Сунтаар улууһугар ийэлэргэ анаммыт ый сэргэхтик ааста

Сунтаар улууһугар күндү күн күбэй ийэлэрбитигэр анаммыт ыйга араас хабааннаах үтүө тэрээһиннэринэн тэриллэн бэрт сэргэхтик ааста.

Ол курдук, бэлиэтээн этэр буоллахха «Илиибин уунабын эйиэхэ» аһымал акция, эдэр ийэлэрбит эмтэнэ баралларыгар хас нэһилиэк аайыттан үбүнэн көмөлөһөн көмө оҥоруу, улууспут дьоно-сэргэтэ күннээҕи түбүктээх үлэ чааһын кэнниттэн доруобуйаларын көрдөрүнэллэригэр «Вечер здоровья» анал күннэр тэриллиннилэр, Сунтаардаары «Матери России» салаата ийэлэргэ уонна кыргыттарга нэһилиэктэринэн сэргэх тэрээһиннэри тэрийдилэр, «Мир женщин» Сахабыт Сиригэр Сомоҕолоһуу сылыгар анаммыт Сунтаар нэһилиэгин тэрилтэлэрин бииргэ үлэлэһиилэригэр ананан ыытылынна.

Сэтинньи 19 күнүгэр, ытык-мааны ийэлэрбитин чиэстиир үөрүүлээх түгэҥҥэ Сунтаар улууһун Аҕа баһылыга Анатолий Григорьев таһаарыылаах үлэлэрин, улууспут сайдыытыгар бэйэлэрин үйэлээх кылааттарын киллэрсибиттэрин, төрөппүт оҕолорун үтүө дьон гына иитэн төрөөбүт дойдуларын үрдүктүк тута сылдьалларын иһин Сунтаар улууһун «Ытык Ийэ» бэлиэлэри туттарда. Тэрилтэлэр коллективтарыгар дьиэ кэргэҥҥэ уонна уопсастыбаҕа Ийэ оруолун үрдэтиигэ, Сунтаар улууһун сайдыытыгар тус кылааттарын иһин махтал суруктар ананнылар.

Күн күбэй ийэлэри үҥкүүннэн-битииннэн, ырыаннан-тойугунан оҕолоро, сиэннэрэ уонна чугас доҕотторо кэлэн эҕэрдэлээтилэр.

***

“Сунтаар улууhа (оройуона)” муниципальнай оройуон дьаһалтатын пресс – сулууспата