, ханна эрэ күүлэйдии эҥин сылдьан буолбакка, күннээҕи олоххо билсиппитин күндүтүк саныыбын.

Төһө романтик киһиний?

Оннук буолбатах эрээри, харыстыыр араҥаччылыыр идэлээх. Дьиэ-кэргэнин туһугар тугу барытын онорор кыахтаах. Биһиэхэ дьахталларга ол эрэ наада буоллаҕа. Вертолетунан роза сибэкки түспэт да буоллар (күлэр) дьиҥнээх эр диэн кини баар. Массыына саппаас чааһын маҕаһыыныгар, бэйэтэ бэйэтигэр үлэлиир.

Хаһан эрэ хас да артыыс буолан Үөһээ Бэстээх холуонньатыгар баран кэнсиэртээн тураҕыт. Итиник «ыҥырыыга» сылдьаргыттан куттаммаккын дуо?

Холуонньага биирдэ эрэр бара сылдьыбытым. Ол кэнниттэн барбаппын диэн бигэ санааламмытым. Ыарахан баҕайы ауралаах, киһи кыайан ыллааабат туруга этэ, быһатын эттэххэ,  аллараа дойдуга баран кэлбит курдук санаммытым… Ыһыах диэн этэ да,   хабыс-хараҥа дьон энергетиката санааны баттыыр этэ. Икки ырыабын нэһиилэ тулуйан ыллаабытым, олох уҥа сыспытым. Онон билигин инник ыҥырыылартан тута аккаастанабын.

Бэйэн “сыаҕыҥ” дьонуттан кимнээҕи кытта доҕордоһоҕун?

Наталья Бризтыын чугаспыт, биир институттан тахсыбыппыт. Андрей Саввинов, караоке күрэхпит кыайыылаҕа. Кинилиин наһаа үчүгэйдик тапсан үлэлиибит. Лена Старостина, Саша Старостина, Надежда Варламова, Кира Иванова, Сахамин, Ильдар, Виталий Очиров — биир дойдулаахтарбын кытары алтыһабын. Күн аайы кэпсэппэтэрбит даҕаны,  бэйэ бэйэбитин өйүү сатыыбыт.

Семен Ченяновтыын наһаа учугэйдик тапсан үлэлии сылдьабын. Альбом таһаарыахтаахпыт. Уопсайынан, аһаҕас сүрэхтээх дьону сөбүлүүбүн. Ол эрээри, бу эйгэҕэ мээнэ кэпсии-ипсии сылдьыбаккын, идеяҕын уоран ылыахтарын эмиэ сөп.

Ама?

Баар бөҕө буоллаҕа. Ол иһин буоларын саҕана көрдөрдөххө, кэпсээтэххэ быдан ордук. Ити чааһыгар, этэргэ дылы, элбэҕи көрсөн кэллэхпит..

Билигин эстрада таһымын туох дии саныыгын, эн курдук эт куолаһынан ыллыыр ырыаһыт төһө элбэҕий?

Бааллар, ол эрээри ааттарын эппэпппин, кими да хомоппот, өһүргэппэт курдук. Биһиги эстрадабыт, син сайдан иһэр, араас жанырдар баар буоллулар. Наар уруккуну хастахпытына  сайдыбаппыт буолуо дии саныыбын.  Холобур, ити Июлина, Россия таһымыгар таҕыста дии, эт куолаһынан нууччалы-омуктуу ыллыыр буолан. Билиҥҥи истээччилэр араарар буоллулар:  ким плюс-минус туһанан ыллыырын эндэппэкэ билэллэр.  Онон эт куолаһынан ыллаан дьон сурэҕин таарыйар,  дууһаларын тутар эрэ киһи дьиҥнээх ырыаһыт буолан салгыы үүнэр-сайдар.

Онтон музыка үөрэҕэ төһө наадалаах дии саныыгын? Бэйэн тустаах үөрэхтээххин дуу?

Музыкальнай оскуоланы бүтэрбитим, хореография кылааһын.  Билигин музыкальнай коллледж “эстраднай-джазовой” салаатыгар үөрэнэбин. Оҕобун көрө олорор кэммин туһалаахтык атаара сатыыбын. Биллэн турар, бу эйгэҕэ сылдьар киһи музыка түстүүр баазатын ылыахтаах дии саныыбын.

Арай оҕолоруҥ ырыаһын буолабыт диэн турдахтарына хайыаҥ этэй?

Өйүөҕүм. Ол эрээри,  иккис үөрэхтээх буолуохтарын наада. Ырыаһыт олоҕо табаар курдук, билигин баар — сарсын суох. Үлэлээбэккэ ыһыгынныҥ да, тута истээччи сэҥээриитин сүтэрэҕин. Онон үлэлиэххэ наада. Онтон саамай сүрүнэ — оҕолорум уопсастыбаҕа туһалаах дьон буоллуннар диэн баҕа санаалаахпын.

“Аартык” ааҕааччыларыгар тугу баҕарыаҥ этэй?

Ылсыбыттарын тиһэҕэр тириэрдэр кытаанах санааны, ситиһиилэри!  Туохтан да толлумаҥ,  иннигит диэки бара туруҥ! Олоххо көстөр  уустуктар кэлин тиһэҕэр үтүөҕэ эрэ тириэрдэллэр диэн бигэ санаалаахпын. Ону сыаналыах эрэ тустаахпыт. Барыгытыгар тапталы, дьолу, табыллыыны уонна “аартыктарга” ситиһиини, суруйар бөрүөҕүт сыппаабатын!!!

***

Кэпсэттэ Анна МИХАЙЛОВА,

Aartyk.Ru

Обсуждение • 4

Добавить комментарий
  1. Олус бэрт!

    Урут икки нуучча кыыЬа сахалыы билэр, ыллыыр дии саныырым, Бу Лаврова эмиэ баар эбит дуу?
    НаЬаа да дьоЬун тыллаах-естеех кыыс эбит, маладьыас.
    ДьуЬунэ да бэрт.
    Концерыгар булан сылдьыам этэ.

  2. Петр

    Кини курдук ийэтин сана дьиэлээн, массыыналаан, кэнсиэригэр кэмэлэспут оголоругар уон оччону биэрэн сылдьар киьи. Дьоьун киьи

  3. Мин

    Даша молодец! Майгыта сымнаҕаһа, дьоҥҥо сыһыана, наар күлэ-үөрэ сылдьар. Боростуой майгылаах Таатта талыы талба кыыһа))

  4. Иван

    Махтал наьаа учугэй статья

Оставить комментарий    

!