Курс валют
$
65.72
0.32
75.57
Курс валют
Курс валют
$
65.72
0.32
75.57
Меню
Поиск по сайту

Быыбар сууттара

05.09.2018 09:27 2
Быыбар сууттара

Нэдиэлэ саҕаланыаҕыттан быыбарга кыттар-кыттыбат туһунан сууттар мунньахтара будулуйан олорор, ол аайы хандьытааттар сүрэхтэрэ биир кэм эппэҥнэс.

Бэнидиэнньик күн Набережнай уокурукка Ил Түмэн быыбарыгар кыттар хандьытааттар харсыстылар. Саха Өрөспүүбүлүкэтин Үрдүкү суута ЛДПР бэрэстэбиитэлэ ГП хандьытаатын утары үҥсүү биэрбитэ дьүүллэннэ. Мария Христофорова, «Ситим» медиагруппа генеральнай дириэктэрин юристара айдаан «дьаабылыкатын» кум-хам ыстаан уҥуоҕун эрэ ордордулар, онон хандьытааттарын быыһаан ыллылар. Быыбар буолуо 5 хонук иннинэ хандьытааты устар кыаллыбат, онон Христофорова  быыбарга кыттар суола тэлэччи аһылынна.

Санатар эбит буоллахха, ГП хандьытаата быыбардыыр плакатыгар макбугу кыбыммыт хаартыскатын ЛДПР «мохсоҕоло» кыраҕы хараҕынан дьөлө көрөн суукка үҥсүбүтэ. Сокуон быһыытынан, көҥүлэ суох биир да тэрилтэ дьиэтин, табаарын аҕытаассыйалыыр плакаттарга, хаартыскаларга туттуо суохтааххын. Саха сирин суута эмиэрикэлэр табаардара-таймалара Арассыыйа сокуонугар хапсыбат диэбит быһыылаах, ЛДПР хандьытаатын үҥсүүтүн олоҕо суоҕунан аахта, киэр элиттэ.

Бүгүн Борис Попов хандьытаат быһыытынан дьылҕата быһаарыллыахтаах. Ил Түмэн дьокутаатыгар хандьытаат буолан быыбарга мандаты тардыалаһар дуу, суох дуу. Попов Ньурба уокуругар эсердэртэн биир мандаты былдьаһар. Сүрүн утарсааччыта — «ньыгыл» Антонина Григорьева.

Иван Шамаевы эсердэр быыбартан устаары хачыгыратыы. Элик бэрдэ маннааҕы да, оннооҕу да суукка кыайан таҕыста. Албакаата ааттаах-суоллаах Ольга Тимофеева, табаарыһа биллэр киһи Егор Жирков. Үөһээ Бүлүү-Горнай биир мандаттаах быыбардыыр  уокуруттан билигин Шамаевы муустаах ураҕаһынан үүрэр кыаллыбат буолла.

Дьэ, саамай кытаанах, эриирдээх-мускуурдаах, кэтэһиилээх сууту Ил Түмэн бэрэстээтэлэ, буордаах Бороҕон уордаах уола, улахан мунньах нүһэр бэлиитигэ Александр Жирков таныытынан тыыра сыдьар. Кини техническэй хандьытаата Андрей Пухов быыбарга кыттарын кыра сууттар бары боппуттара. Үҥсүүк-харсыык ааты эмиэ Тумууһап баартыйата ыла сылдьар.

Жирков дьоно уһатан-кэҥэтэн хандьытаат Пуховтарын дьыалатын өр соскойдоотулар. «Биэс хонук быыбар  иннинээҕи»сокуоҥҥа диэри ууннары тардыы.  Москубалар сууттара Пухов ааһыныытын сарсын, балаҕан ыйын 6 күнүгэр, көрүөхтээхтэр. Туох быһаарыыны ылаллара биллибэт. Өскөтүн Пуховы быыбарга киллэриҥ диэн эттэхтэринэ, Жирков өрөгөйө улаатар уонна ыллыы-ыллыы быыбарга кыттан кыайар.

Оттон сахалар сууттара Пуховы сөпкө уһулбуттар диэн бигэргэттэҕинэ, бороҕоттор Булуҥунан-туундаранан быралгы сылдьан баран дойдутугар төннөн быыбарга кытта сылдьар Аркадий Алексеевтарын (эсердэр хандьытааттарын) ыһаарылаан сииллэр. Кини уһулуннаҕына Жирков утарылаһааччыта суох буолан бу сырыыга Ил Түмэҥҥэ талыллыа суоҕун сөп. Иэдээн. Оттон Жирков барлаамаҥҥа киирбэтэҕинэ бүтүн өрөспүүүлүкэ бэлиитикэтигэр уларыйыы-тэлэрийии тахсар кутталлаах. Кини оннугар ким-ким бэрэстээтэл буолан хончойо түһүө биллибэт.

Бу балаһыанньаҕа саамай куһаҕан өлүүгэ Аркадий Алексеев түбэспит. Пухов Арассыыйа Үрдүкү суутугар хоттоҕуна  кынчарыллар, кыайдаҕына да ойоҕоско бэриллэр. Быыбар кэнниттэн төрөөбүт төрүт буоругар аҥар атаҕын ылгын чыкыйа да үктэммэт дьылҕатыгар түбэспит.

Аны Алексеев баартыйа аатыттан кыттар, ол иһин кини баҕата билигин учуоттаммат. Тумууһап киниэхэ бэйэтигэр эппэккэ да эрэ, бюро быһаарыытынан сарылаппытынан быыбартан устан кэбиһэр кыахтаах да, бырааптаах да. Ол улуу бэлиитик ол аайы сөтөллөн да көрөрө саарбах.

Жирков былааска өр олорбут киһи быһыытынан билсиитэ-көрсүүтэ дэлэгэй. Ыһыахха Федерация Сүбэтин хотунун, саамай тутаах киһи ыбылы дьүөгэтин аҕалан саһыл саҕалаабыта да баар, таах хаалыа дуо — суукка кыайан да тахсар кыахтаах. Оччотугар  кытай Бииктэрбит көрөн туран баралааман тутаах кириэһилэтиттэн ытыс соттор кутталлаах.

Быыбар буолара бу кэллэ. Бэһиэлэй күн-дьыл түгэҕэ көстөн эрэр. Кимиэхэ эрэ соргуну аҕалыа, кимиэхэ эрэ сору. Ол гынан баран оонньуу аата оонньуу, күрэх аата күрэх — кыайыылаах да баар буолуохтаах, кыайтарыылаах да баар буолуохтаах.

***

Aartyk.Ru

Обсуждение • 2

Добавить комментарий
  1. Эмээхсин

    «буордаах Бороҕон уордаах уола, улахан мунньах нүһэр бэлиитигэ». хата киьини куллэрэннит куммун уьаттыгыты

  2. Саһарҕа

    «буордаах Бороҕон уордаах уола, улахан мунньах нүһэр бэлиитигэ» дьэ Туйаара кыысчаан булан бичийэр. Олох хатырык мэтээл киниэхэ

Оставить комментарий