Ньурбатааҕы ГИМС былааннаммыт улэни ыытар

РФ гражданскай оборонаҕа, ыксаллаах быһыыга-майгыга уонна айылҕа иэдээнин содулларын туоратыыга министиэристибэтин СӨ сүрүн салалтатын иһинэн үлэлиир Бүлүү бөлөх оройуонунааҕы ГИМС отделениета сэтинньи 1 күнүттэн ахсынньы 1 күнүгэр диэри күһүҥҥү-кыһыҥҥы кэмнэргэ өрөспүүбүлүкэ былааныгар олоҕуран үлэ ыытар. Маннык үлэ Ньурба улууһугар эмиэ тэриллэр.

Улууска ыксаллаах быһыыны-майгыны сэрэтиигэ анаан алтынньы 29 күнүгэр 25 №-дээх оройуон дьаһалтата таһаарбыт боротокуолугар олоҕуран, быһаарыы ылыллан, Ньурба улууһугар күһүҥҥү-кыһыҥҥы ыйдарга ыытыллар үлэ былаана ылыллыбытын туһунан ГИМС отделениетын судаарыстыбаннай инспектора Анатолий Васильевич Иванов билиһиннэрдэ.

– Ньурба улууһун дьаһалтата МТ дьаһалталарыгар нэһилиэк олохтоохторо муус ылар, муҥхалааһыны ыытар кэмнэригэр сэрэтии үлэлэр баралларыгар анаан дьаһал тахсан, нэһилиэктэргэ бөлөҕүнэн патрууллааһын, сэрэтии үлэтэ ыытыллар.

Улуустааҕы судаарыстыбаннай автоинспекция, ГИМС уонна улуустааҕы административнай хамыыһыйа өрүскэ тиэхиньикэлэр сырыыларын бэрэбиэркэлээһин түмүгүнэн мониторинг ыытыллар. Көҥүлэ суох туорууру бопсууга анаан эриэйдэ оҥоруу кэмигэр көҥүлэ суох сырыы таһаарбыт суоппардарга боротокуол толоруллар, профилактическай бэсиэдэлэр ыытыллаллар, административнай эппиэтинэскэ тардыы нэһилиэк дьаһалтатын аатыгар суруллар. Саха сиринээҕи КоАП 9.10 ыстатыйатыгар олоҕуран административнай хамыыһыйа гражданнарга – 5000 солк., дуоһунастаах дьоҥҥо 20 000 солкуобайтан саҕалаан 50 000 солк. тиийэ, юридическэй сирэйдэргэ – 100 000 саҕалаан мөлүйүөҥҥэ тиийэ ыстараап олохтуур.

Биһиги муус төһө халыҥыттан, төһө уйуктаах тиэхиньикэлэр эппиэттииллэрин көрөммүт көҥүллүүбүт. Соторутааҕыта Саха сиригэр быһылаан кэмигэр массыына тимирэн, ыксаллаах-быһыы майгы үлэтин күүһүрдэргэ үлэ барар.

Убаастабыллаах суоппардар, мууһунан туорааһыҥҥа сэрэхтээх буолуҥ, суол аһылларын кэтэһиҥ! Бэйэҕитин уонна пассажирдар олохторун сыаналааҥ. Маннык хабааннаах иһитиннэриилэр улуус хаһыаттарыгар тахсаллар уонна олохтоох араадьыйанан биллэриллэр.

Оскуолаларга анаан «Правила безопасности» онлайн-уруоктар ыытыллаллар.

Билигин Күндээдэ аннынан, Марха өрүскэ, Өҥөлдьө, Малдьаҕар, Антоновка өттүгэр Бүлүү өрүстэри туоруур сирдэри кэтиибит.

Ньурба улууһун дьаһалтатын көҥүлүнэн Марха өрүскэ Өҥөлдьө, Малдьаҕар, Мииринэй, Накыын хайысхаларынан ахсынньы 1 күнүттэн, Бүлүү өрүскэ Антоновка аннынан ахсынньы 13 күнүгэр, Саха сиринээҕи “Бүлүү” федеральнай суолларга Үөһээ Бүлүүгэ – сэтинньи 23, Күндээдэҕэ – 25 күннэригэр график быһыытынан аһыллара былааннанар. Ол гынан баран, күнтэн-дьылтан тутулуктаах буолуоҕа, – диэн Анатолий Иванов түмүк оҥордо.

***

Источник: ulusMedia