Буойун-учууталлар үлэлээбиттэрэ​

Покровскайга бастакы оскуола XIX үйэҕэ 1887 сыллаахха церковно-приходской оскуола быһыытынан арыллыбыта.Онтон 1938 сыллаахха уопсай үөрэхтээһин орто оскуолата буолбута.  Аҕа дойду Улуу сэриитэ саҕаланар сылыгар, 1941 сыллаахха,  дьэ орто оскуола быһыытынан бастакы выпускниктарын таһаарбыта.

Аҕа дойду улуу сэриитэ дьон-сэргэ эйэлээх олоҕун, ыра санааларын ыһан кэбиспитэ. Оскуолабыт 8, 9, 10 кылаастара сабыллыбыттара.  Ийэ дойдуларын көмүскүү учууталлар,  оскуоланы бүтэрбит выпускниктар барбыттара. Кинилэр истэригэр оскуола дириэктэрэ Попов эмиэ барбыта уонна  сэрии хонуутугар сырдык тыына быстыбыта.  Сэрии ыарахан сылларыгар хорсуннук сэриилэһэн, элбэх буойун-учуутал олохторун биэрбиттэрэ.  Дойдуларыгар этэҥҥэ эргиллэн кэлбит учууталлар ааттарын ааттыахпын баҕарабын:  Дуглас Ксенофонт Онуфриевич, Новиков Георгий Николаевич, Кельциев Николай Васильевич, Григорьев Иннокентий Кириллович, Конников Иван Михайлович, Филиппов Дмитрий Алексеевич, Иванов Филипп Дмитриевич, Прокопьев Семен Михайлович  уо.д.а.

Кинилэр сэрииттэн кэлэн баран, үксүлэрэ учуутал идэтигэр бэриниилээх буолан, эдэр көлүөнэ ыччаты иитиигэ-үөрэтиигэ олохторун анаабыттара.

Биһиги, аныгы көлүөнэ оҕолоро, дойдубутун көмүскээн Улуу Кыайыыны аҕалбыт хорсун-хоодуот буойун-учууталларбыт сырдык ааттарын үйэ-саас тухары  умнуохпут  суоҕа, ахта-саныы, кэриэстии туруохпут.  

***

Кюннэй Архипова, И.М. Яковлев аат. Покровскай 1-кы №-дээх орто оскуолатын 10  “а” кылааһын үөрэнээччитэ