«Сэргэ» бааһынай хаһаайыстыба саҥа комплексын үлэҕэ киллэрдэ

Ахсынньы ый 18 күнүгэр  Нам улууһун Кириэс-Кытыл нэһилиэгэр «Сэргэ» бааһынай хаһаайыстыба 120 сүөһү турар саҥа комплексын үлэҕэ киллэрдэ.

Владимир Герасимов эбийиэгин үөрүүлээх быһыыга-майгыга арыйыыга Саха Өрөспүүбүлүкэтин тыатын хаһаайыстыбатын миниистирэ Александр Атласов кытынна. Миниистир хаһаайыстыба малааһынынан эҕэрдэлээн туран, тыа сиригэр саҥа хотоннор, комплекстар үлэҕэ киириилэрэ билигин хаһааҥҥытааҕар да суолтата улахан диэн бэлиэтээн эттэ.

«Сүөһү ахсаанын элбэтэн, киниттэн ылыллар бородууксуйаны астаан-үөллээн дохуот киллэрэр таһымҥа тахсыы үгүс сыллаах утумнаах үлэни эрэйэр. Онно бастакы хардыы быһыытынан олох ирдэбилигэр сөп түбэһэр табыгастаах үлэлиир усулуобуйа тэриллэн, сүөһүгүт ахсаанын элбэтэргэ, киниттэн ылыллар бородууксуйаны элбэтэргэ интэриэс үөскүө диэн быһа эрэнэбин” – диэн эттэ уонна үлэһит дьоҥҥо махталын тиэртэ.

Бүгүн дойду үрдүнэн тыа хаһаайыстыбатыгар бэйэ аһынан-үөлүнэн хааччыллыыга ураты улахан болҕомто ууруллар. Ол курдук министиэристибэ производство тирэҕэ буолар саҥа объектары тутан, аныгы туһалаах тиэхиникэни, оборудованиены атыылаһары көҕүлээн, ороскуотун сабынарын өйөөн үлэлиир.

Маны таһынан хороҕор муостааҕы элбэтиигэ улахан болҕомто туһаайыллан, саҥа саҕалыыр фермердэргэ грант бэриллэн, хаһаайыстыбалар инники сайдыыларыгар тирэх буолар. Бу үлэ, өйөбүл судаарыстыба бюджеттан көрүллэрэ, үбүлэнэрэ хайҕаллаах суол.

“Сэргэ” хаһаайыстыба салайааччыта Владимир Герасимов саҥа комплексы СӨ Тыатын хаhаайыстыбатын министиэристибэтин «Агропромышленнай комплекска инвестиционнай тутуулары көҕүлээһин» хос бырагыраамма нөҥүө туттан киллэрдэ.

***

ТХМ пресс-сулууспата