Курс валют
$
92.37
0.1
99.53
Курс валют
Курс валют
$
92.37
0.1
99.53
Меню
Поиск по сайту

Олимпия: “Бырастыы гыныҥ, атын омук анала буолбуппар…”

05.09.2017 13:28 20
Олимпия: “Бырастыы гыныҥ, атын омук анала буолбуппар…”

Олимпия – саха эстрадатын дьикти таабырына.

Саха сэмэй-симик норуота тоҕо эрэ кинини  тута сэҥээрэ, астына көрсүбүтэ. Бааннаҕа сытан ыллыыр,  кытара кыыһар ис танастаах  кыыһы биьиги дьоммут сөбүлүү, буолаары буолан, кэлин таптыы, убаастыы ылыммыта дьэ кырдьык, дьикти  диэтэҕиҥ..

Бу туһунан, мин, хайаатар да бэйэтиттэн ыйытар санаалаах этим. Сыанаҕа тахсар Олимпия уонна куннээҕи олох Ланата  туох уратылаахтарый?

Балтараа чаас  устата  “Сытыы, харса-хабыра суох  кыыс” уобараһа  улам суураллан,  мин иннибэр чараас, уйан дууһалаах,  туохтааҕар да кэргэнин, оҕолорун, чугас дьонун уонна сүгүрүйээччилэрин өрө тутар  дьиҥ Далбар Хотун олороро көһүннэ.

Сорох түгэҥҥэ, сырдык дириҥ харахтара  дьэҥкир сиигинэн дьиримнэстилэр, ардыгар хоту кыыьын кытаанах тыйыс куолаһа дуораһыйда.

Олимпия оҕолорун, таптыыр киһитин кэпсииригэр ийэ, кэргэн ураты сымнаҕас саҥата иһиллэр. Туох да диэбит иһин, кини курдук сулус биһиги эстрадабытыгар уонна суох. Кини- уу,  кини-уот, кини кыайыы өрөгөйө – Олимпия!

-Мин бу уобараһы толкуйдуу сатаабатаҕым. Бэйэтэ хайдах эрэ ис-иһиттэн тахсыбыта. Онон бэйэбэр чэпчэки курдук, конкуренция суох. Эстрада ырыаһытттарын син биир тэҥнээн көрүү баар дии. Бу сахалыы, бу дэгэрэҥ диэн…  Мин уобараспар майгынныыр уобарастаах ырыаһыт аҕыйах буолан миэхэ учугэй  диэххэ сөп. Хайдах баҕарарар айыахпын-тутуохпун сөп. Барыта ис-иһиттэн тахсар буолан, дьон ону ылына, сэргии көрөр дии саныыбын,  тугу да күүһүлээн оҥоро сатаабакка, сыанаҕа бэйэбин бүтүннүү көрөөччүгэ аныыбын. Дьону кытта үлэлиирбин сөбүлүүбун, түргэнник бир тылы булабын. Дьон ис санаатын таайа сатыыбын, ол да араастаах ээ. Холобур, улуустарга сылдьан көрөбүн, бу көрөөччү лириканы ылынар, бу көрөөччү эмоциональнай күүстээх көстүүнү, сорохтор күүстээх куолаһы күүтэллэр.. Оннук кинилэр баҕаралларынан биэрдэхпинэ хардары эппиэт баар буолар.

Эйиигин «Тыын» диэн ырыа таһаарбыта дии?

-Бу ырыа кэнниттэн дьон сөбүлүүр эбит,  бу истиилбин тутуһуохпун наада эбит диэн толкуйдаабытым, артыыс араас хайысхалаах буолуохтаах диэн бигэ санааны ылыммытым. Артыыһы ким оҥорор?  Биллэн турар бүтүн хамаанда. Стилистэр, вокал биэрэччилэр, визажист, парикмахер, продюсер  бородууксуйата буолабыт. 2008 сыллаахха, ыһыахха “Тыын” ырыабын ыллаан баран  сыана кытыытыгар пакеппыттан таҥаспын хостуу сатыы турдахпына, арай Дима Васильев   Василий Шергинныын тиийэн кэллилэр. Республика саамай бастыҥ стилистэрэ! Илэ бэйэлэринэн  кэлэн үлэлиэхтэрин баҕаралларын биллэрбиттэригэр наһаа соһуйбутум. Оччолорго боп-боростуойбун, гидроперит баттаах,  кутурук таҥааас..

-Өйдүүбун ээ (иккиэн күлсэбит).

