Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

Владимир ПОСКАЧИН: “Мин ааппыттан ватсапка күүлэйдии сылдьар суругу мин суруйбатаҕым”

14.03.2018 21:45 14
Владимир ПОСКАЧИН: “Мин ааппыттан ватсапка күүлэйдии сылдьар суругу мин суруйбатаҕым”

Соторутааҕыта интернет-мессенджеринэн Үөһээ Бүлүү улууһун баһылыгын Владимир Поскачин аатыттан ыҥырыы сурук тарҕаммыта. “Бассаап Баскачыына” быыбарга Владимир Путин кандидатуратын өйүөххэ наадатын уонна тоҕо оннук саныырын быһаарбыт этэ. Дьиҥнээх Поскачин Путины өйүүрүн киһи барыта билэр буолуохтаах, оннук да буолара ирдэнэр. Ол гынан баран, бу тарҕаммыт сурук сүнньүнэн сөп эрээри, хайдах эрэ тылын-өһүн олоруута кулгааҕы таһынан таһыйара.

“Ити сурук мин биир ватсап группабар кэлбитин эмиэ биир саҥа, сонун этии эбит диэммин салгыы атын ватсап группаларбар ыытан кэбиспитим, – диэн Владимир Семенович этэр. – Ол кэнниттэн хайалара эрэ миигин ааптар диэн баран салгыы ыытан кэбиспит. Хайалара эбитэ буолла… сүөһү эриэнэ таһыгар, киһи эриэнэ иһигэр диэн итини этэн эрдэхтэрэ. Ол иһин анаан-минээн быыбар сокуонун кэһимээри бу уоппускаҕа бардым. Уонна аһаҕастык бу сымыйа диэн биллэрэбин. Мин хаһан да бэйэбин Аҕа баһылыкпын эҥин диэн даххаһыйбат киһибин. Сымыйалыыры, киитэрэйдиири ис дууһабынан ылыммаппын, сөбүлээбэппин. Көнөтүнэн сылдьабын.. Онон, хайдах да балаьыанньаҕа, “киитэрэйдиэххэ” диэн тылы туттуом суох этэ”.

Салгыы кини этэр: “Билигин ити тарҕаммыт сурук туох айылаах улуу-дьаалылары өһүргэттэ диэн ырытан көрөргө сананным. Бастакы санаам диэн маннык. Биир биллэр уонна билэр даамам аатыттан тарҕаммыт сурукка миигин «биир улуус  эрэ баһылыга…» диэбиттэрин да үрдүнэн, мин, аатым син ыйааһыннаах эбит дуу дии санаатым. Аахайбаттара буоллар, итинник уохтаахтык хардарсыа суох этилэр”, – Владимир Семенович.

Онтон: “Иккиһинэн, нуучча өс хоһоонун кэриэтэ – «правда глаза колет».

Дьэ, айдааннаах сурук ис хоһоонун ырытыахха эрэ: «Биһиги сахалар бары да 100 бырыһыан куоласпытын Путиҥҥа да, Грудиниҥҥа да биэрбиппит иһин, ол кинилэр кыайалларыгар да, хоттороллоругар да туох да оруола суох». Бу этии кыларыйар кырдьык. Биир бырыһыан аҥаарын да кыайбат куоластаахпытын бары билэбит.

«Кыра омук буоларбыт быһыытынан, бу охсуһуулаах үйэҕэ биһиги киитэрэй буолуохтаахпыт. Ол аата, сөбүлээ-сөбүлээмэ, куустээхтэр диэки буоларбыт ордук буолуо. Былааска олорор киһини өйүөхтээхпит».

Маннык аһаҕастык «кыра омук буоларбыт быһыытынан» диэбитэ хас саханы өһүргэппитэ  биллибэт. Аны туран, “киитэрэй буолуу” диэн эмиэ хайдах эрэ иһиллэр. Өссө төгүл этэбин, мин илэ өйбүнэн хаһан да маннык суругу суруйуом суох этэ. Ол гынан баран, үөһэ тыынан баран уоскуйа түһэн бу киһи туох диэбитий диир эбит буоллахха маннык тахсан кэлэр эбит.

Аан дойдуну атыйахтаах уулуу аймаабыт улуу өбүгэлэрдээх саха омуга өйдөөн-төйдөөн көрдөххө, кырдьык, ахсааммыт лаппа аҕыйах. Күүстээх санаалаах киһи объективнай чахчыны билиниэхтээх. Санаан көрдөххө баары малтаччы эппит эбит.

“Киитэрэй” диэн арааһа өйдөөх буолуохтаахпыт диэбит быһыылаах диэтэххэ уонна күүстээхтэр диэки диэбэккэ, Улуу Россия ыарахан кэмигэр баар былааспытын өйүөххэ диэбитэ буоллар син барсыах курдук этии.

