СУНТААРГА КЫТААНАХ БӨҔҮ ХОМУЙУУГА ҮЛЭ БЫЛААНЫН ТОРУМНААТЫЛАР

Сунтаар улууһугар кытаанах коммунальнай бөҕү-сыыһы хомуйуунан, харайыынан дьарыктаныахтаах «Мииринэйдээҕи олох-дьаһах хаһаайыстыба тэрилтэтэ» региональнай операторынан анаммыта. Бүгүн буолбут сүбэ мунньахха оройуон киинигэр бөҕү тоҕор сири быһаарыы, уопсай дьиэлэр, оскуолалар тастарыгар контейнердары туруоруу, бөҕү наардааһын боппуруостара көрүлүннүлэр.

Өссө бу саас муус устар 11 күнүгэр Сунтаар улууһугар кытаанах коммунальнай бөҕү-сыыһы хомуйуунан, харайыынан дьарыктаныахтаах региональнай операторынан анаммыт «Мииринэйдээҕи олох-дьаһах хаһаайыстыба тэрилтэтэ» ХЭУо дириэктэрэ Василий Трушков кыттыылаах сүбэ мунньаҕа буолан ааспыта. Онно улууска кытаанах коммунальнай бөҕү-сыыһы хомуйууга үлэ саҥа механизмыгар хайдах киирэр туһунан кэпсэппиттэрэ.

Билигин улууска бу хайысхаҕа үлэ барар. Контейнердар ханна туруохтаахтара быһаарыллар. Бүгүн буолбут сүбэ мунньахха оҥоһулла сылдьар Сунтаар нэһилиэгин саҥа генеральнай былааныгар киллэрэр наадалааҕа этилиннэ. Бөҕү-сыыһы тоҕорго аналлаах сир учаастагын докумуоннуу охсор тоҕоостоох. Билиҥҥитэ Сунтаар улууһун 11 нэһилиэгэр эрэ анал сир учаастага көрүллүбүт. Санатар буоллахха улууска 26 нэһилиэк баар.

Сүбэ мунньаҕы Сунтаар улууһун баһылыгын бастакы солбуйааччы Николай Александров ыытта. Манна тустаах тэрилтэ салайааччылара, Сунтаар нэһилиэгин баһылыга Эдуард Филиппов, улуус кылаабынай архитектора Иван Николаев о.д.а. кыттыыны ыллылар.

Бу боппуруос СӨ Ил Дархана Айсен Николаев тус хонтуруолугар баар. Барыахтаах үлэ былаана торумнанан турар.

***

Ааптар: Гаврил АНДРЕЕВ,

“Сунтаар Сонуннара” хаһыат