НЬУРБАҔА ҮЛЭ СЫЛЫН ЧЭРЧИТИНЭН КҮРҮӨ ТУТУУТУГАР КҮРЭХТЭСТИЛЭР

Ньурба улууһугар быйыл биллэриллибит Үлэ уонна тыа сирин инфраструктуратын сайыннарыы сылыгар анаан, атырдьах ыйын 24 к. Куочайга күрүө тутуутугар «Үлэ күрэҕэ-2018» ыытылынна.

Тэрийээччилэринэн Октябрьскай нэһилиэк уонна улуус дьаһалталара, улуустааҕы тыа хаһаайыстыбатын департамена уонна «Биир ньыгыл Арассыыйа» баартыйа буоллулар.

Тэрээһин үөрүүлээх аһыллыыта күнүс 11 ч. хамаандалар парадтарынан саҕаланна. Эҕэрдэ тылы улуус баһылыга Алексей Иннокентьев, Октябрьскай нэһилиэк уонна улуус бочуоттаах олохтооҕо Семен Самсонов, Ил Түмэн дьокутааттара Антонина Григорьевауонна Владимир Прокопьев, улуус Сүбэтин бэрэссэдээтэлэ Сергей Евсеев, Октябрьскай нэһилиэк баһылыга Семен Корякин, күрэхтэһии кылаабынай судьуйата Тимур Пахомовэттилэр.

Күрэхтэһиигэ 5-тии киһилээх 15 хамаанда кытынна, саастара ирдэбил быһыытынан 18-тан 60 -гар диэри. Усулуобуйа быһыытынан 150-нуу миэтирэ усталаах күрүө тутуохтаахтар. Мастарын «Масстрой» ХЭТ уонна баҕаналар оннуларын Сүлэ агро-оскуолата бэлэмнээбиттэрэ. Итии аһылыгынан «Ньурба-Агро» МТС хааччыйда.

Хамаандалар сэрэбиэйинэн тиксибит сирдэрин көрөн, сиэрдийэлэрин, баҕаналарын сыымайдаан сааһыламмыттарын кэннэ, 14 чаастан ракета сигналынан түһүнэн кэбистилэр. Өтөр-наар киэҥ-нэлэмэн Куочай эбэҕэ биир күн бачча элбэх киһи тахсан күрүө туппута суоҕа. Бензопилалар, мас хатырыгын суллуур кородердар ыйылаатылар, сүгэлэр тыастара табырҕаста. Улахан бириистэр туруоруллубуттара күүстээх үлэҕэ көҕүлээтэ. Күрүө тутааччылар истэригэр кэккэ тэрилтэлэр салайааччылара, спорт бэтэрээннэрэ, ыччат, улуус дьаһалтатын, Баайга-дуолга сыһыаннаһыы кэмитиэтин, култуура, үп, үөрэх эйгэтин үлэһиттэрэ, нэһилиэктэр олохтоохторо уо.д.а. бааллар. Хамаандаларыгар тэрилтэлэрин салайааччылара, бииргэ үлэлиир дьоно кэлэн көмө-өйөбүл буола, ыалдьа-кыһалла сырыттылар.

Ким-хайа иннинэ Күндээдэ нэһилиэгин отчут-масчыт дьонун хамаандата 2 ч. 55 мүн. бүтэрэ охсон кэбистэ. «Аэронавигация» хамаандата 3 ч. 25 мүн. үлэтин түмүктээтэ. Күрэхтэһии 4 чааска былааннаммыта эрээри, атыттар эмиэ үлэлэрин бүтэрэллэрин курдук, 2,5 чаас эбии бириэмэ бэрилиннэ.

Дьүүллүүр сүбэ барытын көрөн-истэн, хаачыстыбаларын сыаналаан тиһэх түмүктэри таһаарда. «Аэронавигация» хамаандата кыайыылаах буолан, сүрүн бирииһи — убаһа сэртипикээтин тутан үөрдэ-көттө. Иккис миэстэлээх күндээдэлэр уонна 3-с буолбут «Саханефтегазсбыт» филиала эмиэ сыаналаах бириистэринэн (дьааһыгынан ынах арыыта, техника уматыга, ботуруон) наҕараадаланнылар.

Итини таһынан биирдиилээн анал ааттар олохтоннулар. «Саамай аҕа саастаах күрүө тутааччы» — Игорь Саввинов(Күндээдэ нэһилиэгин тыа хаһаайыстыбатыгар исписэлииһэ), «Саамай эдэр күрүө тутааччы» — 18 саастаах Василий Никифоров(Хаҥалас) уонна Александр Иванов(баһаарынай сулууспа); «Саамай түмсүүлээх кэлэктиип» — «Саханефтегазсбыт» филиала, «Мааны туттуу-хаптыы» — Афанасий Николаев, Александр Варламов(Күндээдэ), Рудольф Баишев («Ньурба-Агро» МТС), Айталин Кычкин.«Кыһамньылаах үлэһит» — Егор Прокопьев (Баайга-дуолга сыһыаннаһыы кэмитиэтэ), Семен Иванов (финансист), Василий Чарпыков (Дьиикимдэ), Василий Петров (култуура департамена) биһирэбил бириистэринэн бэлиэтэннилэр.

Бу сонун уонна олус наадалаах тэрээһин түмүгэр Ньурба улууһун биир киэн туттуутунан буолар маанылаах улахан ходуһаҕа 2 км тахса усталаах күрүө тутулунна. Куочай манна оттуур дьонун күүһүнэн салгыы маннык күрүөлэнэн эргитиллэн хааллаҕына, сиртэн ылыллар быйаҥ элбииригэр, элбэх от оттоноругар кыах биэриэҕэ.

Култуура департаменын үлэһиттэрэ тэттик куонкуруһу тэрийдилэр. Аһанньаҥнар күрэхтэрэ, луому сиргэ дириҥник батары саайыы, улахан лэкэчэги ыраахха быраҕыы, массыынаны соһуу түһүмэхтэрдээх. Кыайыылааҕынан Александр Андреев тахсан электрическэй лобзик бирииһи тутта. Иван Иванов — 2, Василий Николаев — 3, Роман Мандаев 4, Петр Осипов 5 миэстэ буоллулар, сыаналаах бириистэринэн бириэмийэлэннилэр.

Күрүө тутуутугар күүстээх үлэ бырааһынньыгын туһунан сиһилии улуус хаһыатын аныгыскы нүөмэригэр ааҕыаххытын сөп.

***

Ааптар: Геннадий Антонов.