-Оннуук-оннук… бэйэм кырааскаланабын эҥин,  харахпын хаап-хара гына-гына.. наһаа күлүүлээх… Кинилэр ону көрөн уруһуйдаан таһаардахтара дии өйдөрүгэр – бу кыыс маннык буолуон сөп эбит ээ диэн. «У нас к тебе серьезный разговор!” – диэбиттэригэр дьигис гынным, куттана санаатым ээ (күлэр),  кырбаары гыннылар дуу диэммин (күлэр). Кырдьыгынан эттэххэ, соһуйдум. «Ты такая интересная,  смешная, и вообщем…. приходи,  что-нибудь попробуем из тебя сделать..» – диэтэ Дима. Ону ол тухары итэҕэйбэккэ турабын. Кинилэр оччолорго Сахаайалаааҕы эрэ кытары бииргэ сылдьаллар,  автобус иһигэр мин көрдөхпүнэ арай. Сахаайа миэхэ Примадонна буо! Сарсыҥҥы күнүгэр автобуһунан дьэ элээрдэн кэллим ээ! ДСКаттан!  Долгуйан ахан киирдим салоҥҥа, нуучча кыыһыгар: “Меня ждут”- диэн хап-сабар сибигинэйдим. Дима көрөн “киир” диэн ыҥырда, кириэһилэҕэ олордон сыаналыыр баҕайы харахтарынан көрөөр… “Доверишься или пожелаешь что-нибудь”, – диэтэ. Мин: “Полностью доверяю!”-диэбиппин кулгааҕым эрэ истэн хаалла. Уонна дьэ биир чааһынан харахпын арыйбытыыым.. кыыып-кыһыл баттахтаах уот абытакай кыыс олорор эбиппин!  Бу санаатахха кини миэхэ эксперимент оҥорбут эбит ээ (күлэр). Оччолорого оннук кыһыл эҥин баттах диэн олох суох этэ. Чэ, ол курдук уобараһынан ыллаан бардым. “Будешь ко мне ходить, будешь делать то, что я говорю”, – диэн эппитин истээччи буолан, мин этэргэ диэри, киһи көрүөх бэтэрээ өттүгэр мөкү дьүһүннээх кус оҕотуттан кыталык куоҕа кубулуйа түстүм.  Мин уларыйыым, араас уобараһы ылынарым тэтимнээх этэ, ол хаартыскаларбынан да көстөр, олох эволюция барбыт эбит.

Мин санаабар Дмитрий Ваисльевка эмиэ  ити “Тыын” диэн ырыаҥ дьайбыта буолуо?

-Оннук. Ити ырыа миигин кынаттаабыта, мин айар үлэбэр күлүүс буолбута. Дима  тас дьүһүммүн оҥорбута, Ньургуяна Яковлеваҕа анаан-минээн көстүүм тиктэрбитим, кини эмиэ биир ураты  стилист буоллаҕа. Уонна дьэ, сыана миигин күүппүт курдук оборон барбыта! Бэйэм да айар үлэҕэ уһулуччу ылсан үлэлээбитинэн бардым. Билигин санаан көрдөххө, талаан эрэ быһаарбат эбит, төһө үлэлиириҥ, кыһалларыҥ эмиэ улахан оруоллаах. Мин үчүгэйдик ыллыыбын, мин сулуспун диэн биир таһымҥа тохтоон хааллаххына, эйиигин түргэник умналлар. Көрөөччү, биир өттүнэн, кытаанах, тыйыс диэн этиэххэ сөп. Онон кинини убаастыыр, сыаналыыр эрэ артыыс кэрэхсэнэр.

-Онтон эн “бу, мин артыыс”, “дьоҥҥо сөбүлэтэр ырыаһыт  буолбут эбиппин” диэн хаһан санаабыккыный?

Лана Степанова.

-Саҥа ырыа кэнниттэн. Лана Степанова диэн устудьуон саҕаттан ыллыы сырыттаҕым дии дьиҥэр. Онтон бу куоҥкуруска кыттан, уобараспын уларытан, дьон сөбүлээн сакаас бөҕө киирэн барбыта. Кырдьыгынан эттэххэ, төбөм эргийэн ылбыта. Хата, үчүгэй доҕоттордоох буолан начаас сиргэ түһэрбиттэрэ.

Чуолаан ким?

-Лэгэнтэй, холобур. Кини  биир дойдулааҕым буолан, мин туспар куруук  ыалдьар, кыһаллар. Бэл, диэтэр биирдэ этиһэн турабыт. Биһиги эстрадабыт биллэр ытыктанар киһитэ  кэнсиэригэр ыҥырбытыгар мин  “сулус” саҕа санана сылдьар кэммэр “ээ, суох сатаммаппын, баҕарбаппын” диэн хоруйдааччы буоллум. Ону киһим улаханнык уордайда. “Бачча улахан киһи эйиигин кэнсиэригэр ыҥырбытыгар туоххун барытын быраҕан туран сүүрэн кэлиэхтээххин!” – диэн дэлби мөҕөн ытата сыспыта. Итинник  түгэннэр баар этилэр. Оннук буолан билигин мин киһилии киэппин сүтэрбэтэх буоллаҕым. Уонна, уопсайынан ылан көрдөххө, биһиги эстрадабытыгар  киһилии судургу сыһыан элбэҕи быһаарар. Эстрада диэн улахан коллектив буоллаҕа. Эн төһө да улахан ураты куоластаах сулус  буол, бэйэҥ эйгэҥ дьонугар сөбүлэппэт буоллаххына, эйиигин кэнсиэрдэргэ ыҥырыахтара суоҕа. Мин продюсер буоллахпына, холобур,  дьүөгэбин ыҥырыам этэ дии.. Ол курдук.

