Курс валют
$
63.85
0.37
70.6
0.34
Курс валют
Курс валют
$
63.85
0.37
70.6
0.34
Меню
Поиск по сайту

Уһун-Күөл нэһилиэгэр икки бэлиэ түгэн

05.09.2019 18:27 1
Уһун-Күөл нэһилиэгэр икки бэлиэ түгэн

Быйыл Уһун-Күөл нэһилиэгэр икки улахан суолталаах, күүтүүлээх бэлиэ түгэннэр тосхойдулар. Бастакытынан, Леонид Андреевич Попов аатынан Арыылаахха саҥа билии кыата  аһылынна. Иккиһинэн, саха норуодунай бэйиэтэ төрөөбүтэ 100 сылын туолбут үөрүүлээх күнэ үүннэ.


Саҥа оскуолаҕа 4 саҥа эдэр учуутал үлэлии кэллэ, кинилэргэ ветеран учууталлар алҕаан туран өйдөбүнньүктэри туттардылар.

Үөрүүлээх тэрээһиҥҥэ баһылыгы социальнай уонна имиджевэй бэлиитикэҕэ солбуйааччы Гаврил Еремеев, Сунтаар улууһун депутаттарын Сэбиэтин бэрэссэдээтэлэ Ульяна Попова, үөрэх билии управлениятыттан салайааччылар уонна улуус оскуолаларын дирэктэрдэрэ кытыннылар. Саҥа үөрэх дьылынан, сырдык ыраас түгэнинэн эҕэрдэлээн үөрүүнү үллэһиннилэр.

Саҥа таас оскуола ис бараана, билиҥҥи саҥа сайдыылаах кэмҥэ аныгылыы оҥоһулунна. Тутуу кэнчээри ыччакка кэрэни, кэскили, сырдыгы эрэ түстүөҕэ диэн эрэнэбит диэн ыҥырыылаах ыалдьыттар баҕа санааларын эттилэр. Ону сэргэ өйдөбүнньук бэлиэ буоллун диэн, көмүс күһүн кэлбитинэн оскуола тиэргэнигэр мас олортулар.

Ыраахтан-чугастан кэлбит ытык-мааны ыалдьыттар саха норуодунай бэйиэтэ Леонид Попов төрөөн-үөскээн ааспыт Уһун-Күөл нэһилиэгэр, кини аатынан музей дьиэтигэр ыалдьыттаатылар.

Үөрүүлээх тэрээһиҥҥэ Саха сирин суруйааччыларын делегациятын чилиэттэрэ – поэтесса, Саха сирин суруйааччыларын Сойууһун чилиэнэ Саргылаана Гольдерова – Саргы Куо, суруналыыс, суруйааччы, «Күрүлгэн» сурунаал кылаабынай редактора Афанасий Гуринов – Арчылан, Арассыыйа уонна Саха сирин суруйааччыларын Сойууһун чилиэнэ, суруналыыс Ангелина Васильева – Дайыына, Саха сирин суруйааччыларын Сойууһун чилиэнэ, поэтесса Саргылаана Спиридонова – Кэрэ Кийиитэ, суруналыыс, суруйааччы Иван Николаев – Уйбаан Уххан, суруналыыс, телеведущай Георгий Белоусов, поэтесса, Саха сирин суруйааччыларын Сойууһун чилиэнэ Ангелина Шадринова – Суоһааны, медицинскэй наука дуоктара, профессор, суруналыыс, суруйааччы Валериан Николаев, суруналыыс, суруйааччы, «Далбар хотун» сурунаал кылаабынай редактора Галина Нельбисова, суруйааччы Надежда Егорова – Намылы, мелодист Михаил Санников, суруйааччы Антонина Христофорова – Хагдаанай, суруналыыс Марта Николаева – Сарыалыйа, бэйиэт чугас аймаҕа Изабелла Попова кыттыыны ыллылар. “Баҕарабын бар дьоммор күннээх сарсыҥҥыны” тэрээһин чэрчитинэн бэйиэт аатын үйэтитии, Леонид Попов олорбут дьиэтигэр – музейга сырыттылар.

Леонид Попов элбэх хоһоонноро уонна айымньылара дириҥ ис хоһоонноох, толкуйдаах, үгүс дьон сүрэҕэр дириҥник иҥэн сылдьар. «Үтүө киһи олорон бүттэҕинэ үрдүк аата дьоҥҥо хаалар», — диэн Леонид Попов бэйэтэ эппитинии, уһулуччулаах бэйиэт аата-суола өлбөт сүппэт үйэлэниэҕэ, саха саҥалаах баарын тухары аата ааттана туруоҕа. Кини аатын үйэтитэн, кэскил, кэнчээри ыччаппытыгар иҥэрии биһиги ытык иэспит буолар.

***

«Сунтаар улууhа (оройуона)» муниципальнай оройуон дьаһалтатын пресс-сулууспата.

Обсуждение • 1

Добавить комментарий
  1. Некрасов

    Оттон Михалева — Сайа то5о кэлбэтэ?

Оставить комментарий