Өрөспүүбүлүкэ Бырабыыталыстыбата ааспыт 2019 сыллаах үлэтин Сунтаар улууһун нэһилиэнньэтигэр отчуотун саҕалаата

---

Бырабыыталыстыба чилиэннэрэ түөрт бөлөҕүнэн арахсан үс күн устата Сунтаар улууһун нэһилиэктэринэн сылдьан үлэлиэхтэрэ.

Ол курдук, маҥнайгы отчуот улуус киинигэр Сунтаарга ыытылынна, онно бырабыыталыстыбаттан Сунтаар улууһугар кураторынан анаммыт СӨ тас сибээс уонна норуоттар дьыалаларын миниистирэ Гаврил Кириллин, СӨ Доруобуйа харыстабылын миниистирэ Елена Борисова,  СӨ Тыатын хаһаайыстыбатын миниистирэ Александр Атласов, СӨ үлэ уонна социальнай сайдыы миниистирин бастакы солбуйааччы Иван Алексеев, СӨ тыраанспар уонна суол хаһаайыстыбатын миниистирин бастакы солбуйааччы Алексей Филиппов, СӨ баайга-дуолга уонна сир сыһыаннаһыыларыгар миниистири солбуйааччы Михаил Никифоров, СӨ үбүн миниистирин солбуйааччы Гаврил Алексеев, СӨ Урбаан, атыы-эргиэн уонна туризм министиэристибэтин миниистири солбуйааччы Максим Прокопьев, СӨ Экологияҕа, сир баайын туһаныыга уонна ойуур хаһаайыстыбатыгар миниистири солбуйааччы Николай Додохов, СӨ Үөрэҕин уонна наукатын миниистирин солбуйааччы Ньургуна Соколова, СӨ тас сибээскэ министиэристибэтин норуоттар ыккардыларынааҕы быраап үлэтин тэрийэр салаа отделын салайааччыта  Иван Мартынов, СӨ Дьарыктаах буолуу судаарыстыбаннай кэмитиэтин рыногы үөрэтэр уонна кэтээн көрөр салаа салайааччыта Георгий Борисов, ТХМ сүөһү иитиитин, племенной үлэни кэтээн көрүү, кооперация уонна аччыгый хаһаайыстыбалар департаменын салайааччытын солбуйааччы Айаал Тимофеев, Кытайга Россия атыы-эргиэн бэрэстэбиитэлистибэтин састаабыгар киирэр Саха Сирин бэрэстэбиитэлэ Степан Андреев, ГКУ “Служба государственного Заказчика РС(Я) Иннокентий Петров нэһилиэнньэ туруорбут боппуруостарыгар хоруйдаатылар.

Бөлөх салайааччыта өрөспүүбүлүкэҕэ социальнай-экономическай сайдыы бары эйгэтин таарыйан сыл устата туох үлэ ыытыллыбытын сырдатта. Отчуокка 157 киһи кыттыыны ылла, сүрүннээн доруобуйа харыстабылыгар, тыа хаһаайыстыбатыгар, ону таһынан хаһан да буоларын курдук, ордук элбэх боппуруос олох-дьаһах коммунальнай хаһаайыстыба эйгэтигэр туһаайылынна. Ол курдук, “Россельхозбанк” биһиги улууска филиала арыллыытын боппуруоһа, уот саынатын төлөбүрүн үрдээһинэ, бэйэ оҥорон таһаарар бородууксуйаны бырагырааммаҕа “Меркурий” бырагыраамма нөҥүө ааһарыгар уустуктардааҕын, тулаайах уонна төрөппүт көрүүтэ-истиитэ суох хаалбыт оҕолору дьиэнэн хааччыйыыга эбии үп көрөөһүн уонна да атын тустаах боппуруостар турдулар.

Нэһилиэнньэ өрөспүүбүлүкэ үрдүнэн күүстээх үлэ, сайдыы барара харахха быраҕыллар, ааспыт сылга туруоруллубут боппуруостар быһаарыллаллар диэн туран “биһириибит” диэн биллэрдилэр.

Отчуот түмүгэр улуус Аҕа баһылыга Анатолий Григорьев, СӨ Экологияҕа миниистири солбуйааччы Николай Додохов, СӨ биологическай ресурсаларын дирекциятын бастакы солбуйааччыта Анатолий Алексеев СӨ үрдүнэн бизон историческай суолтатын хаҥатар сыалтан Сунтаар улууһугар бизон кыылы аҕалан олохсутууга уонна тарҕатыыга 2023 сылга диэри сөбүлэҥ түһэристилэр.

***

“Сунтаар улууһа (оройуона)” муниципальнай оройуон дьаһалтатын пресс-сулууспата