Ньурба куоратын общественниктара: “Киһи киһиттэн үөрэнэр”

Биир-биэс харчыта суох дьон-сэргэ туһугар үлэлиир, сүүрэр-көтөр ураты дьон баар – общественниктар. Ордук общественнай үлэнэн сэбиэскэй кэмҥэ итиллибит, улааппыт, оччотооҕу идеология тыынын иҥэриммит дьон дьарыктаналлар.

Олорор сиргэ -түөлбэҕэ киһилии сыһыаннаһыы, олорор усулуобуйаны тупсарыы былаас эрэ кыһалҕата буолбатах. Дьон бэйэтэ олоҕо тупсарыгар эмиэ кыһаллыахтаах. Итинник санаанан салайтаран куораттарга, нэһилиэктэргэ олохтоохтор түөлбэнэн түмсэн, бэйэ-бэйэлэригэр көмөлөсүһэн, общественнай үлэни-хамнаһы көҕүлүүр, тэрийэр буоллулар.

Түөлбэнэн үлэ биир ситиһиилээх холобурунан Ньурба куората буолар. Кырдьаҕастарга көмөлөһүү, кыамматтарга  тирэх буолуу, түөлбэ олоҕун-дьаһаҕын тупсарыыга үлэни тэрийии, олохтоохтор уонна былаас икки ардыгар далаһа оруолун толоруу – бу барыта түөлбэ салайааччыларын санныгар сүктэриллэн кэллэ.

Ньурба куорат салайааччытын эбээһинэһин быстах кэмҥэ толоро сылдьар Ольга Алексеева дьаһайан Дьокуускайынан, Намынан айанныыр программалаах, Ньурбаттан түөлбэ салайааччылара кэллилэр. Бүгүн, сэтинньи 30 күнүгэр, Ил Түмэҥҥэ депутаттарын Иннокентий Васильевы, улуус Дьокуускайдааҕы бэрэстэбиитэлин Игорь Яковлевы кытары көрсөн ирэ-хоро кэпсэттилэр.

Түөлбэ сэттэ салайааччылара бары да дьоннорун-сэргэлэрин туһугар сүрэхтиин-быардыын кыһаллар дьон эбит. Накыыннааҕы хайаны байытар кэмбинээт үлэтиттэн саҕалаан оскуола, дьыссаат тутуутугар тиийэ санааларын эттилэр.

“Улуус баһылыгынан талыллыбыт Алексей Иннокентьев урут мээрдии да олорон түөлбэнэн үлэни улаханнык өйүүр, суолталыыр буолара. Билигин улуус таһымыгар тахсан баран ити үлэни салгыы күүһүрдүө диэн эрэнэбит. Бу ахсынньыга куорат мээрин быыбара буолаары турар. Саҥа талыллыбыт мээр  общественниктары Ньурбабыт сайдарыгар түмүөн баҕарабыт”, – диэн түөлбэ салайааччылара эттилэр.

Депутат Иннокентий Васильев соторутааҕыта улуус баһылыга Алексей Иннокентьев Дьокуускайга кэлэн эһиилги сылга алта улахан объект тутуутун туруорсан барбытын туһунан кэпсээтэ. Ол иһигэр бөрүкүтэ суох устуоруйалаах Ньурбатааҕы стадион, Күндээдэтээҕи оскуола ситэри тутуллан киириэхтээҕин аҕынна. 240 миэстэлээх саҥа таас дьыссаат үбэ-харчыта быһаарылла сылдьарын туһунан эттэ. Ону сэргэ Маалыкай, Малдьаҕар, Хатыы суолларын оҥоруутугар ханнык механизмы туттан үлэ барыахтааҕын туһунан кэпсээтэ.

Иннокентий Васильев, Ил Түмэн депутата уонна Игорь Яковлев, Дьокуускайга Ньурба улууһун бэрэстэбиитэлэ.

Игорь Яковлев олох-дьаһах коммунальнай хаһаайыстыба өттүгэр улуус салалтата тугу ситиспитин, ханна, кимнээҕи кытары кэпсэтии барбытын сиһилии кэпсээтэ уонна Дьокуускайга олорор Ньурбаттан төрүттээх биир дойдулаахтарын түмсүүтүн тэрийбиттэрин туһунан биллэрдэ.

“Ахсынньы 28-29 күннэригэр улахан тэрээһин былааннанар. Ньурба нэһилиэктэрин баһылыктара, депутаттара, салайааччылара, бастаан, республика ситэриилээх былааһын үлэһиттэрин кытары көрсүһүөхтэрэ, онтон дьокуускайдарга анаан Опера уонна балет театрыгар Саҥа дьыллааҕы көрсүһүү тэрийиэхпит. Түмсэр кэм кэллэ, сөптөөҕүн үрүө-тараа сырыттыбыт, төрөөбүт улууспут, республикабыт сайдарын туһугар үлэлиэххэ-хамсыахха”, – диэн ыҥырда.

Итини таһынан Иннокентий Васильев парламеҥҥа туох-ханнык үлэ барарын, сокуоннар ылыллалларын туһунан кэпсээтэ. “Эһиилги бюджеппыт кырыымчык. Дохуота –  165 млрд, орускуота – 170 млрд. Инвестиционнай чааһа эмиэ татым. Онтон кэлэр сылларга өссө уустук балаһыанньа буолара сэрэйиллэр”, – диир.

Общественниктар Маардааҕы техникум уонна Ньурбатааҕы колледж бииргэ холбоһон баран, кыайан аккредитацияларын барбакка, элбэх ыччаты уонна төрөппүттэри эрэйгэ тэптилэр диэн суҥхардылар. Иннокентий Давыдович депутат быһыытынан бу боппуруоһу хонтуруоллуом диэн эрэннэрдэ уонна Маардааҕы техникум алмаас промышленноһыгар олохтоох каадырдары бэлэмниир улахан суолталаах үөрэх кыһата буоларын, аккредитация боппуруоһа хайаан да быһаарыллыах тустааҕын эттэ.

“Бу техникум баазата олус үчүгэй, карьердарга үлэлиир улахан массыынаны ыытарга үөрэтэллэр, онон техникуму чөлүгэр түһэрэн үлэтин сөргүтүөх тустаахпыт”, – диэтэ.

Ньурба куорат түөлбэлэрин салайааччылара.

Түмүккэ депутат общественниктарга махтанна:

“Дьоммут, дойдубут туһа диэн үлэлии-хамсыы сылдьаргыт олус хайҕаллаах. Депутаттартан, салайааччылартан саҕалаан общественниктарга тиийэ бары түмсэн, атааннаспакка-арахсыбакка, сомоҕолоһон үлэлээтэхпитинэ эрэ улаханы ситиһиэхпит, олохпутун тупсарыахпыт. Маннык кэлэн илэ көрсөн кэпсэтэн бараргыт икки өттүбүтүгэр туһалаах. Сотору сыл түмүгүнэн депутаттар дойдубутугар баран дьоммутун кытары көрсүһүөхпүт, үлэни-хамнаһы отчуоттуохпут”, – диэн биллэрдэ.

Түөлбэ салайааччылара салгыы Нам улууһугар тахсан общественниктар үлэлэрин-хамнастарын билсиһиэхтээхтэр: “Киһи киһиттэн үөрэнэр”.

***

Aartyk.Ru