– Туох да диэбит иһин,  урут эн бу эпатажнай Олимпия диэн эбит буоллаххына, билигин “Олимпия домохозяйка” диэн уобарас  баһыйар  буолан хаалла быһылаах. Биһиги Олимпиябыт ханна барда?! Тугу эмэ куутэбит дуу, суох дуу?

– Аа, итиннэ миигин  табаарыһым Игорь Егоров эмиэ мөҕүттэр. Кини үлэлээбитэ олох өр кэм буоллаҕа дии. Чугас доҕорум-атаһым, айар үлэбэр сүрүн сүбэһитим. «Ол да буоллар, эйигин  норуот итинник эпатажнай уобараскынан таптаабыта, ырыа холоругун быһыытынан ылыммыта. Онтон билигин…  Оннук-маннык чебурек астыы астыыгын, аны  бешбармак астыырын эрэ хаалла, ханнык арыы үчүгэйий эҥин диэн..  бу туохха нааданый баапще. Наадалаах этэ!”-  диир.

-Онтон бастатан туран дьахтар, дьиэ-кэргэн хаһаайката буоллаҕыҥ, эмиэ да биир өттүнэн.

Дьиэ кэргэнэ.

-Аһаа оннук буо!  Оҕо көрүүтүн уоппускатыгар олордоҕум уонна бэйэбин хайдах саататынабын диибин. Кэргэн таҕыстым, оҕолоннум, мин астаабатахпына ким астыай диир буоллаҕым. Ону наһаа сырдатыма ээ диир. “Суп от Олимпии, кафе от Олимпии” эрэ диириҥ хаалла диэн күлүү гынар. Син биир наһаа итинникэ киирэн хаалыма, уобараскын тута сырыт диэн сүбэлиир.  Декреттэн тахсан эрэбин ээ, бээ тохтоо диибин. Өр баҕайы олорон итинник  таҕыстаҕа дии. Ол  эрээри  бэйэбин  хаһаайка, дьиэ кэргэн ийэтин быһыытынан  биллэрбиппин кэмсиммэппин. Ол миигин  дьон хараҕар түһэрбэтэ, хайа эрэ өттүнэн  төттөрү үчүгэй буолла. Күннээҕи олох барыбытыгар баар буоллаҕа.

-Оччотугар айар үлэҕэр саҥа саҕахтар күүтэллэр дуо?

– Бу маннык өр кэм күүттэрэн баран,  чаҕылхайдык тахсаары былаанныыбын. Мин бу баарбын, эдэрдии эрчиммин сүтэрбэтим дэтэрдии. Испэр баар уотум өссө күүскэ умайарын кэрэһэлиир улахан шоу көрдөрүөхпүн баҕарабын. Билиҥҥи шоулар биир үксүн тыыннаах тыас-уус, оркестр доҕуһуола буолан хааллылар. Мин атын форматы, үҥкүү-битии, араас бэлиэ түгэннэри (фишки) туттуохпун баҕарабын, норуот соһуйарын курдук. Сороҕор абардыннар даҕаны, үөрэн-ытаан да ыллыннар,  ньиэрбэлэрин, уйулҕаларын хамсатар гына…Айар кэнсиэрим балаҕан ыйын 23  күнүгэр 5 уонна 8  чаастан Опера уонна балет театрыгар  буолуоҕа.  Манна биири тоһоҕолоон этиэхпин сөп. Бу кэнсиэр хаһан да, ханна да хатылыаныа суоҕа.

2010 сыллаахха  тахсыбыт кэнсиэрим курдук DVD диискэҕэ дуу, НВК-ҕа дуу  ханна да суруллуо, көстүө суоҕа. Мин ол кэнсиэрбин көрөөччүгэ эрэ анаан оҥорбутум, онно кэлбит миигин таптыыр, миэхэ итэҕэйэр эрэнэр сүгүрүйээччилэрбэр. Дьиҥ бэйэм дьоммор! Өйдүүргүт буолуо, “айдааннаах” соҕус кэнсиэр буолбута. Театырга звоннаан  хатылаан дии сатаабыттара,  каассаны буомбалаабыттара. Доҕорум Евгений Охлопков төһөлөөх этэ сатаабытай, хатылыахха, бэлэм көстүүмнэр, реквизиттэр,  театыр сыаната баар диэн – ону сөбүлэспэтэҕим. Коммерческай бырайыак буолуон баҕарбаппын диэн. Ол түгэннэри бу кэлэр кэнсиэрбэр экраҥҥа көрдөрүөм, уонна баҕар уон-хас сылынан аныгыс кэнсиэрбэр эрэ, буолаары турар нүөмэрдэри хатылыам.

– Хомойуох иһин көтүппүт эбиппин. Чахчы ол кэмҥэ улахан, дьон уоһуттан түспэт кэнсиэр буолбута. Мин өйдүүрбүнэн тирии  кыһыл… чэ көнөтүнэн этиэххэ, туруусуктаах сыанаҕа тахсыбытыҥ быһыылааҕа, өссө туох баар этэй?

