Ийэ күнүнэн!

Күндү Сахабыт сирин ийэлэрэ!

Саха Өрөспүүбүлүкэтин Ил Түмэнэ эһигини Ийэ күнүнэн итиитик-истиҥник эҕэрдэлиир!

Үйэ чиэппэрэ анараа өттүгэр Сахабыт сиригэр Ийэ күнүн бэлиэтиир үтүө үгэс олохтонуоҕуттан, алтынньы үһүс өрөбүлүгэр биһиги ийэлэрбитин чиэстиибит, барҕа махталбытын биллэрэбит.

Хас биирдиибитигэр саамай чугас, күндү киһибит ийэбит буолар. Ийэ күн сирин сырдыгын бэлэхтиир, олохпут инникитин түстүүр, омукпут ахсаанын элбэтэр аналлаах. Кини амарах санаатынан, аһыныгас дууһатынан, сымнаҕас майгытынан дьиэ кэргэнин араҥаччылыыр, оҕолорун бүөбэйдиир, барыбыт туһугар кыһаллар. Ийэ үрдүк аатыгар биһиги мэлдьи сүгүрүйэ, киниэхэ дурда-хахха, көмөлөһө сылдьар ытык иэстээхпит.

Ил Түмэн дьиэ кэргэн, ийэ буолуу уонна оҕо аймах сокуонунан өйөбүллээх буолуутугар утумнаах үлэни ыытар. Ийэлэргэ араас социальнай чэпчэтиилэр, ийэ хапытаала көрүллэр. Өрөспүүбүлүкэҕэ ийэ уонна оҕо доруобуйатыгар улахан болҕомто ууруллар, кэлиҥҥи сылларга оҕо төрөөһүнэ элбиир. Саха сирин парламена дьиэ кэргэн статуһун үрдэтиигэ, эдэр ыаллары, ийэлэри өйөөһүҥҥэ сөптөөх дьаһаллары ылыныыга, сокуоннары тупсарыыга салгыы үлэлэһиэҕэ.

Күндү ийэлэрбит, эһиги чугас дьоҥҥут истиҥ сыһыаныгар, оҕолоргут, сиэннэргит тапталларыгар, ситиһиитигэр угуттанан, уһуннук, дьоллоохтук олоруҥ, доруобай буолуҥ, чэгиэн туруктаныҥ!

***
Саха Өрөспүүбүлүкэтин Ил Түмэнэ