«ТУЙМААДА АГРОХОЛДИНГ» АУоТЭРИЛТЭЛЭРИН ҮЛЭЛЭРИН УОННА ИННИКИ ӨТТҮГЭР САЙДАР БЫЛААННАРЫН ТУЛА ТӨГҮРҮК ОСТУОЛ ЫЫТЫЛЫННА

Сэтинньи 20 күнүгэр СӨ ГМ Ил Түмэн тыа сиригэр уонна аграрнай бэлиитикэҕэ кэмитиэтэ “Туймаада”Агрохолдинг аахсыйалаах уопсастыба тэрилтэлэрин үлэлэригэр туһаайыллыбыт уонна кинилэри инники өттүгэр сайыннарыы туһунан төгүрүк остуолу тэрийэн ыытта. Манна төгүрүк остуол кыттыылаахтара тэрилтэ инники сайдыытыгар турар боппуруостарга тохтоон дириҥ дьүүллэһии ыыттылар.

Мунньаҕы СӨ ГМ Ил Түмэн тыа сиригэр уонна аграрнай бэлиитикэҕэ кэмитиэт бэрэссэдээтэлэ Александр Атласов салайан ыытта. Тэрээһиҥҥэ норуодунай депутаттар, өрөспүүбүлүкэ  Бырабыытылыстыбатын, баайга-дуолга уонна сир сыһыаннаһыыларыгар министиэристибэ, СӨ Счетнай палаататын, «Туймаада» Агрохолдинг АУо бэрэстэбиитэллэрэ кыттыыны ыллылар.

«Ааспыт сыл кулун тутар ыйыгар манна Ил Түмэн 6-с ыҥырыылаах мунньаҕын тыа сиригэр уонна аграрнай бэлиитикэҕэ кэмитиэтин бэрэссэдээтэлэ Андрей Находкин салайыытынан төгүрүк остуол ыытыллыбыта. Онно СӨ Бырабыытылыстыбатыгар уонна тыа хаһаайыстыбатын уонна ас-үөл бэлиитикэтигэр министиэристибэҕэ туһаайыллан резолюция ылыллыбыта. Онтон аҥаара туолбута, сорох боппуруостар билигин да быһаарылла сылдьаллар»,-диэн этиинэн Александр Атласов мунньаҕы арыйда.

«Туймаада» Агрохолдинг хаһан тэриллиэҕиттэн үлэтин саха сирин агропромышленнай комплексын уонна тыа хаһаайыстыбатын сайдыытыгар туһаайыллыбыт судаарыстыбаннай бэлиитикэни олоххо киллэриигэ туһаайар. Агрохолдиҥҥа киирэр тыа хаһаайыстыбатын тэрилтэлэрэ ынах сүөһү, сылгы , көтөрү иитиинэн, үүнээйинэн дьарыктанан олохтоох бородууксуйаны астаан-үөллээн таһааран киэҥ үлэни ыыталлар.Бородууксуйа өрөспүүбүлүкэ эрэ нэһилиэнньэтин биһирэбилин ыларын таһынан, ыаллыы эрэгийиэннэргэ эмиэ биллэр.

«Туймаада» ФАПК АУо үпкэ-харчыга дириэктэрэ Ольга Гудуева этэринэн хампаанньа үлэтин биир сүрүн хайысхатынан үүтү оҥоруу салаата буолар. Бу салаа экэниэмикэ да, социальнай да хайысхаларга суолтата олус улахан.

«Төһө да судаарыстыба өйөбүлэ баарын үрдүнэн кэлиҥҥи сылларга бу хайысха сайдыытыгар бытаардар көстүүлэр үөскүүр балаһыанньалара баар буолуохтарын сөбө бэлиэтэнэр буолла. Сүрүн  кыһалҕа – сүөһү аһылыга ситэтэ суоҕар сытар. Ордук иҥэмтиэлээх аһылык. Ол да иһин Агрохолдинг тэрилтэлэрэ аhылык баазатын тэрийиигэ былааннаах үлэ ыыталлар. Ол курдук Өлүөхүмэ улууһугар «Өлүөхүмэ кыладабыайа» ХЭТ баазатыгар сүөһү аһылыгын киинин тэрийиигэ этии оҥоробут. Бу киин сүөһүнү аһылыгынан хааччыйыы боппуруостарыгар экэниэмийэ да, хаачыстыба да боппуруостарын быһаарыыга инники хардыылааһын буолуо», – диэн Ольга Гудуева бэлиэтиир. Кини этэринэн көтөрү иитиинэн икки тэрилтэ-«Эко-Птица» ХЭТ уонна «Новай» сопхуос АУо дьарыктаналлар. Эко-Птица тэрилтэтэ Нерюнгритээҕи көтөрү иитэр фабрика харчы-үп өттүнэн чэбдигирдии өрөспүүбүлүкэ бырабыытылыстыбатын бырагыраамматын олоххо киллэриигэ олоҕуран тэриллибит. Итини таһынан Ольга Гудуева 1986 с. тэриллибит Хатастааҕы сибиинньэни иитэр комплекска тохтоон бу тэрилтэ бырамыысылыннай төрүккэ олоҕуран үлэлиир өрөспүүбүлүкэҕэ биир улахан тэрилтэ буоларын бэлиэтээтэ.

Мунньах кыттыылаахтара ити этиллибит этиилэри ылынан туран тыа хаһаайыстыбатын эбийиэктэрин тутуу, хааччыйыы рентабельноһын үрдэтии мэхэниисимнэрин толкуйдаан оҥоруу наадатын ыйдылар.

«Биһиги ааспыт төгүрүк остуолга этии быһыытынан маннык пууну киллэрэн турардаахпыт: «Туймаада» ФАПК АУо уонна «Туймаада» Агрохолдинг АУо улахана суох актыыптарын муниципальнай бас билиигэ биэрии мэхэниисимнэрин оҥоруу, ол иһигэр бу баайы-дуолу биэриигэ тахсар ороскуоттарын төннөрүүнү көрүү. Дьэ бу мэхэниисимнэрин чопчулаан оҥорон олоххо киллэриигэ үлэлэһиэххэ», – диэн Александр Атласов этии киллэрдэ.

Төгүрүк остуол түмүгүнэн мунньах кыттыылаахтарын этиилэринэн түмүк резолюция оҥоһулунна.

***
Ил Түмэн пресс сулууспата таһаарбыт матырыйаалларынан