-Көмүс хоруоп баара, ону сорох дьон абааһы көрбүтэ. Ол реквизит анаан-минээн  кэнсиэргэ диэн оҥоһуллубута, ону бүппүтүн кэннэ аҕа саастаах дьон сүбэтинэн 12 чаас иннинэ  алҕаан баран умаппыппыт.  Биир нүөмэргэ сэргэҕэ баайан баран  хаанынан ыспыттара… эмиэ анаан-минээн сабыс саҥа ваанна атыылаһан  шариктарынан  толорон кэбиспиппит. Итинник интэриһиэнэй түгэн элбэх этэ..

– Евгений Охлопков курдук бастыҥ режиссер суох буолбута кырдьык, биһиги эстрадабыт  улахан сүтүгэ…  

-Женям суоҕа хомолтолоох…  Кини миигин төһөлөөх көрдөспүтэй, кэнсиэрдэ оҥоруох, эн пластилиҥҥын диэн…  Бу санаатахха мин кэнсиэрбэр туох баар баҕа санаатын, айар фантазиятын таһаардаҕа дии. Ол иһин түмүктэммитин кэннэ улаханнык чэпчээбитэ… Онтон бу сырыыга,  дьиҥнээх чаҕылхай туруорууну  Наталья Кралина эрэ кыайыан сөп диэн кэнсиэр дириэктэрэ Лиза Газизова  уонна стилист Дима Васильев буолан  быһаарбыппыт. Билигин  кинини кытары күүстээх бэлэмнэнии бара турар, араас үҥкүү үөрэтэ сылдьабын,  ырыаһыт эрэ буолбакка үҥкүүһүт быһыытынан эмиэ көстүөхпүн баҕарабын.  Саҥа ырыалар, сабыс-саҥа көстүүмнэр, реквизиттар, чугас доҕотторум – дьону соһутар, долгутар түгэн элбэх, ону барытын арыйбаппын, кэлбит дьон көрөн сыаналыаҕа диэн эрэнэбин.

– Эн, аһаҕас киһигин. Билигин бары көрөр-истэр инстаграммытыгар бэйэҥ тускунан аһаҕастык суруйаҕын. Биирдэ кэргэн тахсыбыккар элбэх кириитикэ баар буолбута диэн ис санааҕын арыйбыккар уйадыйа аахпытым.. Киргиз уолун олоҕун анала буолбуккар дьонуҥ хайдах ылыммытай, публика?

-Ити…  Мин ис дууһам биир уйан өрүтэ….  Кырдьык утарар киһи элбэх этэ! Билбэт дьонум…  интернет  нөҥүө араастаан саҥарбыттара…  баҕар, миигиттэн кэтэһэллэрэ буолуо, билигин даҕаны онон… бырастыы көрдөһүөхпүн баҕарабын. Бырастыы гыныҥ мин олоҕум аргыһа  атын омук буолан хаалбытыгар, кинини таптаабыппар, киниттэн икки оҕону күн сиригэр көрдөрбүппэр….

-Тоҕо, эн, бырастыы көрдөһүөхтээххин? Киһи бэйэтин олоҕун бэйэтэ быһаарар, аналын бэйэтэ талар буоллаҕа…

-Кинилэр ону миигиттэн эрэйэр курдуктар. Онон бырастыы гыныҥ диирбиттэн улаханнык алдьаммаппын. Санаабар улаханнык  кыыһырбыттар, абарбыттар, хомойбуттар. Хайыахпыный, таптал диэн кырдьык эйигиттэн ыйыппат! Саастан, омугуттан, социальнай балаһыанньатыттан тутулуга суох эбит. Мин билигин ол хомойбут аһыыбын, инстаграмҥа да таһааран буолуо, ыыттым…   Онно суруйбутум хайдах көрсүбүппүн, хайдахтаах курдук барыта судургу, буолуохтааҕын курдук баран испитин. Оҕо саас тапталын курдук ыраас иэйии киирбитин. Кинини кулуупка төрөөбүт күҥҥэ сылдьан көрсүбүтүм уонна устунан дьылҕабыт бэйэ-бэйэбитин көрсүһүннэрэн барбытын. Кэлин телефонум нүөмэрин биэрэн, кэпсэтэн,  киһи быһыытынан улам чугастык билэн барбытым.  Миигин баай-талым, кыахтаах да дьон эккирэтэ сатаабыттара эрээри, төттөрүтүн отой сөбүлээбэт  чугаһаппат буоларым. Онтон Бакай  эдэр оҕолуу подъезка, кэмпиэт, мин сөбүлүүр груша суокпун аҕалан турар буолааччы. Ити судургута, миэхэ болҕомтото улам  сүрэхпин сүүйбүтэ, бу “мин киһим” эбит диэн бигэтик өйдөөбүтүм.  Кырдьыгынан эттэххэ атын омукка итинник утарар сыһыан баарын олох билбэт этим. Ол туһунан толкуй да суох этэ, оҕолонон баран биирдэ билбитим уонна наһаа соһуйбутум. Кытайга эҥин олоро сылдьыбыт буолан араас омук доҕотторум элбэх буолан эбитэ дуу, киһини омугуттан сылтаан абааһы көрүөххэ сөп диэн өйбөр да суох этэ. Хайа баҕарар омукка үтүө да, мөкү да киһи баар, биһиэхэ да дьон араас, киһиэхэ саамай сүрүнэ – майгыта диэн бигэ санаалаахпын.

