Ньурба улууһун дьиэ кэргэттэригэр наҕараадалары туттардылар

Дьиэ кэргэн, таптал, бэриниилээх буолуу күнүгэр Ньурба оройуонун судаарыстыбаннай турук аактатын сиэдэрэй саалатыгар “Таптал уонна бэриниилээх буолуу” мэтээл үөрүүлээх туттарыыта буолла. Ол курдук, 45 сыл бииргэ олорбут Дьиикимдэ нэһилиэгиттэн Луиза Акимовна, Василий Николаевич Канаевтар уонна 37 сыл бииргэ олорбут Октябрина Семеновна, Никифор Михайлович Федотовтар Россиятааҕы тэрийэр хамыыһыйа анаабыт мэтээлин туттулар.

Улуус баһылыга Алексей Михайлович Иннокентьев эҕэрдэ тылыгар өссө даҕаны бу курдук биир ыллык устун салҕыы сиэттиспитинэн баралларыгар, бигэ туруктаах дьиэ кэргэн үтүө холобурун оҕолоро, сиэннэрэ утумнуулларыгар баҕа санаатын эттэ. Эдэр эрдэхтэриттэн тапталларын бу курдук харыстаан, салгыы кэнчээри ыччакка иҥэрэн илдьэ кэлбиттэринэн истиҥник эҕэрдэлээтэ уонна кини олоҕун аргыһын кытары бииргэ олорбуттара быйыл 30 сылын туолбутун бэлиэтээн эппитигэр, мустубут дьон дохсун ытыс тыаһынан уруйдаатылар.

Мэтээл хаһаайыттарын Ньурба оройуонун судаарыстыбаннай турук аактатын салайааччыта Альбина Алексеева, Дьиикимдэ нэһилиэгин баһылыга Варвара Сухаринова, “Кыталык” култуура дыбарыаһын ырыаһыттара уонна Канаевтар, Федотовтар дьиэ кэргэттэрин оҕолоро эҕэрдэлээтилэр.

Дьиэ кэргэн, таптал, бэриниилээх буолуу күнүн биир тэрээһинэ Ньурба улууһугар бу курдук сылаастык уонна истиҥник ааста.

***

Лена Петрова