ҮС ХАТЫҤҤА “КЫМЫС -АЙЫЫ АҺА”БЭСТИБЭЭЛ ЫЫТЫЛЛЫАҔА

Быйыл Туймаада ыһыаҕа хаһан тэриллиэҕиттэн ыытылларын курдук киэҥ далааһыннаахтык, элбэх тэрээһиннэрдээх буолара сабаҕаланар. Хаһан баҕарар буоларын курдук ыһыаҕы элбэх культурнай, спортивнай программалар, араас таһымнаах куонкурустар, ыра түһүлгэлэрэ киэргэтиэхтэрэ. Бу программалар истэригэр «Кымыс – айыы Аһа» диэн алтыс төгүлүн ыытыллар кымысчыттар бэстибээл куонкурустара ураты миэстэни ылыаҕа.Ааспыт сылллааҕы бэстибээлгэ хаһааҥҥытааҕар да элбэх кыттааччы кэлэн кыттыыны ылбыта. Барыта 15 хаһаайыстыба, олор истэригэр Хаҥаластан, Бүлүүттэн, Үөһээ Бүлүүттэн, Намтан, Амматтан, Сунтаартан, Мэҥэ Хаҥаластан, Тааттаттан, Горнайтан, Уус Алдантан уонна Дьокуускай куораттан бэйэтиттэн кэпэрэтииптэр, бааһынай хаһаайыстыбалар, агропрофилированнай оскуола кыттан бэстибээл географията кэҥээбитин көрдөрбүтэ.Бэстибээли саҕаланыаҕыттан Дьокуускай куорат дьаһалтата, онтон салгыы хаһыс да сылын “Туймаада” Агрохолдинг тэрийэн ыытар. Бу тэрээһини киһи үөрүөн Благовещенскайтан «Амурагроцентр» компанията спонсордаан биһиги төрүт аспыт сөргүтүллэн сайдарын туһугар атын регионтан кэлэн көмөлөһөллөрө олус хайҕабыллаах. Манна бэйэбит хампаанньааларбыт кэлэр өттүгэр кыттыһан төрүт аһылыкпытын оҥоруу сайдыа диэн эрэбил баар.Ааспыт сыллааҕы бэстибээлгэ кимнээх кыайыы кынаттанан дойдуларыгар барбыттарай?  1 миэстэ – Хаҥалас улууһуттан «Улахан Алаас» – баһылык Лиханов М.П

2 миэстэ – «Бөртө сылгы собуота» ХЭТ – дириэктэр Павлов А.В.

3 миэстэ – ИП Федоров В.И.

Итини таһынан бэстибээлгэ алта номинацияҕа хаһаайыстыбалар күрэхтэспиттэрэ.

Быыстапка миэстэтин киэргэтии – «Кыһыл Кулаада» КФХ – баһылык Варламов П.И.

Производствоны көрдөрүү – ИП Турантаева М.П.

Кымыс оҥоруутун үгэстэрин тутуһуу – Балаҕаннаах орто оскуолата – дириэктэр Жендринскэй С.А.

Саамай уопуттаах кымыс оҥорооччу – “Эйгэ Ил” КФХ – баһылык Васильев П.П.

Биэни түргэнник ыаһын – “Саха сүөһүтэ” СӨ СКТ – салайааччы Артемьев А.Е.

Эдэр кымыс оҥорооччу – Охлопков С.К.

Бэстибээл ыытааччылар маны тэҥэ 20000 кээмэйдээх өйүүр бириистэри олохтообуттар.

Бу бириистэр “Амма” СППК (Черноградскай А.А.), “Боччуо” ОСПКК (Васильев Г.К.), “Тоҕус” СПК (Сыромятникова В.И.), “Кымысчыт” КФХ (Стручкова Е.И.), “СӨ сылгыһыттарын холбоһуга” РОО (Слепцов В.С.)  бэрилиннилэр.Бэстибээлгэ элбэх ыалдьыт, кинилэр истэригэр соҕурууттан элбэх учуонайдар, хампаанньалар салайааччылара уонна бэрэстэбиитэллэрэ ыалдьыттаабыттара.Онтон бэстибээл биир саамай муҥутуур чыпчаалынан Өрөспүүбүлүкэ Ил Дархана Николаев А.С. кымысчыттар түһүлгэлэригэр сылдьан куонкурус кыттыылаахтарын үлэлэрин, кыһалҕаларын билсиитэ буолбута саарбаҕа суох.

Онтон быйылгы бэстибээл хайдах ыытыллыай?

Билиҥҥи туругунан бэстибээлгэ кыттыыга сайабылыанньа хомуйуута салҕанан бара турар. Билиҥҥитэ 10-тан тахса хаһаайыстыбалартан сайабылыанньа түспүт. Тэрийээччилэр этэллэринэн кыттааччы өссө да элбиир туруктаах.

Быйылгы бэстибээл программатынан тэрээһини арыйыы сиэрэ-туома күнүс 14 чаастан ыытыллыаҕа.

Онтон куонкурустар 15 чаастан саҕаланыахтара. Онно «Кымыс оҥоруутун үгэстэрэ», «Быыстапка турар сирин киэргэтии», «Биэни ыаһын», «Кымыс оҥоһуллуутун көрдөрүү» уонна «Эдэр кымыс оҥорооччу» түһүмэхтэргэ күрэх тэриллиэҕэ.

«Кымыс кырдала» түһүлгэҕэ ыытыллар бэстибээл ыалдьыттарыгар анаан «Дьөһөгөй Айыы»бириистээх викторина ыытыллар.

Ити кэмҥэ «Ыһыах амтаннаах аһа» диэн кымыс эгэлгэтин амсайан көрүү, тэҥнээһин.

«Кымыс-Айыы аһа» бэстибээл түмүктэрин быһаарыы уонна кыайыылаахтары наҕараадалааһын.

Онон Дьокуускай куорат олохтоохторун уонна ыалдьыттарын бэс ыйын 29 күнүгэр  ыытыллар “Туймаада ыһыаҕа-2024”  биир саха итэҕэлин, үгэһин тилиннэриигэ, сөргүтүүгэ ураты миэстэни ылар “Кымыс-Айыы аһа” бэстибээл ыытыллар «Кымыс Кырдала» түһүлгэҕэ кэлэн ыалдьыттаан, төрүт аспытын амсайаргытыгар ыҥырабыт.