Уонна үһүс сүрүн этиитэ: «Ыраахтааҕыларын нууччалар бэйэлэрэ эрэ уларытыахтара, кэмэ кэллэ5инэ. Онно биһиги кыттыһаммыт быһаарар оруолу ылыахпыт суоҕа… Онон бу улахан боппуруоһу нууччаларга бэйэлэригэр хаалларыах тустаахпыт…»

Хас биирдии киһи куолаһа суолталаах, хас биирдии киһи санаата оруннаах. Ол гынан баран бэйэбитин, сахалары, туораттан көрдөххө, уһуннук бииргэ олорбуппутун да иһин, биһиги – син биир атын омук, атын рааса буоларбытын өйдөөн кэллэххэ, бу этии эмиэ оруннаах. Бу күҥҥэ, бу кэмҥэ баҕас оруобуна. Тоҕо диэтэххэ, төһө да биһиги сэбиэскэй былаас саҕаттан «многонациональнай» диэн мантра курдук хатылаа да, хатылаа буолларбыт – Россия  мононациональнай судаарыстыба. Тоҕо диэтэххэ, Россия нэһилиэнньэтин уопсай ахсааныттан 81,5 % – нууччалар. Бу эмиэ дьиҥ чахчы.

Онон аһара үөхсэр, кырыыр-таныйар дьоҥҥо этиэм этэ, наһаа солуута суох буолумаҥ диэн. Ама да улуутумсуйбут иһин. Көҥүл сахаларбыт, көҥүл дьоммут дэнэр дьон наһаа бас-баттах барыа суохтаахтар.

Көҥүл киһи – эппиэтинэһи өйдөөн туран бэйэтэ быһаарыныы ылынар кыахтаах киһи.

Арай кулут өйдөөх-санаалаах, кулут таһымыгар сылдьар киһи уолҕамдьы, уһуну-киэҥи өтө көрбөт быһаарыныыны ылынар. Көҥүлү өрө туппут чечен омугун өс хоһоонун курдук: «Гордый – как раб» диэн.

Онтон саха омуга түҥ былыргыттан “таҥара сэрэҕи таптыыр” диэн өс хоһоонноох. Өбүгэлэрбитин да ытыктаан маннык быыһык кэмҥэ аһара бас-баттах тылласпакка олоруохха баар этэ, дьиҥинэн.

Россия – улуу дойду. Ол быһыытынан бэйэтин историческэй суолунан баран иһэр. Билигин ала-чуо оннук буолуо, сарсын итинник тахсыа диэн ким да быһа этэн кэбиспэт дойдута.

Биһиги көҥүл Россия көҥүл гражданнара буоларбыт быһыытынан, син биир кини олоҕор кыттыһа олорорбут биллэр. Ол гынан баран ити биһигиннээҕэр аҕыйах ахсааннаах Тува уолугар Шойгуга тэҥнэһэр киһини иитэн таһаара иликпитинэ, биһиги, уопсай Россияҕа сабыдыалбыт суоҕун кэриэтэ буоларын өйдүөх кэриҥнээхпит.

Ол эрээри Евразийскай хамсааһын нөҥүө, бэйэбит культурабыт нөҥүө, бэйэбит итэҕэлбит нөҥүө син биир Саха Омук өйүн- санаатын, булгуруйбат дьулуһуутун, олоххо тапталын син биир этэ-тыына, биллэрэ-көрдөрө, тиэрдэ сылдьыахтаахпыт, онуоха дьулуһуохтаахпыт! Саха курдук Россия биэс гыммыт биирин тутан олорор омук суох. Аны туран, эмиэ билиниэххэ наада, биһиги курдук сомоҕолоһуулаах, тэрээһиннээх, дьулуһуулаах омук эмиэ аҕыйах. Тоҕо инньэ диибин диэ? Бачча киэҥ сиргэ-уокка олорон биир тыллаахпыт, биир майгылаахпыт, улууһунан арахсан атааннаһыы суох, ханна баҕарар хантан баҕарар кэлэн олохсуйабыт, күтүөт, кийиит буолабыт.

Аны туран билиҥҥи Аан дойду да, Россия да таһымыгар ханнык баҕарар эйгэгэ тахсар кыахтаахпытын эмиэ олох көрдөрдө. Холобур, биһиги курдук ахсааннаах омуктарга Олимпиада чемпионнарын, призердарын аахтахпытына син биир инники күөҥҥэ сылдьабыт.  Ол аата, мин, бэйэбитин сэнэммэккэ эрэ, ол гынан баран баар чахчыны учуоттаан, аахсан туран киирсиэхтээхпит диэн эттим.  Өй аҥаардаах дьон курдук ураа хаһыынан хайаны хам баттыы сатаабакка.