– Оттон чугас  дьонуҥ хайдах ылыммыттарай?

Олимпия төрөппүттэрин, бииргэ төрөөбүттэрин кытары.

-Сэрэхэчийбиттэрэ. Аҕам таптаабыт буоллаххына, үтүө киһи буоллаҕына утарбаппын диэбитэ. Онтон ийэм, дьахтар киһи быһыытынан, биллэн турар, кыыспын илдьэ баран хаалыа, атын итэҕэллээх киһи баҕар атаҕастыа диэн сэрэнэ санаабыта. Өр баҕайы чугаһаспыта. Бакай наһаа үлэһит, дьонум дьиэтин өрөмүөннээн, балконнарын өстүөкүлэтин оҥотторон  уонна оттон билигин икки оҕолонноҕум дии, күтүөтүгэр итэҕэйэр эрэнэр буолла, ол да буоллар, биирдэ эмэ оҕолоргун сахалыы иит эҥин диэн этэн ылаттыыр (күлэр).

-Оҕолоруҥ полиглот буолаллара буолуо?

-Улахан кыыс билигин  үс тылынан саҥарар. Икки тылынан саҥарыа диэбитим интернет, ютуб диэн баар эбит, туохтааҕар да күүстээх! Онон нууччалыы отой тыбыыран олорор, наһаа мааны кыыш ( манньыйар).

-Оҕо иитиитин хайдах көрөҕүн? Тугу барытын көҥүллүүгүн дуу, хааччахтааһын баар буолуохтаах дуу? Арай дьэ, бэйэҥ курдук айар үлэлээх дьон  буолан туруохтара, ийэлэрин курдук аһаҕас көстүүм кэтэн сыанаҕа ойон тахсыахтара?

Убайдарын кытары.

-Аһара оннук таҕыстахтарына  мөҕөрүм буолуо (күлэр). Ол эрээри, аһара буойбат санаалаахпын. Оҕоҕо элбэх көҥүлү биэрэ сатыахха наада. Миэннэрэ кыргыттар буолан чэпчэки. Истигэннэр, улахан кыыһым сытыары сымнаҕас, итэҕэйимтиэ майгылаах. Ону сороҕор таһырдьа оонньуу таҕыстаҕына оонньуурун былдьаатахтарына былдьас эҥин диэн сүбэлиир буолааччым (күлэр).

 -Онтон кэргэҥҥинээн син биир менталитеккыт, итэҕэлгит атын соҕус буолуо дии, оннукка өйдөспөт түгэн бука баара буолуо?

-Оннук баар. Ханнык баҕарар дьиэ-кэргэҥҥэ мөккүһүү тахсар.  Мин эмоциялаах киһибин, кини уу сымнаҕас. Оргуйаары гыннахпына тахсан баран хаалар уонна уоскуйдахпына биирдэ чугаһаан кэпсэтэр. Ол үчүгэй. Итэҕэл өттүнэн ыллахха, миэхэ биир өттүнэн наһаа интэриэһинэй. Кинилэр түүр омуга, языческай итэҕэлтэн сотрутааҕыта көспүт буоланнар  тэҥ соҕус өйдөбүллээхпит, онон ити чааһыгар өйдөспөт түгэн аҕыйах.

Бастаан, биллэн турар, күнүүлүүр, хааччахтыыр этэ,  ырыаһыт буоларбын билэн баран уҥа сыспыта! Онтон биирдэ Уус-Алдаҥҥа үс нэдиэлэҕэ  гастролга барсан баран, тымныы кулууптарга хонорбутун, туох да усулуобуйата суох олорорбутун, тыбыс-тымныыга тахсан ыллыырбытын көрөн сөҕөн, соһуйан кэлбитэ уонна өйдүүр-өйүүр буолбута. Урут көстүүмнэрбин эҥин абааһы көрөр этэ. Ону мин муодаҕа тугу да быһаарсыбаккын эн диэн мөҕөр этим.  «Вот у твоих подруг все как у людей, у Далааны у Ники красивые костюмы, а у тебя? Все  видно – грудь, попа!” – диэн баллыгырыыр буолара. Лэгэнтэйдиин доҕордоһуоҕуттан кэргэним 180 кыраадыс уларыйда диэххэ наада.  Кини эр киһилии быһааран, бу Олимпия уобараспын, миигин  норуот маннык ылыммытын, хайдахтаах курдук үлэлээн сыанаҕа тахсыбыпын кэпсээн. Мин дьахтар киһи ону сатаан тиэрдибэт  буоллаҕым. Онон, доҕорбор Кешаҕа махталым улахан. Кини эмиэ  миэхэ “кэргэниҥ өйдөөх, муударай киһи, эйигин хайдах бааргынан ылыммыта”  диэн  куруутун санатар, быһаарар. Дьиҥэр, сүрдээх патриот, дойдутугар субу бараары сылдьыбыт  киһи миигин көрсөн манна хаалбыта ээ.

