Тохсунньутааҕы бырачыаска депутат тутуллубут

Тохсунньу 23 күнүнээҕи сокуоннайа суох бырачыаска Дьокуускай гордуматын депутата, “Туймаада” хаһыат сүрүн эрэдээктэрэ Адександр ЯКОВЛЕВ тутуллубут. Кини Навальнайы өйүү буолбакка, идэтин сиэринэн информация хомуйа болуоссакка бара сылдьан аараттан былдьаммыт. Ол туһунан “Туймаада” хаһыакка бэрт сэргэх репортаж оҥорбут.

Репортаж бастакы чааһа бүгүн таҕыста, онно ЯКОВЛЕВ сокуоннайа суох миитин хайдах саҕаламмытын, миитиннээччилэр саастарын, сирэйдэрин-харахтарын, майгыларын уруһуйдаабыт. Бэйэтэ хаартыскаҕа, видеоҕа түһэрэ сырыттаҕына, өлүү түбэлтэлээх диэбиккэ дылы, арыгы дьаардаах дьахтар ыбылы сыстан ыксата сылдьыбыт. Саҥардыы соччото суох аргыһыттан босхолонон истэҕинэ, аны полициялар кэлэн кум-хам тутан ПАЗикка симэн кэбиспиттэр. Александр салгыытын аныгыс нүөмэргэ суруйуом диэн эрэннэрбит.

Ону биһиги тулуйбакка Александрга бэйэтигэр эрийэн ыйыталастыбыт.

-Хайа хайдах ыыттылар? Депутатын көмөлөстө дуу, суруналыыһыҥ дуу?

-Ээ, депутат удостоверениетыгар эрэ кыһаллыбаттар эбит (күлэр). Манан диэн эттэххэ, полициялар түүрэйдээбэккэ, киһилии сиэринэн кэпсэппиттэрэ. Суруналыыспын билэн баран ыыппыттара.

–Эдэр баҕайы оҕолор, ыччаттар бааллар диэбиккин ди репортажкар. Ханнааҕы ыччатый? Тыа дуу, куорат дуу?

-Сөхтүм ээ, олох сүрдээхтэр, автобуска киирэн баран “Путин вор!” дии-дии хаһыытыыллар. Эдэрдэрэ бэрт буоллаҕа, оройго охсуллубатах, олоҕу билбэт ыччат. Аҥаар аҥаарга быһыылаах – тыата, куората.

-Дьонноро миитиннии сылдьалларын билэллэрэ дуу?

-Үксүлэрэ суох быһыылаах, кэпсэтэ сатаабытым да, кистииллэр.

-Оттон били арыгы сыттаах дьахтарыҥ ким эбитин биллиҥ дуо?

-Суох ээ (күлэр).

-Саша, оттон Губаревыҥ, КПРФ салайааччыта, туох да диэбэтэ дуо? 

-Мин партиям суох ээ.

-Оттон КПРФтан син биир Гордумаҕа киирдэҕиҥ дии.

-Мин кинилэри сырса сылдьан депутат буолбатаҕым. Онон бэйэм санаабын, гражданскай позициябын партияҕа сигэммэккэ бэйэм этэр, оҥорор бырааптаахпын.

-Мээр быыбарыгар 30-ттан тахса мөлүйүөн баранар эбит. “Наһаа ороскуоттаах, онон мээри аныахха наада” диэн коммунист Аммосов этэн турар. 

-Бу айылаах федеральнай быыбар буолаары турдаҕына мээр быыбарын суох оҥордохторуна, былаас партиятыгар төттөрү куһаҕанынан диэлийэн тахсыан сөп. Онон быыбар чуолкай буолар буолла быһыылаах.  Арай кандидаттарын рейтинэ олох быстар мөлтөх эрэ буоллаҕына, баҕар, Устаабы уларытан баран, депутаттартан талар курдук оҥоруохтара.

-Мээр астаапкаҕа барара эрдэ биллэр этэ дуо?

-Бу санаатахха, эрдэттэн оҥостубуттар эбит. Сэрэйдэххэ, Авксентьеваны барарыгар күһэйдэхтэрэ. Тугунан күһэйбиттэрин билии суох.

Ити уокуруктары бөдөҥсүтүү күһүҥҥүттэн саҕаламмыта дии, аны санаатахха быыбарга бэлэмнэнии эбит.  Билигин уокуруктар салайааччыларын саҥа мээр анаталыаҕа, онно бэйэлэрин киһилэрин туруоруохтара. Уонна саамай сэрэхэйбитим диэн – Ойуур фондатын сирин (Маҕанныыр, Намцырскай, Бүлүү трактарыгар ити ГРЭС-2 кэннинэн) федеральнай бас билииттэн республика бас билиитигэр көһөрбүттэрэ. Ол гынан баран, Авксентьева олорорун тухары, ити сири тыырыы боломуочуйатын республика былааһа олох мээрийэҕэ биэрбэккэ олорбута. Олох!  Элбэх оҕолоох ыалларга сир суох диэн хас да сыл учаастак биэрбэккэ олорбуттара дии. Дьиҥинэн, ити федеральнай сири категориятын, бас билиитин уларытааттарын кытары сир тыырыытын боломуочуйатын тута мээрийэҕэ биэрбиттэрэ буоллар, бэлиэр элбэх ыал сирдэнэн, дьиэлэнэн-уоттанан олорон эрэр буолуох этэ.

Мин, сири түҥэтии боломуочуйатын тоҕо олохтоох дьаһалтаҕа бэриллибэтий диэн депутаттар мунньахтарыгар элбэхтик ыйытан да, боппуруоһу туруоран да көрбүтүм. Онон, ити сир да тыырыытыттан сылтаан мээри уларытар хамсааһын саҕаламмыт эмиэ буолуон сөп. Туох да баһаам, тыһыынчанан суотай сир тыырыллаары турар дии. Кимнээх-кимнээх ылаллар дьэ.

-Сөп, махтал. Салгыы репортажкын күүтэбит.

***

Телеграм-канал @Aartyk.ru:

“Главред газеты “Туймаада”, депутат гордумы Якутска Александр Яковлев был задержан во время несанкционированного митинга 23 января. Его повязали при исполнении профессиональных обязанностей и повезли вместе с задержанными оппозиционерами в 2 ГОМ. Репортаж «с петлей на шее» местного Ю. Фучика читайте в газете “Туймаада”.😅”.

***

Aartyk.Ru