Түмүкпэр этиэм этэ, бу ватсапка суруйбут киһи этиитин уопсай өйдөбүлүн кытта сөбүлэһэбин диэн. Уонна кини Улуу Өксөкүлээх эппитин билиҥҥи кэм өйдөбүлүнэн этэ сатаабыт диэн тоһоҕолоон бэлиэтиэхпин баҕарабын.

Россия ыһыллан-тоҕуллан киирэн бардаҕына, дьэ, бу билиҥҥҥи үүт-тураан олохпутун суохтаан кэлэрбит чуолкай. Онон Ил Дархаммыт Егор Борисов тула түмсэн, бу быыбарга дьиҥнээх тэрээһиннээх, бэйэтин сыалын-соругун чопчу билэр, билиҥҥи кэмҥэ эппиэттэһэр кыахтаах нация буоларга өссө биир чиҥ хардыы оҥоруох тустаахпыт!

Туругурдун Улуу Россия! Туругурдун Саха Омуга!

***

Владимир Семенович ПОСКАЧИН,

Үөһээ Бүлүү улууһун баһылыга.

Обсуждение • 14

Добавить комментарий
  1. Аппанаас

    Урааааа! Кытаанах этии!

  2. Һөҕүҥ

    Көҥүл киһи, көҥүл омук бэйэтин интэриэһин бастаан көрүнүөхтээх. Онон бу Баскачыын көҥүл сахалар биһиги интэриэспит Россия ыһыллыбатыгар диэбитэ саамай сөп. Дьэ санаан көрүҥ эрэ. Путины суох гыналлар, Россияны ыһаллар, Саха Сирэ иирээки баайдаах Иркутскай уобалаһын, Амурскай уобалаһын, Хабаровскай кыраайы кытта один на один хаалан хаалар. Ол аата сэриилээн да туран биһиги биһиэнэ диир Алросабытын, Нерюнгрибытын, Алдаммытын былдьаан бараллар. Наада буоллаҕына биир-икки терракт оҥордулар да биһиги хоос гына түһэбит, ханна сэриилэһэ барыахпыт баарай? Оннооҕор биир котельнай Бэрдигэстээххэ умайбытыгар өлө сыһар дьон? Онон улуу Россия тыыннаах хааларыгар нууччалардааҕар өссө ордук интэриэстээх дьон биһиги, сахалар буолабыт. Бука бары Путиҥҥа!

  3. Чакыр

    Грудинин туһа диэн сымыйыаччылар мустан сахалары иэдэттилэр.

  4. 3385

    Хас биирдии кэм бэйэтин дьонун ирдиир. Ол иһин Саха Дьолугар үс саха уола: Максим Аммосов, Платон Ойунскай, Исидор Барахов быыһык кэмҥэ Саха Республикатын төрүттээтэхтэрэ. Салгыы сэбиэскэй кэмҥэ Винокуров, Борисов, Чиряев эмиэ республика туһугар үлэ бөҕө үлэлээбит сүдү дьон. Кинилэр суохтара буоллар алмаз промышленноһа суох буолуо этэ диэн билиниэххэ наада. Ыһыллыы саҕана Михаил Николаев саамай сөптөөх киһи тахсыбыта, онтон Штыров федеральнай центры кытта киирсэ сатаан баран билиҥҥи Ил Дархаммытыгар, Егор Борисовка, былааһын биэрэн барбыта. Егор Борисов
    Федераллар киэптии-хааптыы сылдьар кэмнэригэр абытай давканы тулуйа сылдьан дьонугар-сэргэтигэр баһаам элбэх үтүөнү оҥордо. Хараҕа суох эрэ киһи көрбөт.

  5. Haan

    Ил дархан маннык киьи буолуохтаах

  6. Спутник

    бэртээхэйдик ырытта. Дьэ кырдьык ГОЛОВА эбит 🙂
    дириҥ өйдөөх, чаҕылхай эр киhи тыллара

  7. Ылдьаа

    Бу улугэрдээх Аан дойду урдунэн буола турар хабыр киирсиилэр кэмнэригэр, кыра норуоппутун онно-манна провокациялаан уган биэрбэт наада. Ити уэьээ ааттаабыт сорох убайдарбыт сыыьа-халты туттууларыттан норуоппут элитата, интеллигенцията 1919-1927-1938 сс. имири кыргыллыбыттарын умнубатаргыт бэт буолуо этэ. Кураанах куолуьуттар, провокатордар норуоту онно-манна куеттээн, уган биэрэн баран, бэйэлэрэ суоллара Ким да иннинэ сойуо5а дии саныыбын. Биьиэхэ билигин революция наадата суох, теье кыалларынан стабильнай олох наада.Поскачин саамай сепке этэр.

