Турбаза хаһаайына Ньургустаан Бысыин:
– Турбазаны ааспыт сыл от ыйын ортотугар аспыппыт. Урут манна суол оҥорооччулар базалара баара, хараҥаччы уйатыгар майгынныыр быһыылаах уонна Развилка анараа өттүгэр маннык ааттаах сир баар. Турбаза арыйарбытыгар министиэристибэ 250 тыһ. солкуобайы үбүлээн көмөлөспүтэ уонна аҥаара бэйэбит харчыбыт. Кэргэмминиин үлэлиибит, оҕолорбут кэлэ-бара көмөлөһөллөр. Үс юрта быһыылаах уонна купол балаакка, үлэлиир дьиэбит, туалет баар. Билигин балаакканы, турар миэстэтин, иһити-хомуоһу, мангаллары арендалыыбыт, вай-фай баар. Кэлин хапытаалынай тутуулаах дьиэлээх глемпинг, кемпинг оҥоруохпутун баҕарабыт. Баҕа баһаам, үп харчы эрэ наада. Уу баар, баанньык тутуохпут. Туристары онно-манна илдьэр өҥө оҥорбоппут. Дьиэ кэргэнинэн сынньанарга диэн тэриммиппит. Урбаан министиэристибэтэ өйөөн грант биэрэрэ буоллар салгыы сайдыа этибит.
Сардаана Саввина:
– «Ласточкино гнездо» диэн, аатын курдук, хайа быыыһыгар сынньанарга бэрт бүччүм, үчүгэй сир эбит. Олус табыгас таах сиргэ турар. Хонорго усулуобуйа бэрт эбит – оһохтоох, тэллэхтээх, остуоллаах, олоппостордоох түөрт балаакка. Ыалдьытымсах хаһаайын Ньургустаан Бысыин үөрэ-көтө көрүстэ, чэйдэттэ, турбазатын туһунан ирэ-хоро кэпсэттибит. Ордук астына көрбүппүт диэн – турбазаны төгүрүччү хайалар! Таас хайалар тулалыыллара көрүөхтэн кэрэ көстүү! Онон уһун айантан дуоһуйа сынньанарга «Хараҥаччы уйата» –бэртээ хэй сир! Айылҕалыын алтыһа манна кэлэн мааны ыалдьыт буолуҥ!
Анна Стручкова:
– От ыйын 26 күнүгэр биһиги сэттэ киһилээх бөлөхпүт «Ласточкино гнездо» турбазаҕа ыалдьыттаатыбыт. Биһигини турбаза хаһаайына үөрэ-көтө көрүстэ. Турбаза трассаттан 200 м тэйиччи кыраһыабай, көнө, киһи кута-сүрэ тохтуур сиргэ турар эбит. Түөрт юрта курдук быһыылаах, иһирдьэ оттуллар кыра оһохтоох, остуоллаах, олоппостордоох балааккалар ыалдьыттары күүтэллэр. Сынньанарга туох баар усулуобуйа баар эбит диэн астына көрдүм.
Татьяна Гоголева:
– «Ласточкино гнездо» наһаа үчүгэй сиргэ турар эбит. Тула өттө эргиччи кэрэ көстүүтэ киһини сөхтөрөр, уу чуумпуга үрэх тыаһа бэйэтэ туспа музыка. Наһаа үчүгэйдик көрүстүлэр. Вай-фай баара наһаа үчүгэй. «Ласточкино гнездо» өссө да сайда, үүнэ турдун. Элбэх ыалдьыттары көрсөн, дьон махталын ыллын! Душ, беседка, хачыал баара буоллар, гирлянда ыйаннар диэн баҕа санаабытын эттибит.
***
Оставить комментарий