-Дойдутугар баран кэлбиккит хайдах көрүстүлэр?

-Кини Иссык-Куль диэн күөҕүнэн чэлгийэр айылҕалаах ураты кэрэ дойдуттан сылдьар. Эчи, саадка таҕыстаххына дьаабылака, груша төһө баҕарбыккынан үргээн сиигин. Улахыын да улахан тэлгэһэлэрдээхтэр,  дьиэлээхтэр, остуол хотойорунан ас. Кыргызтар, ордук соҕурууҥҥу өттүлэрэ, ураты ыалдьытымсах омуктар. Уонна Иссык-Куль бэйэтэ туристическай өттүнэн бэрт сайдыылаах сир, онон кэргэним онтон сылдьарынан  наһаа киэн туттар. Аймахтара  үчүгэй баҕайытык көрсөн, маанылаан ыыппыттара. Кырдьаҕастары, төрөппүттэрин убаастыллара, өрө туталлара тута көстөр. Уопсайынан ити  хааннарыгар баар. Чугас дьонун туһугар кыһамньылаах сыһыаннара. Кэргэним дьиҥнээх эр киһи барытын сатыыр, 40 судургу идэни баһылыыр буолуохтаах диэн өйдөбүллээх.

– Тугу үлэлиир?

-Бэйэтэ биригээдэлээх  урбаанньыт, пластик түннүктэри туруорар, массыына өрөмүөнүн оҥорор, араас үлэтэ үгүс. Дьиэтигэр биирдэ да тиэрэ түһэн сыппат, ардыгар эрэ көрдөстөхпүнэ дьиэ кэргэн күнүн оҥоробут анаан-минээн. Ас-үөл, таҥас-сап,  комуннальнай төлөбүр  барыта киниэхэ, «Эн харчыгын бэйэҕэр, айар үлэҕэр  көстүүмнэргэр,  бэйэн тускар бараа”,- диэн буолааччы.

– Онтон мөкү өрүттэрэ?

-Ммм… Бастаан чэ ол күнүүтэ этэ. Ыллаан таҕыстахпына эр дьон автограф эҥин ыла, кэпсэтэ кэлэрин сөбүлээбэт этэ. Ол ааспыта. Билигин чэ, ийэтэ асчыт буолан, аска бириинчик. Миэхэ ол саамай улахан кыһалҕа, хаһаан да санаатын таппаппын (күлэр). Тууһа тиийбэт, аһара кутуллубут, ол атын, бу маннык эҥин диэн сөп. Миини ооотой испэт, оннук астаатахпына аһаабакка куоракка кафеҕа баран аһыан сөп. Дьэ, ол отой ньиэрбэ (күлэр). Уоннааа… ураты ыраас чэнчис, барыта уурбут-туппут курдук буолуохтаах. Уоннааа…  Дьахтар үлэтин туох да иһин толорбот. Оннооҕор остуолга луоска да ылан уурбат, “бэйэн ыл, ээ” диэн  эттэхпинэ  биирдэ эрэ көрөн кэбиһэр. Хайыахпыный,  оҕобун туппутунан  ылан уурабын.  Биирдэ эрэ уруут-урут,  хат сырыттахпына хортуоска хастаан тоһуйан соһуппута, онон бүтэр. Дьүөгэлэрим кэргэттэрэ сүрдээҕин көмөлөһөллөр дии, мин эмиэ арыт оннугу баҕарбын ээ..  мэлигир!(күлэр).

-Онтон менталитета, иитиитэ оннук буоллаҕа, ону уларыппатыҥ буолуо, аны кэлэн..

-Оннуук, ийэм, убайым эмиэ оннук дииллэр.  Ийэм ардыгар мөҕүттээччи, ол эрээри, мин киниэхэ баһыйтардым диэн кырдьыгынан билинэбин. Миэхэ итинник  дьиҥнээх эр киһи наада этэ. Атын эбитэ буоллар куоппут буолуом этэ. Дьиэбитигэр бүтэһиктээх быһаарыы киниэнэ!

-Мин  кэргэним  хайа да кэрэ аҥар диэки  көрбөт, онтон эн  таҕыстаххынааа.. сыанаҕа сүүрбүтүн көрөн эрэ хаалабын… Ону мин күнүүлээбэппин, Олимпия буоллаҕыҥ дии!  Бука тулаҕар эр киһи болҕомтото өрүү баара буолуо дуу,  биитэр куттаналлара  дуу?

-Кутанналлар этэ, тоҕо эрэ… Дьиҥэр, сыанаҕа уонна күннээҕи олоххо мин атын-атыммын. Эдэр уолаттар, кэргэним даҕаны, бастаан утаа “хаппырыыс, куһаҕан майгылаах” дии саныыллар эбит. Онтулара бу дьиэтээҕи дьахтар буолан олоробун дии (күлэр).

Олимпия. Ника, Далаана.

-“Дьүөгэлиилэр” диэн холбоһуккутугар  истиҥ доҕордоһуу дьиҥ  холобурун көрөбүт. Кыргыттаргын уопсай тылынан хайдах ойуулуоҥ этэй?

