Курс валют
$
92.59
0.02
100.27
Курс валют
Курс валют
$
92.59
0.02
100.27
Меню
Поиск по сайту

Күрүөтэ суох хаһааҕа киирбиччэ…

15.11.2017 03:40 7
Күрүөтэ суох хаһааҕа киирбиччэ…

Бу үйэҕэ диэри правительство дьиэлэрин иһинэн-таһынан син сыбдыҥнаһан киирэн-тахсан, сылдьан-кэрийэн кэллэхпит буолуо.  Ол тухары үрдүк өһүөлээхтэр, уһун көрүдүөрдээхтэр имиллэн-хомуллан, таҥас-сап, сирэй-харах, дьүһүн-бодо буола сылдьалларын көрбүт аньыылаах суоҕа. “Айыбыын, эчи сыттыын-сымардыы мааныларын бараххаттар” , – диэн буолара.

Ол бэйэлэрэ билигин олуона бирикээс толуктара буолан тула-мала көрөн чыпчыҥнаһа сылдьаллар. Соторутааҕыта АГИП муҥур тойоно дьарамай дьаһал түһэрбит диэн буолла. Улахан уораҕайга үлэлээччилэр мантан антах таҥастарын ыбылы өтүүктэнэн, бачыыҥкаларын үнтү килэбэчитэн, баттахтарын ньалҕаарыччы тараанан  эрэ баран үлэлэригэр кэлиэхтээхтэр үһү. “Уот барда”, “уу суох” эҥин диэн туора ханарытыы табыллыбат.

Эр дьон биир өҥнөөх, биир матырыйаалтан тигиллибит бүрүүкэлээх , бинсээктээх, хайаан да сырдык өҥнөөх, ойуута суох ырбаахылаах буолуохтаахтар. Хараҥа өҥнөөҕү кэппиттэр тута үлэлэриттэн үүрүллэллэр. Киһини өмүрдэр өҥө-ойуута  суох “моойторуктаах” буолаллара ирдэнэр эбит. Хаалтыһа суох кэллэххинэ аан антах “бара тур!” дииллэр. Онтуларын өҥүрүк куйаас түстэҕинэ сайын биирдэ устуохтаахтар.  Ол иннинэ устан көр эрэ – баппаал, бырапаал.

Сайын сиэҕэ суох ырбаахыны сыгынньах эккэ кэтэри көҥүллээбиттэр. Эр дьоҥҥо. Бутуйан иэдээн…

Дьахталлар дьыалабыай көстүүм, ырбаахы кэтиэхтэрин наада эбит. Хата булууһа, сэлиэччик, бээһиҥкэ кэтэри көҥүллээбиттэр. Дьыалабыай дьууппа кэтиэххэ сөп. Ол эрээри төһө уһуннаах, хайдах быһыылаах дьууппаны “дьыалабыай” диэн ааттыыры “кутюрье” чопчулаабатах.

Үлэҕэ триконан, джинсынан сылдьары боппуттар. Гуляев спорстмен маастаркатын улаҕа уурар дуу, уоттуур дуу буолбут. Попугайдыы дьэрэкээн өҥнөөх таҥаһы кэтэрин сөбүлүүр мадам Соловьева мантан антах ДП-га киирбэт – аан хатаммыт. Соһулла сылдьар субуруускай дьууппалаах Февроньяҕа эмиэ. Тура сылдьар бүрүчүөскэлээх Гурьева саа ытыытыгар чугаһаабат.  “Быраап-тайма эҥин диэн не выходи-заходи” диэбиттэр.

Путин уонна кыыл ойуулаах маайканы мантан антах тиирэ кэтии бобуллар. Суруктаах таҥаһы кэтэр, уопсайынан, бобуллубут. Үлэлээбэккэ ону кыҥастаһа олоруоҥ дуо?

Дьахталлар кырааскаламмакка, айылҕа тугу биэрбитинэн сылдьалларын ирдээбит. Дьон дьону билсибэт дьаабыта…

Хобо тыаһынан лыҥкынаһан, араас киэргэллэри илибирэтэ-салыбырата сылдьар мантан бэттэх тохтуур. Оҕуруо-тайма буолан күлүмүрдээн киирдэххинэ сонно тута харабыллар тоҕута тыыталлар. Араас өҥнөөх таастаах көлөөскөҕүн тарбаххын кытары быһыахтара.

Эрэйэ суох чунуобунньуктарга анаан кытаанах матырыйаалтан өҥө-дьүһүнэ, сиэбэ суох анал форма бюджет суотугар сакаастыахтарын сөп эбит. Барыларыгар биири. Түөстэригэр хосторун нүөмэрэ, IP аадырыстара.

Итинник ньыманан чунуобунньуктары начаас муостарын-туйахтарын сарбыйан, куттарын-сүрдэрин тоһутан, киһи аатыттан аһардан барыларын ыһыталаан кэбиһиэххэ сөп. Бэт да бэт. Биир да тойон-хотун ДП-га суох буоларын курдук.

Арай түөрт этээс тухары кырыылаах ыстааннаах, хараҥа бинсээктээх, сырдык соруочукалаах, халбаҥнаабат хаалтыстаах, бэрээдэк быһа сиэбит култууралаах баҕайы биир чунуобунньуга  хара баттаҕын таҥнары тараана-тараана күлэн ыттайа  сылдьыа…

***

Бүөтүр АРЫЫЛААХАП,

“Аартыкка” анаан.

Обсуждение • 7

Добавить комментарий
  1. Трудящийся

    Сонун гынан, сэбиэскэй кэмнэ оннун маннык диэн суруйаллара бары биир танастаахтар диэн, билигин омуктуу дресс код диэн онорбуттар, дьэ сыл тахсар буолбуппут, сыччах. Кырдьык Сэбиэскэй кэмнэ барыта наука5а тирэ5ирэн оноhуллар буолла5а.

  2. Байбал

    Тугу да гыналлаоа суох бэйэ бэйэлэрин сойколаьан биэрээхтииллэр.

  3. Байбал

    Сойуолаьан…

  4. Хамса

    Баттагын таннары тараанар диэн кими эппитий ити?))

  5. Восток

    Дресс код- диэн урут баара.Оскуола уорэх улэ онтон ким да илиитэ ата5а туллан туспэтэ5э.Туохха барытыгар бэрээдэк баар буолуохтаах.Елка курдук дуу попугай курдук эриэн оцноох солуута суох тацныы корорго суоргу.

  6. Уоһук

    Ситэри биил кээмэйин хааччахтыахтарын соп эбит. Олохтоммут кээмэйдээх сиринэн батан ааспыт ааЬар курдук.

Оставить комментарий