Массыынаҕа соһулла сылдьан тохтотон, дьону быыһаабыта

Сыллата от ыйын 3 күнүгэр Арассыыйаҕа ГАИ – ГИБДД үлэһиттэрин идэлээх бырааһынньыга бэлиэтэнэр. Итинэн сибээстээн Ньурбатааҕы ГАИ отделын начаалынньыга Николай Владимирович Прокопьевы кытта көрсөн кэпсэттим.

Визитка

Н.В.Прокопьев 1992 с. алтынньы 8 к. Ньурба бөһүөлэгэр төрөөбүтэ. 2014 с. Дьокуускайдааҕы судаарыстыбаннай тыа хаһаайыстыбатын академиятын, 2024 с. РФ ИДьМ И.Ф.Шилов аатынан Уһук Илиҥҥи юридическай институтун юрист идэлээх үөрэнэн бүтэбитэ. 2016-2019 сс. Ньурбатааҕы ГИБДД отделын инспекторынан, 2019-2020 сс. ДПС ыстаарсай инспекторынан, 2020-2021 сс. регистрационнай-экзаменационнай үлэ уонна автомототранспортнай сириэстибэ техническэй надзорун госинспекторынан үлэлээбитэ. 2021 с. муус устар ыйыгар Ньурбатааҕы ГАИ отделын начаалынньыгынан анаммыта.

— Николай Владимирович, бүгүҥҥү идэлээх бырааһынньыккытын хайдах көрүстүгүт?

— Идэлээх күммүтүн көннөрү үлэ күнүн быһыытынан көрүстүбүт. Сарсыардаттан аймахтарбыт, бииргэ үлэлиир табаарыстарбыт, доҕотторбут төлөпүөнүнэн, ватсабынан эҕэрдэлээбиттэрэ. Бүгүн үлэ-түбүк элбэҕинэн сибээстээн, ИДьМ оройуоннааҕы отделыгар ГАИ үлэһиттэрин күнүн тэрээһинин кэлэр бэнидиэнньиккэ көһөрдүлэр.

Ол эрээри саамай сүрүнэ – бу күннэргэ ДТП, дэҥ-оһол тахсыбатар эрэ диибин. Биһиги үлэбит дьон олоҕун уонна доруобуйатын харыстыырга туһуланар, онон ханнык даҕаны саахала, быһылаана суох күннэр ааһаллара – биһиэхэ саамай улахан бэлэх.

— Тоҕо чуолаан ГАИ үлэһитин идэтин талбыккыный?

— Оҕо эрдэхпиттэн дьиссипилиинэни, бэрээдэги сөбүлүүбүн. Ол иһин бу үлэбэр кэллэҕим. Ис дьыала үлэһиттэрэ ураты дьиссипилиинэлээхтэр, мэлдьи бэрээдэги, сокуоннаһы араҥаччылыыллар. Биллэн турар, идэбит ыарахан. Ол эрээри үлэлээбитим тухары биирдэ даҕаны кэмсиммэтэҕим.

— Суолга ханнык кэһиилэр ордук элбэхтэ тахсалларый?

— Бэйэни харыстыыр куру кэппэт буолуу, оҕоҕо анал кириэһилэтэ суох буолуу курдук Суол быраабылатын кэһиилэрэ. Өссө куһаҕана — итирик туруктаах суоппар уруулга олоруута. Элбэхтэ тахсар кэһиилэр суотабай төлөпүөнүнэн кэпсэтиини кытта сибээстээхтэр, дьон уруулга олорон төлөпүөҥҥэ элбэхтэ аралдьыйар. Сатыы даҕаны дьон ардыгар наушниктаах сылдьар буолаллар, бу эмиэ олус кутталлаах. Итинтэн суол-тырааныспар быһылаана тахсыан сөп, тахсар даҕаны.

— Эһиги идэҕитигэр саамай ыарахан тугуй?

— Үлэбит чааһа «ненормированнай», олус эппиэтинэстээх. Уопсайынан, полиция үлэһиттэрэ физическай уонна моральнай ноҕуруускалара улахан. Ону үөрэнэн хаалан дуу, буолуохтаах буолуохтааҕын курдук ылынабыт. Ким эрэ үлэлиэхтээх, бэрээдэги, сокуоннаһы көрүөхтээх буоллаҕа.

— Николай Владимирович, үлэҕитигэр ханнык өрүтү ордук чорботон бэлиэтиигин?

— Суолга саахал тахсыбатах, киһи эчэйиитэ суох буоллаҕына — бу саамай үчүгэй. ГАИ үлэһиттэрэ итинтэн ордук үөрэбит.

— ГАИ үлэһиттэригэр ханнык хаачыстыбалар баар буолуохтаахтарый?

— ⁠Полиция үлэһитэ эппиэтинэстээх, дьиссипилиинэлээх, сокуону билэр уонна тулуурдаах буолуохтаах.

— ГАИ үлэтин ис хоһоонун көрдөрөр ханнык эрэ түгэннэри кэпсиэҥ дуо?

— Бу түгэн 2017 сыл сайыныгар буолбута. Рейдэҕэ сырыттахпытына биир итирик туруктаах суоппар джип массыынатынан куоппута. «Иллюзион» кинотеатртан саҕалаан Дьиикимдэ дэриэбинэтигэр диэри. Дьиикимдэҕэ кыра массыына эргийбэт переулогар сырсан куоттаран иһэн, эргийэр кэмигэр сүүрэн тиийэн, массыына аанын тутааҕыттан тутуспутум. Оннук 20-чэ миэтирэ соһуллан, түннүгүнэн ойон киирэн тохтоппутум. Ол онно уулуссаҕа оҕо бөҕөтө, массыына да, сүөһү да элбэҕэ. Кими эрэ эчэтиэ диэммин улаханнык куттана санаабытым. Онно илиибин күүскэ өлөрбүтүм. Итирик киһини тохтоппутум кэннэ, дьон кэлэн биинтэ биэрбиттэрэ. Хата, эн баар буолаҥҥын, бу итирик киһи дьоммутун тэпсэн өлөртөөбөтө диэбиттэрэ.

Соторутааҕыта Ньурбаҕа ГАИ отделын үлэһиттэрэ дьуһуурустубаҕа сылдьан, Кыайыы 40 сыла уулуссаҕа чааһынай дьиэ умайан тахсыбытын көрөн, бастакынан тиийэн дьиэттэн таҥаһа умайан эрэр киһини таһааран быыһаабыттара, «Суһал мед. көмөҕө» туттарбыттара. Онон, түмүктээн эттэххэ, биһиги үлэбит дьиҥ ис хоһооно дьон көмүскэллээх буоларын туһугар туһаайыллар».

Итинэн ГАИ отделын салайааччыта Николай Прокопьевы кытта кэпсэтиибит түмүктэннэ. Николай Владимировиһы уонна ГАИ бары үлэһиттэрин идэлээх бырааһынньыктарынан эҕэрдэлиибит! Эһиэхэ түбүктээх уонна эппиэттээх үлэҕит иһин махталбытын тиэрдэбит уонна үлэҕитигэр салгыы ситиһиилэри, кытаанах доруобуйаны, дьолу-соргуну баҕарабыт!

***

Геннадий АНТОНОВ

Сүрүн хаартыскаҕа — ГАИ отделын начаалынньыга Н.В.Прокопьев, иккис хаартыскаҕа — ГАИ отделын кэлэктиибэ