«ТУЙМААДА» АГРОХОЛДИНГ ПРОИЗВОДСТВЕННАЙ ТИҺИГИН САЙДЫЫТЫН СТРАТЕГИЯТА» КОНФЕРЕНЦИЯ САҔАЛАННА

“Туймаада” Агрохолдинг сылын аайы ыытар конференцията бу ый 14-18 күннэригэр ыытыллар. Быйылгы сылга конференцияҕа уонтан тахса Россия араас регионнарыттан учуонайдар, улахан тэрилтэлэр салайааччылара уонна Саха республикатын биллэр учуонайдара, специалистара кыттыыны ылаллар.

Тэрээһин бастакы күнүгэр 4 сиринэн миэстэтигэр сылдьан практическай семинардар ыытыллан агрохолдинг хаһаайыстыбаларын, тэрилтэлэрин үлэһиттэрэ элбэх саҥаны билистилэр. Ол курдук Нерюнгрига көтөрү иитэр фабрикаҕа, Хатастааҕы сибиинньэ иитэр комплекска, “Туймаада Экоферма” икки хаһаайыстыбатыгар тустаах специалистар, учуонайдар сылдьан билиҥҥи кэмҥэ  сиилэс, сенаж бэлэмнээһинин, сүөһүнү аһатыы технологияларын билиһиннэрэн тэрилтэ специалистара, үлэһиттэрэ элбэҕи биллилэр.

Биир оннук тэрээһин Дьокуускай куорат аттыгар Мархаҕа баар “Туймаада Экоферма” ферматыгар буолла. Манна искусственнай сиэмэлээһин технологиятын “Сахаагроплем” ГБТ специалиһа Татьяна Андреевна Протопопова көрдөрөн туран бэрт ылыннарыылаахтык кэпсээтэ. Ынаҕы искусственнай  сиэмэлээһин барыстааҕын агрохолдинг үлэһиттэрэ бэркэ билэллэр.

Билигин агрохолдиҥҥа киирэр хаһаайыстыбалар бары кэриэтэ искусственнай сиэмэлээһиҥҥэ киирэн олороллор. Ол түмүгэр сорох хаһаайыстыбалар, чуолаан “Кладовая Олекмы” ХЭТ ынах төрөөһүнүн былааннаахтык тэрийэр кыахтаммыт, үүт ыама сылтан сыл аайы үрдүү турар. Бу тэрилтэ сорох ыанньыксыттара бэйэлэрэ көрөр ынахтарыттан хас биирдиилэриттэн 4000 тиийэ киилэ үүтү ааспыт сыл түмүгүнэн ыатылар. Онтон “Бөртө” сылгы собуотун ыанньыксыттара хас биирдии ынахтарыттан үүт ыамын 3000 тириэртилэр, “Туймаада Экоферма” Мархатааҕы ферматын ыанньыксыттара 2800 киилэни ыабыттар. Уопсайынан “Туймаада Экоферма” үрдүнэн 3200 киилэ ыаммыт.

Саҥа төрөөбүт ньирэйи, торбоһу аһатыы технологиятын, аһылык көрүҥнэрин көрдөрөн туран быһааран иһитиннэрии олус интэриэһинэйдик барда. Манна Новосибирскайтан сылдьар тэрилтэ салайааччыта Наталья Викторовна Митюкова ньирэй төрөөтүн кытта ханнык аһылыгынан аһатары, киниэхэ хаһыс күнүттэн атын ханнык аһылык көрүҥнэрин биэриэххэ сөбүн туһунан кэпсээбитэ улахан сэҥээриини ылла. Биллэн турар үлэһиттэр бары билэллэр: үүттээх, доруобай сүөһүнү үөскэтиэххин баҕарар буоллаххына кинини төрөөтүн кытта көрүү-харайыы, аһатыы сүрүн оруолу ылалларын. Түмүгэр специалистар элбэх ыйытыыларга сиһилии быһаарыы биэрдилэр.

Салгыы кулун тутар 16 күнүгэр агротехнологическай университет аактабай саалатыгар конференция сүрүн мунньаҕа буолар.

***

Прокопий ХАБАРОВ