Эрдэттэн биллэриитэ, угуйуга барбыт буолан Сунтаар үрдүнэн мяснойдар аһыллаллар үһү эбээт диэн сурах тарҕаммыта ыраатта. Ол быыһыгар мин эмиэ сылдьыбыт, бэлэх ылбыт киһи диэн кичэмэ санаалаах этим. Бэҕэһээ киһи аайы кэпсэл, үгуйук бөҕө буолбутум.
Онтоон, бүгүн отой умнан кэбиспиппин. Сааскылыы чаҕыл күн тыкпытыттан үөрэн скандинавскай тайахтарбын тутан хаама таҕыстым. Көнө асфальт суолунан аргыый хааман “Татыйыынам” аттыгар кэлбитим доҕоор, суол утары, киһи, массыына үллэҥнэс. Тута лааппы аһылларын саныы оҕустум, били 3000 сууммаҕа атыыластаххына бэлэх диэн эмиэ күлүм гынна. Мин да уулуссаны туораан тиийдим. Уонча мүнүүтэ баар, киһи хойуу. “Норд Хауска” киирэн олорон күүттүм. Аһыллыыны туораттан көрдүм. Урут уруккуттан сунтаардар үс буоллулар да анньыһаллар диэн көр – күлүү этии суох буолбут. Бары дьоһуннаахтык, саҥа лааппы аһылларыттан үөрэн хотоҕостуу субуһан киирдилэр. Өссө биир эдэр эр киһи “Баһаалыста , аас”- диэн ааны тутан миигин киллэрдэ.
Иһирдьэ лааппы хотуна Анна Михалева саҥыйахтаах алаадьынан үөрэ – көтө айах тута көрүстэ.
3000 сууммалаах арыы арааһын талбыппын касса аттыгар аҕала охсон уурдулар. Икки касса тэҥинэн үлэлиир, уочарат олох сылбырҕатык ааһан иһэр. Уочаратым кэлбитигэр сып – сап төлөөтүм , өссөөө баҕалаах бадааракпын тутан үөрүүм үрдээтэ. Олус элбэх тииһимньилээх бэлэх оҥорбуттар, ити мин кэнники наҕылыччы киирбит киһи тиксиэхпэр дылы. Манна баар: плитка сакалаат, эриллибит эт, томточчу фрикадельки . Уочараппыт син – биир күлүүтэ суох буолбата. Мин иннибэр биир аһара хаһаайыстыбаннай көрүҥнээх эр киһи, 3000 иһигэр сатаан суоттаабакка үстэ кырынан атыылаһан , баҕалаах бадаарагын бобуччу тутан, алгыс ааттааҕын анаан таҕыста.
Мин атыылаһа охсон, өссө бэлэх – туһах тутан, скандинавскай тайахпынан далбаатанан аны дьону дэҥниэм диэн сэрэнэн таһырдьаны былдьастым. Аара кэлэн иһэн балаҕаммар туораан “Харысхалларбын” кытта үөрүүбүн үллэһинним,таарыйа бахилла кырыйдым. Онон күнүм үчүгэйдик да саҕаланна.
Бу олоххо этэргэ дылы аһаары үлэлиибит, үлэлээри аһыыбыт. Онон олох туллар тутааҕа, ас –үөл лааппыта, уруккугут курдук тахсыылаахтык үлэлээҥ, кэҥээҥ, сайдыҥ!
***
Зинаида Федотова Дьол Кыыма
Оставить комментарий