Капитальный өрөмүөн программатынан Сунтаарга үһүс оскуола оҥоһулла турар

Үөрэх систиэмэтин инфраструктуратын сайыннарар, тупсарар тус сыаллаах капитальнай өрөмүөн программата республикаҕа 2022 сылтан саҕалаан үлэлиир. Бу тосхол көмөтүнэн саҥардыллыбыт эбийиэк элбэх. Аҥардас Сунтаарга үһүс оскуола оҥоһулла турар. 

Ааспыт сылларга Сунтаар улууһугар “Үөрэх систиэмэтин модернизациялааһын” федеральнай программанан Тойбохой уонна Кутана оскуолалара өрөмүөннэммиттэрэ. Оттон быйыл 1996 сылтан үлэлиир Сунтаардааҕы 1-кы нүөмэрдээх оскуолаҕа үлэ барар.

Манна бэдэрээччит “ВИМ-СТРОЙ” тэрилтэ үлэни  саҕалаан муосталары, эркиннэри көтүрэн күргүөмнээх үлэҕэ сылдьар. Улуус баһылыга Анатолий Григорьев уонна тустаах салайааччылар үлэ хаамыытын көрдүлэр, үлэһиттэри кытта кэпсэттилэр. 

Улууска бастакы таас эбийиэги муостатын, эркинин, үрүтүн барытын уларытан аныгы, тупсаҕай бырайыактаах буолуоҕа. Маны тэҥэ, уотун ситимэ, турбалара саҥардыллыахтара, канализацията оҥоһуллуоҕа. 

Үйэлээх үлэ кэмигэр түмүктэнэн, былаан быһыытынан атырдьах ыйыгар саҥардыллыбыт оскуоланы кэрэхсии көрүөхпүт.

***
Сунтаар улууhун пресс-сулууспата