“Билэргит курдук быйыл биир дойдулаахпыт, Аҕа дойду сэриитин сылларыгар, аас-туор аччык кэмҥэ оҕолорго интэринээттэри арыйан элбэх оҕону аччыктыыртан быыһаабыт, маннык уустук кэмҥэ үөрэх баар буолуутун хааччыйбыт нарком бэрэссэдээтэлэ, билиҥҥинэн үөрэх миниистирэ Василий Назарович Чемезов төрөөбүтэ 110 сыла. Бу бэлиэ датанан кини төрөөбүт дойдутугар Эмискэ уонна улууска элбэх тэрээһиннэр буолбуттара. Аны бу түмүктүүр тэрээһин Дьокуускай куоракка Саха өрөспүүбүлүкэтин Бырабыыталыстыбатын 2 нүөмэрдээх дьиэтин аактабай саалатыгар ыытыллаары бэлэмнэнэбит. Бу тэрээһини Саха өрөспүүбүлүкэтин үөрэҕин министиэристибэтэ, гуманитарнай чинчийэр уонна аҕыйах ахсааннаах хотугу норуоттар кыһалҕаларын института, биһиги улууспут дьаһалтата уонна үөрэҕин салалтата, Эмис нэһилиэгин дьаһалтата тэрийэн ыытабыт. Манна учуонайдар, Василий Назарович дьыалатын чинчийээччилэр, педагогическай үлэ бэтэрээннэрэ, биир дойдулаахтара, чугас дьонноро кыттыыны ылан саха саарыннарыттан биирдэстэрин туһунан киэҥ кэпсэтии буолуо. Онно кини үөрэх систиэмэтин талааннаах тэрийээччитин, хаалларбыт научнай чинчийиилэрин, улахан буукубаттан суруллар киһи туһунан ахтыылар, кэпсэтии буолуо. Онон бука бары биир дойдулаахтарбытын, Василий Назарович туһунан чугастык билэр, кини олоҕун, үлэтин чинчийээччилэри бу кэпсэтиигэ күүтэбит”, — диэн Амма улууһун баһылыга Степан Кузьминсырдатар.
***
“Амма олоҕо” хаһыат
Оставить комментарий