Сунтаар улууһа былыр-былыргыттан тойук тохтообут, ырыа ылласпыт түбэтэ

Аар Саарга аатырбыт ырыаһыппыт Сэргэй Сибиэрэп эппит тыла иҥмит, саҥарбыт саҥата дуорайбыт, алгыс баһын сыалаабыт дойдутугар кылаан кылыһах кылыгырыы тохтон оһуохай оройуттан тутулунна, олоҥхо олохсуйда, тойук туругурда, ырыа-үҥкүү ыксаласта.

Oһуохай этээччилэр бииртэн биир солбуйсан түһүлгэлэрин төрүттээтилэр. Киһи кэрэхсиэҕэ, эдэр-сэниэ этээччилэр эмиэ күндү көмүс күөмэйдэрин  көбүөхтэтэн, түһүлгэлэрин төрүттээтилэр. “Ил Түмэн” Судаарыстыбаннай мунньаҕын бэрэссэдээтэлэ Алексей Еремеев, улуус Аҕа баһылыга Анатолий Григорьев уонна ыҥырыылаах ыалдьыттар оһуохай эргииригэр киирэн, күн үҥкүүтүн толордулар.

Айылҕа дэгиттэр талаанын бүүс-бүтүннүү бэйэтигэр иҥэриммит, төрүт култуураны тарҕаппыт сүдү киһибит бэлиэтэ – ААР БАҔАХ республика 16 улууһун эргийэн төрүт сиригэр кэллэ. Маны тэҥэ, үрдүк таһымнаах тэрээһини көҕүлээн, торумнаан, бар дьону түмэ тарпыт улууспут баһылыга Анатолий Григорьевка Ил Дархан Айсен Николаев аатыттан наҕарааданы туттардылар. 

Бу курдук, саха дьонугар оһуохай – айыы үҥкүүтэ куруутун дуорайа туруохтун!!!

***
Сунтаар улууhун пресс-сулууспата