МААЛЫКАЙ “МИЧИЛИГЭР” БАЙАНАЙ МИЧИК АЛЛАЙДА

Ньурбаҕа Бордоҥ нэһилиэгин «Мичил» уһуйааныгар булт-алт баатын таҥаратын Баай Байанай күнүн бэлиэтээтилэр. Утуму салҕыыр үтүө тэрээһини таһырдьа ыыттылар. Аҕалар хамаандалара мындыр быһыыны, сатабылы, бэргэн ытыыны тургутар күрэххэ кытыннылар. 

Ньурба Маалыкайыгар Байанай ыйын иккис субуотатыгар «Мичиллэр» уһуйаан оҕолорун аҕаларын ыҥыртаан булт-алт сиэрин-туомун билэри, түргэн-тарҕан туттууну, сэниэлээх хамсаныыны эрэйэр күрэх ыыттылар. Мустубут дьоҥҥо бастаан уһуйааҥҥа сылдьар оҕолор хоһоон аахтылар, онтон аал уот иччитин Хатан Тэмиэрийэни айах туттулар, Баай Барыылаах Байанайга булчут алгыһын эттилэр.

Тэрийээччилэр уонна көрөөччүлэр булт диэн баран муннукка ытаабыт, дьиҥ сахалыы
тыыннаах ыал аҕата элбэҕиттэн үөрдүлэр. Дьиҥэр, күрэххэ түөртүү киһилээх икки хамаанда кыттыахтааҕа. Ону аҕалар көрдүһүүлэринэн биэстии киһи гыннылар. Ол да үрдүнэн, хамаандаҕа хапсыбатах үс киһи (Ньурбатааҕы ДЮСШ филиалын дириэктэрэ, нэһилиэктээҕи Аҕалар түмсүүлэрин салайааччыта Сергей Можуков, Кэрэ эйгэ оскуолатын дириэктэрэ Афанасий Потапов уонна Прокопий Иванов) сэбиэдиссэй Алёна Такырованы уонна ыстаарсай иитээччи Оксана Васильеваны кытары дьүүллүүр сүбэҕэ киирдилэр.

Атыттар «Эрчим» (Лука Петров, Леонид Ушканов, Николай Слепцов, Артем Семенов,
Сивцев Роман) уонна «Хантер» (Андрей Петров, Владимир Иванов, Владимир Андреев,
Аркадий Андреев, Федор Ушканов) диэн хамаандаларга араҕыстылар. Бэйэлэрин
билиһиннэрээт, девизтарын этээт, уолаттар үлэ үгэнигэр түстүлэр.

Бастакы түһүмэххэ уочаратынан сүүрэн кэлэн утуйар мөһөөччүккэ киирэн тахсан баран мас хайытан, кутаа оттон күөс уутун оргуттулар. Нэһилиэк баһылыга Леонид Ушканов уолаттарын сатабыллаахтык дьаһайан, бэйэтэ умаппыт кутаата биэдэрэлээх ууну урут оргутан «Эрчим» хамаанда бастакы түһүмэххэ кыайда.

Иккис түһүмэххэ элбэх киһи күлэн быара быһынна. Манна бастакы киһи пластик
бытыылканы хайа быһан оҥоруллубут «хайыһарынан» сүүрэн, аара кыра дьөлөҕөһүнэн
сыылан, оҕо горкатынан халтарыйан түһэн «эһэни» (хаар симиллибит куулун) үөрбэлиэхтээх, онтон «эһэтин» сүкпүтүнэн иккис киһитигэр сүүрүөхтээх. Манна олохтоох дьаһалтаҕа спорт уонна эдэр ыччат бэлиитикэтин отделын салайар Андрей Петров («Хантер») үйэтин тухары бытыылканан оҥоһуллубут атах таҥаһынан сылдьыбыт курдук кыырайда. Дьөлөҕөскө солоҥдо курдук төбөтүн оройунан субурус гынна, «эһэтин» кыр өстөөҕүн курдук кыламмытынан үөллэ уонна били сору көрүө диэбит горкаларынан бытыылка «хайыһарынан» отой да ыллыы-ыллыы халтарыйан түстэ. Ол кэннэ «эһэтин» сүкпүтүнэн биэтэккэ биир бэйэтэ биэс буолан соҕотохто кутулла түстэ.

