Курс валют
$
76.35
0.08
89.25
Курс валют
Курс валют
$
76.35
0.08
89.25
Меню
Поиск по сайту

Мэҥэ Хаҥалас ытык ыаллара наҕараадаларын туттулар

08.07.2020 19:22 0
Мэҥэ Хаҥалас ытык ыаллара наҕараадаларын туттулар

Бүгүн Бүтүн Арассыыйа үрдүнэн Дьиэ кэргэн, таптал уонна бэриниилээх буолуу күнэ бэлиэтэнэр. Мэҥэ Хаҥалас улууһугар бу бэлиэ күҥҥэ нэһилиэктэринэн дьиэ кэргэни чиэстиир анал тэрээһиннэр ыытылыннылар. Дьиэҕэ олоруу эрэсииминэн элбэх киһи мустуута суох ааста.


Майа сэлиэнньэтин ытык-мааны олохтоохторо Марфа Петровна уонна Николай Семенович БаишевтарМария Яковлевна уонна Анатолий Константинович Захаровтар Мэҥэ Хаҥалас улууһун баһылыга Николай Старостин дьаһалынан «Ытык ыал» Бочуотун кинигэтигэр киллэрилиннилэр. Кинилэр ыал буолан 50 сыл бииргэ олорон, уопсастыбаҕа дьиэ кэргэн дириҥ өйдөбүлүн үрдүктүк тутан кэллилэр.  Оттон 30 сыл бииргэ олорор Маргарита уонна Александр Афанасьевтарга  «За любовь и верность» диэн Арассыыйаттан анал бэлиэ туттарылынна.

Кинилэр үһүөн улууспут олохтоохторо бары да бэркэ билэр үтүө-мааны үлэһит дьиэ кэргэттэрэ. Киһи да, үлэһит да, төрөппүт да быһыытынан бары холобур буолар дьон. Баишевтар  ‒ Марфа Петровна уһун кэмҥэ санэпидстанция кылаабынай бырааһынан үтүө суобастаахтык үлэлээбитэ, Николай Семенович үгүс көлүөнэ ыччат ытыктыыр учуутала, уран тарбахтаах норуот маастара. Захаровтар ‒ Мария Яковлевна уһун кэмҥэ киин балыыһаҕа суот-учуот үлэтигэр таһаарылаахтык үлэлээбит исписэлиис, Анатолий Константинович улууспутугар успуорт эйгэтигэр уһуннук үлэлээбит салайааччы, чөл олох пропагандиһа, маассабай успуорду көҕүлээччи. Афанасьевтар ‒ Маргарита Климентьевна академик В.П.Ларионов аатынан Майа орто оскуолатын дириэктэри иитэр үлэҕэ солбуйааччы, Александр Аркадьевич бэтэринээр быраас.

Бу бэлиэ түгэни Майа олохтоох дьаһалтата саха итэҕэлин балаҕаныгар бэлиэтээтэ, сиэдэрэй көстүүлээх Хомсомуол болуоссатын сэргэх көстүүтүгэр дьоһун ыаллар хаартыскаҕа түһэн бүгүҥҥү умнуллубат күнү үйэтиттилэр.

Тэрээһиҥҥэ улуус дьаһалтатын дьиэ кэргэн бэлиитикэтигэр, ыччат дьыалаларыгар управлениетын начаалынньыга Ирина Назарова, Майа сэлиэнньэтин баһылыга Дмитрий Тихонов кыттан иллээх-эйэлээх дьиэ кэргэттэргэ истиҥ эҕэрдэлэрин тиэртилэр, махталларын биллэрдилэр.

‒ Биһиги улууспутугар дьон-сэргэ ытыктабылынан туһанар, уопсастыбаннай үлэни көҕүлээччи, тэрийээччи, холобурга сылдьар үгүс ыал баар, ‒ диир Ирина Егоровна. ‒ Бүгүҥҥү бэлиэ күнүнэн бары дьиэ кэргэттэри истиҥник эҕэрдэлиибин. Мэлдьи баар буоллун ‒ таптал, истиҥ сыһыан, бэриниилээх буолуу! Дьиэ кэргэн дьоло ‒ кэнчээри ыччатыгар. Удьуору утумнуур, салгыыр ыччат тэнийэн истин.

Сарсын эмиэ үөрүүлээх быһыыга-майгыга Дьаҥхаады нэһилиэгин олохтоохторугар, холобур буолар ыалга Александра Владимировна, Гаврил Петрович Артемьевтарга «За любовь и верность» бэлиэ туттарыллыаҕа.

***

Ааптар: Алена ДОКТОРОВА

Оставить комментарий