Курс валют
$
89.7
0.55
97.1
0.78
Курс валют
Курс валют
$
89.7
0.55
97.1
0.78
Меню
Поиск по сайту

Саха Сирин чаҕылхай салайааччытын Владимир Павлов аатын үйэтитэр тэрээһин ыытылынна

11.12.2019 11:46 0
Саха Сирин чаҕылхай  салайааччытын Владимир  Павлов  аатын үйэтитэр тэрээһин ыытылынна

Ахсынньы 10 күнүгэр, Саха Сирин биир киэн туттар судаарыстыбаннай уонна бэлитиичэскэй деятеля, «Хотугу Сулус» уордьан бастакы кавалера, СӨ норуотун хаһаайыстыбатын үтүөлээх үлэһитэ, Дьокуускай куорат, Бүлүчээн нэһилиэгин уонна Сунтаар улууһун Бочуоттаах олохтооҕо, сахатын дьонун-сэргэтин олоҕун тупсарар туһугар үлэлээбит Владимир Гаврилович Павлов аатын үйэтитэр улахан суолталаах кэрэ-бэлиэ тэрээһин ыытылынна.


Манна кинини сүдү салайааччы уонна талааннаах тэрийээччи быһыытынан сөҕүмэр өрүттэрин ахтааччы уонна кини үтүө аатыгар сүгүрүйээччи элбэх дьон кэлбит. Мустубут дьон – бииргэ алтыспыт үөлээннээхтэрэ уонна кини аатын ааттата сылдьар үөрэтэн-такайан таһаарбыт ыччата, кини үлэтин уонна олоҕун холобур оностон, билигин араас таһымнаах салайар үлэлэргэ ситиһиилээхтик үлэлии сылдьаллара биһигини үөрдэр.

Үөрүүлээх тэрээһиҥҥэ Сунтаар улууһун муниципальнай оройуон дьаһалтатын аатыттан, улууспут Аҕа баһылыга Анатолий Григорьев Владимир Гаврилович 90 сылыгар аналлаахсыл устата ыытыллыбыт тэрээһиннэри тэрийсэргэ күүс-көмө буолбут дьоммутугар уонна Ил Дархан Айсен Николаевка, хамыыһыйа анаан тэрийбитигэр махтал тылларын анаата.

Ону таһынан,  кини олоҕун кэпсиир саҥа кинигэ сүрэхтэннэ. Кинигэни Арассыыйа суруналыыстарын Сойууһун чилиэнэ Зинаида Игнатьева архыып матырыйаалларын хасыһан, кинини кытта бииргэ алтыспыт үөлээннээхтэриттэн ахтыылары хомуйан сурукка тиһэн таһаарда.

Зинаида Ивановна кинигэ суруллуутугар элбэх көрсүһүүлэр ыытылыннылар, интервьюлар ылыныллылар, архыып матырыйааллара, ахтыылар, хаартыскалар хомулуннулар диэн кэпсээтэ. Кинигэ суруллуутугар төһүү күүс-көмө буолбут дьоҥҥо Сунтаар улууһун Аҕа баһылыгар Анатолий Григорьевка, аймахтарыгар Мария Павловаҕа, Владимир Гаврилович доҕотторугар, бииргэ алтыспыт дьонугар истиҥ иһирэх махтал тылларын анаата.

Бу кинигэ история умнуллубат кэрэhитэ буолан, ааспыты санатан эдэр үүнэн эрэр көлүөнэ ыччаты үтүөҕэ-кэрэҕэ угуйа, аҕа көлүөнэҕэ махталы иҥэрэ туруо диэн эрэлбит сүдү.

***

«Сунтаар улууһа (оройуона) » муниципальнай оройуон дьаһалтатын пресс-сулууспата

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»