Үөһээ Бүлүү улууһугар «200 тыһыынча сибэкки» диэн акция саҕаланна

Тустаах дьаһалы Үөһээ Бүлүү бөһүөлэгин баһылыга Николай Николаев бу кыһын таһааран турар.

Акция иһинэн улууска үлэлиир-хамсыыр бөдөҥ, дьоҕус тэрилтэлэр территориялары үллэстэн сибэкки арааһын олордоллор, сайын устата онтуктарын көрө-истэн бүөбэйдииллэр.

Дьон-сэргэ акцияны сэргээн, көхтөөхтүк ылыстылар. Ол курдук, Владимир Поскачин салайааччылаах улуус дьаһалтатын үлэһиттэригэр биирдии бэйэлэригэр 50 сибэкки араскыта тигистэ. Эр дьон, сүрүннээн, кэрэ аҥардарга илии-атах буолаллар, иһиттэрин оҥорон бэлэмнииллэр.

Манна даҕатан эттэххэ, бу иһиттэр интернеттэн көрөн, үтүктэн араас аныгы ньыманнан оҥоһуллуннулар. Коллектив барыта кыттыһан оҥорор буолан, бэйэтэ биир туспа түмэр, сэргэхситэр тэрээһин буолан таҕыста.

Маны тэҥэ, тэрилтэлэр субуотунньуктарга тахсан сирдэрин бэлэмнииллэр, бөҕү-сыыһы ыраастаан нэһилиэк тас көстүүтүн тупсараллар.

Бу курдук Үөһээ Бүлүү тэрилтэлэрэ атын улуустарга үтүө холобур буолаллар, «200 тыһыынча сибэкки» акция5а бары көхтөөхтүк кыттыһын диэн Үөһээ Бүлүү улууһун олохтоохторо ыҥыраллар.

***

Анна МИХАЙЛОВА,

Aartyk.Ru