Күндээдэҕэ саҥа хотон киирдэ

Ахсынньы 26 күнүгэр Ньурба улууһугар үчүгэй үлэлээҕинэн биллэр “Күндээдэ” ААУо-ҕа бэлиэ түгэн үүннэ. Саҥа тутуллубут хотон үөрүүлээх аһыллыыта буолла.

Бу сайын “Күндээдэ” ААУо хотоно умайан улахан хоромньу тахсыбыта. Улуустан үп көрүллэн, “Стройкомфорт” ХЭТ кылгас кэм иһигэр саҥа хотону тутан бүтэрдэ. Хаһаайыстыба ыалларынан тарҕатан туруорбут 200-тэн тахса субай сүөһүтүн манна киллэрдилэр. СӨ Тыатын хаһаайыстыбатын министиэристибэтин кытта кэпсэтии быһыытынан, бу хотон тутуутугар өрөспүүбүлүкэттэн толуйуу үп көрүллэр.

Улуус баһылыга Алексей Иннокентьев, Күндээдэ нэһилиэгин баһылыгын солбуйааччыта Евгения Саввинова, улуус сүбэтин бэрэссэдээтэлин солбуйааччыта Алексей Тихонов, агрофирма салайааччыта Александр Алексеев иһирэх эҕэрдэ тылларын эттилэр, тутааччыларга истиҥ махталларын тиэртилэр. “Күндээдэ” ААУо гендириэктэрэ Александр Алексеевка СӨ Тыатын хаһаайыстыбатын министиэристибэтин Эҕэрдэ суруга, “Стройкомфорт” ХЭТ дириэктэрэ Анатолий Степановка “Ньурба улууһун социальнай-экэнэмиичэскэй сайдыытыгар кылаатын иһин” бэлиэ, Николай Михайловка уонна Вадим Сергеевкэ улуус баһылыгын Махтал суруга туттарылынна.  Аалай лиэнтэни Алексей Иннокентьев, Евгения Саввинова, Александр Алексеев, улуустааҕы тыа хаһаайыстыбатын департаменын салайааччыта Иван Егоров уонна Анатолий Степанов быһа кырыйдылар.

***

Ньурба улууһун дьаһалтатын пресс-сулууспата