Ньурбаҕа коммунистар икки сыллаах үлэлэрин түмүгүн таһаардылар

Ньурба быыбардыыр уокуругуттан Ил Түмэҥҥэ депутат, парламеҥҥа КПРФ фракциятын чилиэнэ Иннокентий ВАСИЛЬЕВ соторутааҕыта дойдутугар баран коммунистар отчуоттуур-быыбардыыр конференцияларыгар кыттан кэллэ. Ол туһунан “Коммунист” хаһыакка суруйар:

Иннокентий Васильев, Ил Түмэн депутата

“800-тэн тахса биэрэстэни айаннаан, төрөөбүт Ньурбабар тиийэн, дойдум барахсан ыраас салгынын астына эҕирийэбин. Манна кэлбит соругум — РФКП Ньурба оройуонунааҕы комитетын икки сыллаах отчуоттуур-быыбардыыр конференциятыгар кыттыы.

Конференцияҕа нэһилиэктэртэн 30-тан тахса делегат талыллан кэлбит. Делегаттар уонна ыҥырыллыбыт дьон үксүлэрэ бааллар.

Мунньаҕы ытык-мааны кырдьаҕаспыт Василий Семенов эҕэрдэ тылынан аста. Мин РФКП Саха сиринээҕи комитетын салалтатын аатыттан, конференция кыттыылаахтарыгар аадырыстаммыт суругун ааҕан иһитиннэрдим уонна бэйэм ааппыттан эмиэ эҕэрдэ тыл эттим.

Мунньахха РФ Президенин быыбарыгар Павел Грудинин кандидатуратын көхтөөхтүк агитациялаабыт коммунистарга махтал суруктары туттардым.

Отчуоттуур дакылааты РФКП Ньурба оройуонунааҕы комитетын бастакы сэкиритээрэ Валерий Сергин оҥордо. Кини кэнники 2 сылга райком тугу үлэлээбитин сиһилии кэпсээтэ: коммунистар быыбардарга хайдах кыттыбыттарын; партия кэккэтигэр хас саҥа байыас киирбитин; төһө мунньах ыытыллыбытын, усунуос хомуллубутун уо.д.а.

Валерий Степанович 15 пионер уонна 10 комсомолец баар буолбуттарын туһунан ордук астынан иһитиннэрдэ. Хомойуох иһин, кинилэр араас оскуолаларга үөрэнэллэринэн сибээстээн тэрээһин үлэ ситэ барбатын бэлиэтээтэ. Туох итэҕэстэр баалларын билиһиннэрдэ.

Салгыы хонтуруоллуур-ревизиялыыр комиссия бэрэссэдээтэлэ Михаил Эверстов үп-харчы хамсааһынын, усунуос хомуйуутун уонна партийнай хаһыаттарга сурутуу туһунан сиһилии дакылааттаата.

Делегаттар конференция үлэтигэр актыыбынайдык кыттан дакылаачыттарга элбэх боппуруос биэрдилэр.

Миэхэ, партия рескомун бюротун чилиэнэ буоларым быһыытынан, Петр Семенов маннык боппуруоһу биэрдэ: “Урут райком чилиэттэрин ахсаана 60-тан таҕыстахтарына, бастакы секретарга хамнас көрөр туһунан балаһыанньа баара. Ол Ньурба райкомугар тоҕо суоҕуй? Секретардары хамнастыыллара наада”.

Чахчы даҕаны, Ньурба райкома кэнники кэмҥэ үчүгэйдик үлэлээн кэллэ. 2011 сылга учуокка 30-ча эрэ коммунист турар буоллаҕына, 2018 сылга 180 чилиэннээх.

— Бу боппуруоґу мин реском ааспыт бюротугар туруорбутум. Онуоха кырыымчык үп-харчы балаһыанньатын учуоттаан, өссө төгүл ааҕан-суоттаан баран, көрүөх буоллулар, — диэн хоруйдаатым.

“Коммунистар значоктара тоҕо суоҕуй? Бэйэбит да атыылаһыа этибит”, — диэтэ Иннокентий Винокуров туруоруста.

“Маҥнайгы сүһүөх партийнай тэрилтэлэр ортолоругар партийнай үлэҕэ күрэхтэһии биллэриэххэ, онуоха көһө сылдьар Кыһыл Знамя олохтуохха” диэн этиилэр эмиэ киирдилэр.

Бу икки сыл түмүгүнэн Маалыкай маҥнайгы сүһүөх партийнай тэрилтэтэ үчүгэй көрдөрүүлээх буолан, чуолаан, отчуот түмүгүнэн коммунистар ахсааннара 50 киһиэхэ тиийбитинэн, көһө сылдьар Кыһыл Знамяны илдьэ барда.

Делегаттар райком чилиэннэрин таллылар. Райком бастакы сэкиритээринэн  Владимир Семенов талылынна, иккис секретарынан — Татьяна Кардашевская. сэттэ киһилээх бюро талылынна”, – диэн Иннокентий ВАСИЛЬЕВ, Саха Республикатын Государственнай Мунньаҕын (Ил Түмэн) депутата, РФКП Саха сиринээҕи комитетын бюротун чилиэнэ суруйбут.

***

Aartyk.Ru

Фото Св. Егоровой.