Көнө суолтан туораабакка

Саха театрыгар «Көнө суолтан туораабакка» диэн Г.И.Чиряевка аналлаах спектакль премьератыгар сырыттым. Бу спектакль норуот поэта Н.И Харлампьева драмаҕа бастакы холонуута, туруорааччы режиссер – Руслан Тараховскай. Гаврил Иосифович 40 сааһыгар Саха сирин салайааччытынан ананар уонна 17 сыл устата, өлүөр диэри республиканы салайар. 

Государственнай деятель, бу соторутааҕыта олорон ааспыт киһи,  олоҕун, үлэтин-хамнаһын, өйүн-санаатын тиһэн көрдөрүү уустук сорук. Ол да буоллар талааннаах суруйааччы Наталья Харлампьева геройун уобараһын олус үчүгэйдик нарылаан, аттаран көрдөрбүт. Оччотооҕу политика, быһыы-майгы тыынын чопчу биэрбит. Долгутуулаах уонна итэҕэтиилээх дьүһүйүү буолла. 

Омугун, норуотун туһугар кыһаллар дьиҥ чахчы киэҥ көрүүлээх, үрдүк таһымнаах, ырааҕы өтө көрөр салайааччы уобараһа олус табыллан көрдөрүлүннэ. Сүрүн оруолу оонньообут эдэр артыыс спектакль тиһэҕэр дьиҥ чахчы 57-лээх киһи буолан хаалбыта сөхтөрдө, оруолун итэҕэттэрдэ. 

Тиһэҕэр олорон саныыгын ээ, чэпчэки кэм диэн сахаларга хаһан да суох эбит. Наар охсуһуу, наар тыыннаах хаалар иһин мөхсүү. Дьиҥнээх бас-көс киһи айылҕаттан ананан төрүүр – кини омук дурдата-хаххата буолар. Урут Чиряев саҕаттан төрөөбүт тылы үөрэтиини начальнай кылааһынан бүтэрэр дьаһал баар эбит. Ону ол диэбэккэ саха салайааччылара туруулаһан, охсуһан, киирсэн кэлбиттэр. Бүрээттэр курдук олорон биэрбэтэхтэр. Билигин бүрээт 90%-на төрөөбүт тылын билбэт диэн. 

Уопсайынан, турууласпат, эппит эрэ кэрэх ээх сылдьар салайааччылар – норуот иэдээнэ. Хайа да кэмҥэ омугуҥ туһугар туруулас диэн өйдөбүл спектакль кэннэ хаалла. 

Времена всегда неидеальные. Сорохтор «билигин атын кэм, уустук кэм, надо переждать» диэн үчүгэй кэми кэтэһэн олорон хаалаллар. Оннук буолбатах эбит – кэм биир, хаһан баҕарар уустук.

***

Источник – телеграм-канал Туйаары НУТЧИНОЙ