Хайҕал да сэрэхтээх

Дьон санаата уларыйара түргэнин. Бэҕэһээ эрэ ханна да олордуохтарын, туруоруохтарын билбэтэх кумирдарын билигин кэлэн «үһү» дии-дии үөх да, үөх…

Ким эрэ эйигиттэн атыннык толкуйдуур буоллаҕына, хайаан да  – «сыыһа». Эбэтэр ким хайдах, хаһан тугу толкуйдуурун үөһэттэн дьаһайыахтаахтар: «Бу сөпкө толкуйдуур киһи, бу – сыыһа толкуйдуур киһи».

Интернеккэ урут «Катехезис еврея в СССР» диэн суруйуу тарҕана сылдьыбыта. Сымыйа эрэ, кырдьык эрэ, ким да билбэт. Ол гынан баран онно бэрт интэриэһинэй «инструкциялар» бааллара. «Сөбүлээбэтэх эбэтэр туоратар киһигин толпа тырыта тыытарыгар киксиһиннэрэн, уган бириэхтээххин», – диэн. Ити урут да, аны да олус туттуллар ньыма.

Шоу-бизнес диэн үтүмэннээх харчы эргийэр эйгэтэ. Ордук интернет, соцситим суох, сайда илик кэмигэр ханнык артыыс аатырарын барытын ТВ быһаарара, онтубут да икки эрэ ханааллааҕа. Онон ТВ-га тахсыы биир кланынан приватизацияламмыта дииллэрэ оруннаах. «Бэйэ дьонун» эрэ эфиргэ таһаарыы, сөбүлээбэтэх артыыстары туоратыы, эфиртэн устуу, бэрик бэрсиһии… Билигин кэлэн дьэ ол сылларга эфиртэн маппыттар тимэхтэрэ сөллөн кэпсээн-ипсээн бөҕө.

Дьиҥэ онно шоу-биз «хоруоллара» эрэ буолбакка, ТВ салайааччылара эмиэ буруйдаах буоллахтара. Билигин кэлэн соҕотох Пугачеваны эрэ тэпсэ сатыыллар. Чэ, ити шоу-биз биир көстүүтэ.

Иккис көстүүтэ – билигин ТВ да, интернет да тура-тура бэҕэһээ эрэ атаҕын уурууртан соло булбатах Примадонноларын үөҕэн хооһургатыы. Элбэх киһи онно кыттыһар: «ырыаларын истибэппин», «кырдьыбыт», «иноагент оҥоруохха», «СВОну утарар»…  чэ, итинник хабааннаах комментарий үгүс. Дьон, баҕар,  кырдьык оннук саныыра буолуо.

Мин бииртэн сөҕөбүн – дьон санаата уларыйара түргэниттэн. Сарсыарда биири этэллэр, күнүс атыны туойаллар, киэһэ букатын да умнуохтара. Өйүүн политика уларыйан, Путин Пугачеваҕа уочараттаах уордьанын биэрдэҕинэ, бу үөхпүт каналлара хайыыллара буолла? Хайҕаан туруохтара, ээ? Ону кытары сорох көрөөччү эмиэ ытыһын таһынан айхаллыа.

Биһиги кыра алааспытыгар төнүннэхпитинэ эмиэ атылыы хартыына. Бүгүн – сололоох, чыыннаах-хааннаах киһини хайҕаан өрө бөтөрөҥнөтүү, айхал-мичил, көйгүөр-дэйбиир, дом. Онтон солотуттан барда да, бүгүҥҥү хайҕааччылартан хайыһан көрөрө ахсааннаах буолуо. Сорох-сорохторо  өссө сиилээн-сэтэрээн туруохтара.

Онон, хайҕал да сэрэхтээх. Биир күн хайҕаан хайаҕа ытыннарыахтара, иккис күн хатыйан хайаттан суулларыахтара.

***

Источник – телеграм-канал Т.НУТЧИНОЙ.