«Маамыкта быраҕыытыгар» хамаандалар иккиэн табыллыбатылар. Уобуруччалар бары мас
эмэгэттэртэн киэр тэйдилэр. «Балыктааһыҥҥа» (мастан оҥоһуллубут балыктары
күрүчүөгүнэн иилэн хостооһун) тыа хаһаайыстыбатын исписэлииһэ Владимир Андреев икки
төгүл, аныгылыы эттэххэ, «камбэктаата». Николай Слепцов хаптарбыт балыгын
ахсаанынан кинини кыайан истэҕинэ, мааһын табан, күрүчүөгүн сиринэн соһон
«моньуобурдаан», 11:9 ахсаанынан куоһарда. Онтон манньыйан, биэтэккэ сүүрүөхтээҕин
умнан, өттүк баттанан туран хаалла. Утарылаһааччыта сир ыла турда. Уонтан тахса миэтэрэ ыраатта. Кэмниэ-кэнэҕэс, дьоно тугу хаһыытыылларын истэн, Болуодьа үргүбүт таба курдук
ыстанна. Уонна ол айылаах аппыт киһитин аҕыйахта ыстанан ситтэ.

Салгынынан ыган ытар саанан сыал ытыытыгар анаан «Мичил» харабынайа Алексей
Никифоров кус, куобах, тииҥ, бөрө уруһуйдаабыт. Нэһилиэк баһылыга Леонид Ушканов кэнники сылларга биллэрдик элбээн сылгыга-сүөһүгэ сэрэхтээх буолбут бөрөлөргө таала чахчы кырыыламмытын көрдөрдө — икки буулдьата иккиэннэрэ чопчу бөрө аҥар хараҕар кэккэлэһиннэрэ кэриэтэ тобулу түстүлэр. М.В. Мегежекскэй аатынан оскуола дириэктэрэ Федор Ушканов да хаалсыбата. Бэргэнник ытыалаан түмүгү тэҥнээтэ, «Хантер» хамаанда уоста сыспыт эрэлин хаттаан күөдьүттэ.

Эт үөлэн буһарыыга эмиэ ити биригээдэ кыайда. Ол эрэн, «өй күрэҕин» түмүгүнэн ахсаан
тэбис-тэҥ буолла. Онон быһаарылаах түмүгүнэн ханаат тардыһыыта буолла. Дьэ, манна саҕаланна — эрбии тииһинии эрийсии, хабырыныы хатана, күөмэй хайдарынан кыланыы, хаарга төкүнүйүү,
охто сытан ханааты тииһинэн тиниктэһии.

Уһун сындааһыннаах киирсиигэ бары да аһара эстибиттэригэр, бастакы омуҥҥа
бүдүрүппүттэринэн туһанан, «Хантер» эрэттэрэ түмүктүүр кыайыыны ситистилэр.

Өрөгөй өрө кууспут хамаанда дьоно көтөх муҥунан собо «мүһэлэннилэр». Хотторооччулар
да өттүк харалаах, көҕүс сүгэһэрдээх буоллулар — уһуйаан сэбиэдиссэйэ Алёна Такырова
кинилэргэ биирдии киилэ тугунуок туттарда.

Күрэх быыһыгар өссө биир кэрэхсэбиллээх викторина буолан ааста. Ону урут булчуттарга
уонна балыксыттарга аналлаах «Байанай» сурунаал эрэдээктэринэн үлэлээбит Александр
Егоров ыытта. Саҕалыан иннинэ:
— Мустубут эр дьон барыта кыттар, көрөөччүлэр эмиэ. Кыайбыт киһиэхэ «Байанай»
сурунаалга эһиил сыл аҥара буор босхо суруттарыыны «Илгэ» бэчээт дьиэтин дириэктэрин
Юрий Петрович Борисов аатыттан мэктиэлиибин, — диэн соһутта даҕаны, үөртэ даҕаны.
Оччону истибит дьон бэрт эридьиэстээх ыйытыктарга эрилиннилэр. Уустук ыйытыктарга үс сөп хоруйу бастакыннан биэрэн викторина кыайыылааҕынан Лука Петров буолла. Уонна эһиил босхо кэлэр «Байанай» сурунаалын сертификатын тутта.

Ол кэнниттэн тэрийээччилэр флешмоб үҥкүү ыыттылар уонна мустубут дьону оҕолуун-уруулуун барыларын таһырдьа тардыллыбыт сандалы маанытыгар ыҥырдылар. Онно «Мичил» үлэһитэ Дмитрий Степанов сибилигин үөлбүт шашлыгынан, повар Майя Степанова ытыйбыт дагдатынан, уһуйаан атын үлэһиттэрэ астаабыт арыылаах алаадьыларынан уонна да атын сэмсэ аһынан күндүлээтилэр.

Байанай ыйынааҕы аҕалар күрэхтэрэ мантан иннэ сылын аайы ыытыллар үтүө үгэс буолуо диэн «Мичил» сэбиэдиссэйэ Алёна Такырова бэлиэтээтэ.

***

Источник: ulusmedia

Ааптар: Александр Егоров