-Ити кырдьык бренд курдук  буолла дии.  Күннээҕи да олоххо, айар да эйгэҕэ биһиги кытаанах холбоһук буоллубут уонна бэйэ-бэйэбитин ситэрсэн биэрэбит. Мин дьүөгэлэрим бэйэлэрин суолларын-иистэрин, тус дьоллорун булбут личность буолаллар. Тугу да киһи эбэрэ-көҕүрэтэрэ суох. Далаана бастыҥ хаһаайка, биир үксүн дьиэ кэргэним, чугас дьонум туһа диэн олорор. Маныаха сыанаҕа дуоспуруннаах Далбар Хотун эбит буоллаҕына, биһиги испитигэр кини саамай юморист киһибит. Хаадьылаан, пародиялаан быара суох ыытар. Хата мин аргыый күлэн кэбиһэ-кэбиһэ олоробун. Бары стилистэр, визажистар Далаана дьээбэлэриттэн  уҥа сытар буолааччылар. Никаж – норуот киһитэ. Наһаа оҕолуу  ыраас, аһаҕас. Биһиги курдук бэйэ эйгэтигэр биирдиилээн дьону ылынар буолбатах. Эдэр ырыаһыттары кытары билсэ, доҕордоһо охсон, кинилэргэ күүс-көмө өйөбүл буолбута баар эрэ буолар. Уонна наһаа үлэһит, гастролларынан сылдьыбатах улууһа суох буолуохтаах. Дьүөгэлэрбин хайдах баалларынан таптыыбын уонна кинилэр мин олохпор баалларыттан ураты дьоллоох киһибин дэнэбин.

-Конкуренция суох диигин да, соторутааҕыта биир килиип тахсыбытыгар эйиэхэ майгыннаппыттара  ээ.

-Аа, ону көрбүтүм уонна кырдьыгынан эттэххэ, соһуйбутум. Миэхэ туох да майгылыыр өрүт суох дии саныыбын. Чэ, баҕар хорсун-хоодуот… онтукатынан буолуо… Мин санаабар, артыыс диэн ханна сатанар, ханна табыгаһа суох диэн ис-искиттэн таайыахтааххын. Этэргэ диэри, быһах биитинэн сылдьар курдук.

Көрөөччүнү, бастатан туран, убаастыахтааххын. Эн, ити туруусуктаах тахсыбытыҥ диигин дии. Ол эмиэ барыта эрдэттэн толкуйдаммыт бүтүн хамаанда үлэлээбитэ. Көстүүмҥэ анаан-минээн мейкап, бөрөчүөскэ, ырыа – ол  барыта бүтүн уобараһы айыы этэ. Барыта толкуйдаммыт, истииллээх, үрдүк таһымнаах, үчүгэй үбүлээһиннээх буолуохтаах.  Көрөөччү ону билэр, ылынар. Оннооҕор Алексей Егоров: «Ну, ей же можно, это же Олимпия», – диэбит этэ. Аҥардас кини итинник сыаналаабыта элбэҕи этэр. Мин, бастатан туран, көрөөччүгэ анаан үлэлиибин.Хата, ити килиип тахсыбытын кэннэ миигин кириитикэлиир дьон, мин страницабар олороллорун көрөн соһуйдум уонна ыраастаатым. Миигин сөбүлээбэт эрээрилэр тоҕо суруттараллар. Ити мин тус страницам, чугас биир санаалаах дьонум баар буолуохтаахтар диэн өйдөбүллээхпин.

-Олимпия охтон да түһэрэ кырасыабай этэ ээ..

-Ол соруйан буолбатах этэ. Ника кэнсиэригэр, дьиҥинэн  бэйэтэ  тахсыахтаах этэ,  ону бэлэмнэнии кэмигэр охтон түспүтэ, ол иһин ким эрэ  декорацияны туһаныахтаах диэн буолбута. Таах хаалан хаалыа дуо? Биллэн турар, бары мин диэки ыйбыттара. Ону дьүөгэм,  көрөөччүлэр тустарыгар таҕыстаҕым дии. Репетициялаабатах буолан бассейн түгэҕэ  сымнаҕас диэн билбэтэҕим,  ол иһин ити охтон түһэн ууга бүтүннүү умсан ылбытым. Онон дьиҥ-чахчы алҕас охтуу этэ..

-Онтон төрөөбүт дойдугун кытары сибээс?  Ахтаҕын дуу?

-Дьааҥыттан тэйбитим ыраатта, оскуоланы бүтэриэхпиттэн, дьонум да манна баар буолан куорака түргэнник үөрэммитим. Ол эрээри Дьааҥым куруук сүрэхпэр! Кэлиҥҥи кэмҥэ, тоҕо эбитэ буолла, ордук хат сылдьан  ис-испиттэн тартаран, эбээннии ыллыахпын баҕарабын. Эбэм омугунан дьиҥ эбээн этэ, ол да иһин буолуо. Хомойуох иһин, тылы билбэппин, онон бу кэлэр кэнсиэргэ сахалыы ол эрэн  хотугулуу матыыптаах ырыаны ыллыам, онтон кэлин эбээннии ыллыыр баҕа санаалаахпын.

