Торгово-экономическай колледжка Иннокентий Тарбаахап саҥа дьыллаҕы маастар-кылааһа ыытылынна

Ахсынньы  туманнаах аам-даам тымныы күннэрин киэргэтээри К.О. Гаврилов аатынан Дьокуускайдааҕы Торгово-экономическай колледжка күүтүүлээх Иннокентий Тарбаахап саҥа дьыллаҕы маастар-кылааһа ыытылынна.

Маастар-кылаас сүрүн  бүлүүдэтинэн  саха маанылаах аһыттан — убаһа этиттэн стейк,  каре уонна клярга буккулубут ойоҕос буоллулар. Ыалдьыттар бүлүүдэ буспутун кэннэ дегустациялаатылар. Амсайан баран олус биһирээтилэр, дьиэлэригэр хайаан да оҥостуох буоллулар.  Иннокентий Тарбаахап остуол тула олорор дьону-сэргэни кытта кэпсэттэ, авторскай бүлүүдэлэри астыыр ньыма кистэлэҥнэрин арыйда, араас боппуруостарга  хоруйдаата.

“Иннокентий Иннокентьевич Тарбахов маастар-кылаас  ыытарын истэн тутатына суруттара о5устум. Тэрээһин урут мин үөрэммит техникуммар буолла. Бу колледж уруккута “Кооперативнай техникум” диэн этэ. Торговай училищены  мин 1979 сыллаахха үөрэнэн бүтэрэн тахсыбытым.Оруобуна чоп курдук 40  сылыгар аны өссө биир үөрэх сертификатын ылан үөрэн кэллим. Түөрдүөн сыл буолан баран иһигэр киирэн эдэр сааспын санаан аастым. Иннокентий  Тарбаховка улахан махталбын тиэрдэбин” – диэн сылдьыбыт ыалдьыт үөрүүтүн үллэстэр.

Ол курдук, сүүрбэччэ дьиэ хаһаайката биллиилээх асчыттан сүбэ-ама ыллылар, астыыр ньымалары ырыттылар. Саҥа дьылга чугас дьоннорун сонун аһынан, авторскай бүлүүдэнэн күндүлүүр буоллулар.

***

Aartyk.RU