Сунтаарга бастыҥ килиэп оҥорор тэрилтэни быhаардылар

«Килиэп – барыга бас» Өрөспүүбүлүкэтээҕи бэстибээл чэрчитинэн «Бастыҥ килиэп оҥорооччу», “Бастыҥ кондитер”, “Бастыҥ килиэп оҥорор тэрилтэ”  улуустааҕы күрэх тэрилиннэ.

Күрэҕи Сунтаар улууhун дьаһалтатын экономическай сайдыы управлениета, МАУ Центр Бизнеса уонна култуура уонна духуобунай сайдыы управлениетын салаата иилээн тэрийдэ. Сүрүн спонсорунан Сунтаар улууһун сайдыытын фондата, ону таһынан “Якутский хлебокомбинат”, “Якутопторг” тэрилтэлэр буоллулар.

Сунтаар улууһун Аҕа баһылыга Анатолий Григорьев, баһылыгы экономическай сайдыыга уонна стратегическай былааннааһыҥҥа солбуйааччы Борис Васильев урбаанньыттарга улууспут дьонугар-сэргэтигэр сибиэһэй бородууксуйаннан хааччыйалларын биһирээн үлэлэригэр үрдүк ситиһиилэри баҕардылар.

Күрэх “Килиэптээх остуол”, “КЭНДИ- БАР” түһүмэхтэртэн турда. Судьуйалар уонна көрөөччүлэр  дьүүллэригэр улууспут урбаанньыттара  минньигэс астаах сандалы остуолларын билиһиннэрдилэр. “Бастыҥ килиэп оҥорооччу” – ИП А.Г. Львов (Күндэйэ), “Бастыҥ кондитер” – ИП Т.В. Иванова (Элгээйи), “Бастыҥ килиэп оҥорор тэрилтэ” –  ООО Сандалы  (Татыйыына фирма), “ЯХК” анал бирииһин – ИП М.В. Мекумянова (Кириэстээх), “Якутопторг” бирииһин ИП Н.А. Алексеев (Бордоҥ) ыллылар.

Күрэх түмүгэр аукцион тэриллэн киирбит үп аһымал акцияннан ыарахан ыарыыттан эмтэнэ сылдьар Никифорова Анна Борисовнаҕа ананна. Тэрээһин кыттыылаахтара минньигэс астарын “Кэскил” реабилитационнай кииҥҥэ уонна элбэх оҕолоох ыалларга бэлэх ууннулар.