-Олимпия, эн миигинниин көрсөн,  баҕар, сорох түгэҥҥэ аһара тус өрүттэри таарыйар  ыйытыыларбар аһаҕастык хоруйдаабыккар махтанабын. Түмүккэ  “Аартык” ааҕааччыларыгар  тугу баҕарыан этэй? Аан дойдуга буола турар  балысхан уларыйыылар, дьаалхааннах да түгэннэр үөскүүр кэмнэригэр  дьон-сэргэ туохха тирэниэхтэҕий?

-Ыарахаттар хаһан баҕарар баар буолаллар. Хайа да кыһалҕа буоллун, икки өрүтүн көрүөхтээххин уонна бэйэҕиттэн ирдиэхтээххин. Тулалыыр дьонтон буолбатах. Мин тугу сөпкө гынным, баҕар, манна тугу эмэ алҕаһыыбын дуу диэн ыйытыы бэринэн, көннөрүнэргэ турунуохтаахпыт. Уонна саамай сүрүнэ, өрүү үтүөҕэ эрэ эрэниэххэ, итэҕэйиэххэ, өрүү үөрэ-көтө сылдьыахха, оччоҕо  дьол тосхойуо, барыта табыллан иһиэ!!!

***

Кэпсэттэ Анна ЗАХАРОВА,

Aartyk.ru

 

 

 

Обсуждение • 20

Добавить комментарий
  1. Ч

    Чэ, туох да диэн, бириэмэннэ киргизка буолбут.

  2. Земляк

    Сахаларга авторитета туспутэ ыраатта, мечетка ыллаа

  3. Лидия

    Олимпия молодец!Всего сама добилась талантом и трудом!Успехов,удачи, счастья!

  4. Я

    Олус үчүгэй интереһиэний интервью, Олимпия молодец!!! Наһаа зажигайдыыр, концерыгар наһаа астыммытым, Лэгэнтэй оннук же отой зажигает, энергия бөҕө, онтон И. Егоров концера тоска баилар, биир кэм ыллыыр, шоута суох. Дьоннор счас хотят зрелищ, а не просто стоять и петь, дома можно такде послушать и захрапеть

  5. Байбал

    Тонус буо, ол иьин омугумсах.

  6. николай

    Красивая пара, дети красивые будут, Олимпия молодец! Мудрая, красивая женщина! Киргизки еще красивее!

  7. татьяна

    👍🏻👍🏻👍🏻

  8. дед

    омугуттан тутулуга суох, кылаабынайа кини таптыыр, дьахтар, ийэ быьыытынан дьоллоох – ол кини оло5о, киьи суергулуурэ туох да суох! Дьоллоох буол, кытаат улэлээ-ыллаа, бар дьоннун уерт!

  9. Ологу таптыыр эмээхсин

    Хара санаалаах дьон быдьар тылгытын бэйэгит чугас дьоннутугар анаан. Туора дьон ологор бааьыман, таптал диэн таптал. Олимпия маладьыас, уунэ сайда тур

  10. Лето

    Аа пабын да саха баайыгар тахсыбакка гастер нищеброкка тахсар. Ойо суох

  11. Натстеп

    Олимпия умница,энергичная,динамичная,креативная!Настоящая северянка!Красавица!

  12. Сулус

    Биир саха уола көстүбэтэх муҥа буоллаҕа.

  13. Толина

    Олимпия! Маладьыас кытаат! Эн эстрада сулуьахын эйигин элбэх киьи корор истэр, кусаханнын учугэйгин ырытар! Дьон эйигин кусаханнын эрэ ааха сатыахтара! Онтон толлон турума! Эн олоххун атын ким да олорбот! Эн кинилэр иннилэригэр олорбоккун! Охолоргун таптаа кэргэннин таптаа. Уонна туохха да кыьаллыма! Ил эйэ эрэ тосхойдун! Дом! Дом! Дом!

  14. Битээлий

    Пахай дьаабы ди

  15. Быйанг

    пахай… саатар бэйэлэрин икки ардыларыгар кэпсэтэллэригэр төрөөбүт тылларынан кэпсэппэт эбиттэр. Саха дьонноро бэйэ-бэйэлэрин кытта төрөөбүт тылларынан кэпсэпэккэ, атын омук тылынан кэпсэтэллэрэ олус куһаҕан.. Тыла суох омукпут дуо, бу? Тоҕо бэйэбит, бэйэбит омукпут тылын хам баттыы сатыыбыт. Бэйэбит икки ардыбытыгар төрөөбүт тылбытынан кэпсэтэн, атын омуктары кытта тэҥ буолбаппытый? Тыла суох омук куруук батталга сылдьыа диэни өйдүүгүт дуо?
    Олимпия оҕолоргун эмиэ, сахалыы саҥарар гына иитэн таһааран саха дьоно оҥорон кээһээрин буоллар.

  16. Быйанг

    Олох кыһыллыбаппыт, эрин хаа омук буоларын… Саха дьоннорун кытта сахалыы кэпсэт. Оҕолоргор Саха культуратын. Төрөөбүт сахалыы тылгын иҥэр..

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»