Сунтаарга “Кэскил” киин сэрэтэр үлэҕэ төгүрүк остуолу тэрийдэ

Олох араас очурдарыгар түбэһэн, сыыһа суолу батыһыы, сиэрэ суох быһыыланан буруйу оҥоруу, ийэ, аҕа быраабыттан быһыллыы түбэлтэлэрэ саамай ыараханнык, биллэн турар, оҕоҕо дьайаллар. Уустук балаһыанньаҕа түбэспит киһиэхэ бэйэтигэр уонна дьиэлээхтэригэр өрүттэн, этэҥҥэ буолалларыгар туһааннаах тэрилтэлэри сэргэ уопсастыбаннай сэбиэттэр, түөлбэлэр о.д.а. бары биир ситимнээх үлэҕэ сылдьаллар.

Сунтаардааҕы «Кэскил» сокуоннай саастарын туола илик оҕолору реабилитациялыыр киин үлэтин хайысхатынан буруйу оҥорууну сэрэтиигэ саҥа суоллары тобуларга күннэтэ үлэлэһэр. Бу үлэҕэ туһаайан оҕолоох дьиэ кэргэҥҥэ туох эмэ кыһалҕаттан, мүччү туттаран, буруйу оҥоруу тахсыбатын туһугар сэрэтэр үлэни уонна эбии саҥа ханнык хайысханы тутуһуохха сөбүн санаа атастаһыылаах төгүрүк остуолу тэрийдэ. Киин стационарнай отделениетын сэбиэдиссэйэ Людмила Пустолякова 2020 сылааҕы үлэ түмүгүттэн иһитиннэрдэ. Салайааччы Альбина Прокопьева: «Улууска сокуоннай саастарын ситэ илик оҕолор өттүлэриттэн сокуону, бэрээдэги кэһии тахсыбатын туһугар биир ситимнээх араас хабааннаах үлэ барар да, үчүгэй түмүк тахсыбат. Оҕо, төрөппүт өттүттэн эппиэккэ тардыллар түгэннэр тахса тураллар. Онон дьиэ кэргэттэри уонна оҕолору кытары үлэҕэ эрдэттэн сэрэтэр үлэни ыытарга «Дьиэ кэргэн социальнай пааспарын» улууска баар 3-18 сааһыгар диэри оҕолоох дьиэ кэргэттэргэ оҥорорбут буоллар, туох баар дьиэ кэргэттэр кыһалҕаларын эрдэттэн булан үлэлэһэрбитигэр үгүс боппуруостары быһаарыа этэ” диэн этэн туран, тэрээһин кыттыылаахтара бэйэлэрин санааларын үллэстэллэригэр ыҥырда.

Төгүрүк остуол кыттыылаахтара бу этиини туох баар механизмнарын үөрэтэн, олоххо киллэрдэххэ, биир сорукка үлэлиир араас эйгэ дьонун быһыытынан үлэлэригэр көмөлөөх буолуоҕун эттилэр. Ону тэҥэ сэрэтии үлэтигэр өссө ханнык саҥа ньымалары, технологияны туһаныахха сөбүн сүбэлэһэн резолюция ылыннылар. Кэскиллээх кэпсэтиини түмүктүү ыкса үлэлэһэр, арыт түүнү-күнүһү аахсыбакка үлэ үөһүгэр сылдьааччылары киин үлэһиттэрэ соһуччу бэлэҕинэн үөртүлэр. СӨ Үлэ уонна социальнай сайдыы министиэристибэтиттэн Сунтаардааҕы ИДьО ПДН инспекторыгар Наталья Бурнашеваҕа Махтал сурук туттарылынна. Маны тэҥэ «Кэскил» киин бэйэтин Махтал суруктарын «ТУСКУ» ТОС салайааччыта Валентина Аммосоваҕа, «Матери России» улуустааҕы отделениетыгар, опека уонна попечительство отделын салайааччытыгар Гульнара Трифоноваҕа, Ыччаты уонна дьиэ кэргэни өйүүр социальнай-психологическай киин үрдүк категориялаах психологар Ольга Степановаҕа, «Партизан» НАТК дириэктэрин солбуйааччы Жанна Макароваҕа, “Дархан” кинотеатр салайааччытыгар Денис Трофимовка уонна нарколог-быраас Светлана Новгородоваҕа анаата. Төгүрүк остуолга кэлбит эр дьону киин үлэһиттэрэ кэлэн иһэр бырааһынньыгынан эҕэрдэлээн туран, илии тутуурдаан ыыттылар. Оттон киин салайааччытыгар Альбина Афанасьевнаҕа улуус баһылыга А.В.Григорьев илии баттааһыннаах Махтал суруга туттарылынна.

2021 сыл Сунтаар улууһугар Үтүө дьыаланы оҥорооччу сыла. Манан сиэттэрэн уопсастыбаннай үлэ өссө таһаарыылаах, күргүөмнээх буолара эрэйиллэр.

Ааспыт хааччахтааһын сылыгар волонтердар күүстээх үлэлэригэр сүгүрүйэн, бу Үтүө дьыала сылыгар анаан В.Федотова-Дьол Кыыма тылларыгар Людмила Пустолякова матыыбыгар, бэйэтин толоруутугар «Үтүөкэн дьоннорго» диэн саҥа ырыа сүрэхтэниитинэн тэрээһин түмүктэннэ.

***

Юлия АЛЕКСЕЕВА