Курс валют
$
87.3
0.48
95.46
0.3
Курс валют
Курс валют
$
87.3
0.48
95.46
0.3
Меню
Поиск по сайту

“КЫМЫС -АЙЫЫ АҺА-2024” бэстибээл түмүктэрэ

02.07.2024 (4 недели назад) 16:29 0
“КЫМЫС -АЙЫЫ АҺА-2024” бэстибээл түмүктэрэ

Быйыл Туймаада ыһыаҕар үгэс быһыытынан  киэҥ далааһыннаахтык тэрилиннэ. Ол курдук өрүү буоларын курдук быйылгы ыһыахха олус элбэх киһи ыалдьыттаата. Биир уратыта диэн быйылгы ыһыаҕы кытта тэҥҥэ «Азия оҕолоро» оонньуулар буола турар буолан атын регионнартан, республикалартан оонньууларга кытта кэлбит оҕолор, ону тэҥэ элбэх ыалдьыт сылдьан бу тэрээһин далааһыннааҕын сөҕө-махтайа көрдүлэр.

Куорат олохтоохторугар уонна ыалдьыттарга анаан сүүһүнэн культурнай программа бэлэмнэнэн бары дуоһуйа сынньаннылар. Бу программалар иһигэр «Кымыс – айыы Аһа»диэн сэттис төгүлүн кымысчыттар бэстибээл-куонкурустара ыытыллан ыһыаҕы олус киэргэттэ.

Быйылгы бэстибээлгэ уонтан тахса кыттааччы кэлбит. Бэстибээлгэ кыттар хаһаайыстыбалар истэригэр Хаҥаластан, Намтан, Амматтан, Мэҥэ Хаҥаластан, Тааттаттан, Горнайтан, Уус Алдантан уонна Дьокуускай куораттан кэпэрэтииптэр, бааһынай хаһаайыстыбалар кытыннылар. Онон кыттааччы ахсаана элбиириттэн көрдөххө  кымыс кыынньарыыга интэриэс улаатан иһэр эбит. 

Бэстибээли саҕаланыаҕыттан Дьокуускай куорат дьаһалтата, онтон салгыы хаһыс да сылын “Туймаада” Агрохолдинг тэрийэн ыытар. Бу тэрээһини киһи үөрүөх Благовещенскайтан «Амурагроцентр» компания спонсордаата. Сахалар төрүт аспыт сөргүтүллэн сайдарын туһугар атын регионтан кэлэн көмөлөһөллөрө олус хайҕабыллаах. Манна бэйэбит хампаанньаларбыт кэлэр өттүгэр кыттыһан төрүт аһылыкпытын оҥоруу сайдыа диэн эрэниэххэ сөп.

Быйылгы бэстибээлгэ кимнээх кыайыы кынаттанан дойдуларыгар бардылар? Дьэ ол маннык:

1 миэстэ – Хаҥалас улууһуттан «Улахан Алаас» – баһылык Лиханов М.П

2 миэстэ –“Тумарык” бааһынай хаһаайыстыба, Мэҥэ Хаҥалас – баһылык Васильев А.П.

3 миэстэ-«Бөртө сылгы собуота» ХЭТ – дириэктэр Павлов А.В.

Итини таһынан бэстибээлгэ биэс номинацияҕа хаһаайыстыбалар күрэхтэстилэр:

Кымыһы оҥоруу бастыҥ көрдөрөөччүтэ«Кыһыл Кулаада»ИП ГКФХ– баһылык Варламов П.И.

Кымыс оҥоруу үгэстэрин тутуһуу – ИП КФХ «Федоров В.И.» Горнай улууһа, Бэс Күөл.

Быыстапка миэстэтин киэргэтии – “Эйгэ” КФХ – баһылык Васильев П.П.Дьокуускай.

Кымыс оҥорооччулар династиялараИП КФХ Турантаева М.П.Уус Алдан. Бээрийэ.

Кымыһы дэлэйдик оҥорон батарыыСППК «Амма», Амма улууһа.

Бэстибээлгэ элбэх ыалдьыт сырытта. Кинилэр истэригэр соҕурууттан элбэх учуонайдар, хампаанньалар салайааччылара уонна бэрэстэбиитэллэрэ ыалдьыттаатылар. Араас кымыһы боруобалаан сыана быстылар.

Бэстибээлгэ  Саха Өрөспүүбүлүкэтин Ил Дархана А.С. Николаев  кэлэн кымысчыттар түһүлгэлэригэр сылдьан, куонкурус кыттыылаахтарын кытары көрүстэ, кэпсэттэ. Онон бу хайысха сайдарыгар кини суолта биэрэрэ көһүннэ.

Манна өссө биири бэлиэтиэххэ наада: бэстибээл аҥардас куонкурус эрэ быһыытынан барбата, манна төгүрүк остуол, араас тэрээһиннэр ыытыллыбыттарын түмүгэр өрөспүүбүлүкэ кымысчыттарын үлэлэрин сайдыытыгар өссө биир хардыы оҥоһулунна. Дьэ онон бу бэстибээл тыа хаһаайыстыбатын салаатыгар өссө биир көрүҥ, төрүт былыргы үгэспит кымыс оҥоруу сөргүтүллэн сайдарыгар кыах тосхойуо диэн эрэнэ хаалабыт.

***

Прокопий ХАБАРОВ,

“Туймаада” агрохолдинг.

Оставить комментарий