Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

Сыыппараҕа көһөрүллүбүт Саха тылын быһаарыылаах улахан тылдьытын сүрэхтээтилэр

09.08.2019 08:58 0
Сыыппараҕа көһөрүллүбүт Саха тылын быһаарыылаах улахан тылдьытын сүрэхтээтилэр

Саха сирин биллиилээх суруйааччылара, норуот поэта Семен Данилов уонна норуот суруйааччыта Софрон Данилов дойдуларыгар – Горнай улууһугар сыыппараҕа көһөрүллүбүт Саха тылын быһаарыылаах улахан тылдьыта сүрэхтэннэ. Сүҥкэн үлэ аныгы көрүҥүн киэҥ эйгэҕэ таһаарыы бочуоттаах сиэрин-туомун Ил Дархан Айсен Николаев толордо.


Санатан эттэххэ, тылдьыт бүтэһик 15-с туома бэчээттэммитин кэнниттэн, Саха Өрөспүүбүлүкэтин Тылы сайыннарыыга сүбэтин мунньаҕар Айсен Николаев  Саха тылын быһаарыылаах улахан тылдьытын сыыппараҕа көһөрөн киэҥ эйгэҕэ таһаарар соругу туруорбута. Бу улахан үлэни РНА СС Гуманитарнай чинчийии уонна Хоту дойду аҕыйах ахсааннаах норуоттарын кыһалҕаларын института уонна Саха Өрөспүүбүлүкэтин Национальнай библиотеката оҥордулар.

“Аҕыйах ый устата улахан үлэ ыытылынна. Улаҕата биллибэт саха баай тылын билигин онлайн режиминэн бу тылдьыт көмөтүнэн өрөспүүбүлүкэ дьоно эрэ буолбакка, бүтүн Россия уонна атын омук дойдуларын олохтоохторо кытта туһаныахтарын, үөрэниэхтэрин сөп”, ­– диэн бэлиэтээтэ Айсен Николаев.

Бу үөрүүлээх тэрээһиҥҥэ онлайн режиминэн скайп сессия  нөҥүө АХШ, Турция уонна Япония дьоно кытыннылар.

Анкара университетын научнай үлэһитэ Умит Шахин тылдьыт сүрэхтэниитин кыттыылаахтарын уу сахалыы эҕэрдэлээтэ. Кини саха тылын элбэх сыл үөрэтэр, онон Саха тылын быһаарыылаах улахан тылдьытын сыыппараҕа көһөрүү тылы дириҥник үөрэтиигэ улахан төһүү буолуоҕа диэн бэлиэтээтэ.

Маны сэргэ омук сиригэр олохсуйан олорор саха дьоно өрөспүүбүлүкэ салалтатыгар, научнай уопсастыбаҕа уонна Саха сирин олохтоохторугар махталларын тиэртилэр. Ол курдук, Япония Токио куоратын олохтооҕо Вида Ефремова уонна АХШ Вашингтон куоратыгар олорор Вера Соловьева тыл эттилэр.

Кинилэр сыыппараҕа көһөрүллүбүт Саха тылын быһаарыылаах улахан тылдьыта интернеккэ аһаҕас туһаныыга баар буолбута дойдуларыттан ыраах олорор дьоҥҥо тылларын умнубаттарыгар уонна ыччаттарыгар үөрэтэллэригэр олус улахан суолталааҕын бэлиэтээтилэр. “Тылдьыты аан дойду хайа баҕарар муннугар сылдьан туттар кыах баара тылбытын үөрэтэргэ, научнай үлэҕэ туһанарга көмөлөөх“, – диэтэ Америкаҕа олорбута 20-чэ сыл буолбут Вера Соловьева. Кини бүгүн климат уларыйыытын туһунан докторскай диссертацияны суруйа сылдьар.

Өрөспүүбүлүкэ баһылыга тылдьыты оҥорууга кыттыбыт дьоҥҥо барыларыгар барҕа махталын биллэрдэ.

“Саха тылын быһаарыылаах улахан тылдьытын сыыппараҕа көһөрүү биһиги тылбытын, култуурабытын, омук быһыытынан уратыбытын үйэлэр усталарыгар харыстыаҕа, тылбыт баайын кэлэр көлүөнэлэргэ тиэрдиэҕэ. Ити тылбытын үйэтитиигэ, сайыннарыыга улахан кылаат буолар” – диэн түмүктээтэ Айсен Николаев.

***

Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата   

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»