ОТ ҮЛЭТЭ ЭРЧИМИРЭР

«Туймаада» Агрохолдинг хаһаайыстыбаларыгар отчуттар сүөһү аһылыгын бэлэмнээһиҥҥэ бары күүһү ууран туран үлэлии сылдьаллар. Бу тэрилтэ иһинэн  өрөспүүбүлүкэ араас муннуктарыгар биэс хаһаайыстыба сүөһү, сылгы иитиитинэн дьарыктанар. Бу хаһаайыстыбалар сайын устата 7620 тн оту бэлэмниэхтээхтэр.

Хаһаайыстыбалары биирдиилээн ылар буоллахха от ыйын 31 күнүнээҕи туругунан “Кладовая Олекмы” ХЭТ 547 тн оттоох. Былаанын 66,7 % толорбут. Сайын устата 820 тн оту бэлэмниэхтээх. Онтон “Туймаада Экоферма” ХЭТ 2500 тн оту бэлэмниэхтээх. Билиҥҥи туругунан 769 тн оттоохтор. Ити былаан 30,8 %-на. Бу хаһаайыстыбалартан окко биир улахан былааннаах хаһаайыстыбанан “Бөртө сылгы собуота” ХЭТ буолар. Хаһаайыстыба отчуттара сайын устата 3000 тн оту бэлэмниэхтээхтэр. Отчуттар билиҥҥи туругунан куһаҕана суох көрдөрүүлээхтэр. Бэҕэһээҥҥи күн туругунан Бөртөлөр былааннарын 39,2 % толорон 1176 тн оту бэлэмнээбиттэр. Оттон “Новай совхоз” отчуттарын көрдөрүүлэрэ сэмэй соҕус. Бу хаһаайыстыбаҕа кыстыгы этэҥҥэ туоруурга 300 тн от былаан түһэриллибит. Новайдар билиҥҥитэ 35 тн оттоохтор. Тааттаҕа баар “Победа” ХЭТ былаана кырата суох. Ол курдук хаһаайыстыба отчуттара 1000 тн былааннаахтар. Отчуттар 260 тн оту  бэлэмнээн былааннарын 26 % толорбуттар.

Бүгүн атырдьах ыйын бастакы күнэ. Уруккута бу күннэргэ, атырдьах ыйын саҥатыгар ханна да муҥутаан от оттоноро. Бу да сырыыга агрохолдинг отчуттара ити үгэһи тутуһан балайда оту оттуохтара диэн эрэл баар. Халлаан эрэ мэһэйдээбэтэр.

***

Прокопий ХАБАРОВ