  8. Һөҕүҥ

    Красавчик буо. Оруобуна эппит. Бука бары Егор Борисов тула түмсүөххэ, бу сырыыга Путиҥҥа куоластыахха! Оннооҕор Америка курдук бэйэтин светоч демократии дэнэр дойдуга действующай президент быыбарга кыттар түгэнигэр хайаан да кыайар.

  9. КЭЛЭЙБИТ

    ДЬэ кытаатан ку туйах хороонун кэнэтэ сылдьын оччохо олоххут тупсуо бары биир тэн баай тот олоххо олороргутун коруллуо Ахыйахпыт диэн ууну омурдан баран сырыттаххытына бэйэхит конституционнай быраапкытын кыайан туруорсубат буоллаххытына туох буолан бэйэбит республикалаах саха омук ааттана сылдьыаххытый Оьуохайдаан олонхолоон сайыны быьа ыьыахтаан саха омукпут сайынна олохпут тубуста дии саныыхыт дуо Биьиги да тоьо да ахсааммытынан ахыйахпыт иьин бэйэбит бырааппытын сокуон нонуо хорсуннук туруорсар лиидэрдээх буолуохтаахпыт оччохо Москва тойоно Путин утардыгыт диэн оруо маьы ортотунан умса баттыы сатыа суоха кыра да буоллар сокуону тутуьар буоллахына Мин кими да уган биэрэ сатаабаппын сокуонунан коруллэр бырааппытын эрэтуруорсабын

  10. Атын улуус

    Кэлэйбит диэн киһийээхчээнтэн киһи кэлэйиэх. Кэлэйэрдээх ээ. Поскачин сөпкө этэр. Биһиги бу дойдуга тэҥҥэ быһаарсар кыахтаныахпытын баҕарар буоллахпытына примитивно ахсааммыт элбиэхтээх, сатаатар сүүрбэччэ мөлүйүөн саха баар буоллаҕына – бу күүс. Аны туран ити Шойгу туһунан оруобуна эппит. Киһи хомойуох федеральнай былааска биир да киһибит суох. Урут Бородин, Колмогоров, Федотов, Томтосов бааллара. Билиҥҥи депутаппыт Тумусов туох да оруола суох. Борисов Е.А. саамай сөп политика ыыта олорор, билиҥҥи былааска өрөлөһөр себе дороже. Бу дьонуҥ юморы улаханнык ылыммат, конкретнай баҕайы дьон. Россияҕа былаас бэйэтэ сымныаҕа, айылҕа быһыытынан, онуоха диэри тыыннаах тиийиэххэ наада.

  11. Минсаха

    21 уйэ 10-с сылларыгар саха ейе-санаата, культурата лаппа сайынна. Егор Борисов курдук “себе на уме” салайааччылаах буоламмыт. Москва кере-кере кербете5е буолар до поры до времени быhыылаах. Сиртэн хостонор баай иhин охсуhуу барытын быhаарар (нефть, газ, алмаас, ниобий, таас чох уо. д. а.). Поскачин олонхото, куолута, cаха ахсаана тугу да быhаарбат. Олигархтар эттилэр, ба5ардылар да5аны сокуон, арба5астаах да абыраабаттар.

  12. 112

    В целом я с ним согласен. Хотя написано без всякого политеса.

  13. фома

    оксокулээх нууччалары, улуу арассыыйаны “киитэрэйдээн”, кэтэх санаалаах ойуоххэ, “турууласар догор” буолуохха диэбэтэх кырдьагас этэ. ис сурэхтэн нууччаны, арассыыйаны кытта бииргэ буолуоохха диэн кэриэсин этэн хаалларбыта. онон поскачин владимир семенович “киитэрэйдиэххэ” диэни собулээбэккэппитэ соп. а так саха киситэ бэйэтин тусугар эргитиилээх , улагалаах ойдоох буолан баччага кэлэн олордохпут. 18-с уйэгэ сахалары корбут, кэпсэппит, чинчийбит маак диэн немец киситэ ” якуты евреи сибири” диэн эргитиилээх, улагалаах ойдорун таба корон бэлиэтээн ааспыта баар.

  14. Восток

    Хомойуох иьин саха а5ыйаата.Улуу нучча омук эмиэ ол курдук.Укропияны кытта хаан булкуьан барыта ос-саас эрэ отто барар.Ол иьин киинтэн сэнээьин абаьы коруу атарахсытыы тахсар.Саха сирэ эмиэ кмнс буолан буттэ нашим/вашим атыыга таах барда.Саханы абааьы корор киьи олорор буолан сиэтэ сири дьону.

Оставить комментарий