Курс валют
$
92.59
0.02
100.27
Курс валют
Курс валют
$
92.59
0.02
100.27
Меню
Поиск по сайту

“Бу тугэҥҥэ Игорь Егоров баар буолбута…”

21.06.2017 23:49 2
“Бу тугэҥҥэ Игорь Егоров баар буолбута…”

Комсомол болуоссатыгар эстрада сулустарын кэнсиэрэ буола турар. Сыана5а, «Икс-Ап» бөлөх тахсаатын кытары, маныаха диэри чуҥкуйан турбут болуоссат, ыҥырыа  уйатын то5о тарпыт  курдук, аймана түстэ. Сыана тула ыһыы-хаһыы, ытыс тыаһа, кэрэ аҥардар уолаттары тула өттүттэн төгүрүйэ түстүлэр, ким кумааҕы лоскуйугар, ким  постердарга, бэл диэтэр,  илиилэригэр автограф туруортара сатыыллар. Бу аймалҕаҥҥа, сыана кытыытыгар эдэркээн  уол турарын ким да бэлиэтии көрбөтө,  дьиҥэр,  кини, бу иннинэ ыллаан тахсыбыта эбээт…

 

“Бу тугэҥҥэ Игорь Егоров баар буолбута,”- диэн билигин, республика буттуунэ билэр, эстрада бастын ырыаһыта  ахта саныыр.  «Ырыаһыт хайдах буолбуккунуй, барыта хайдах саҕаламмытай, хараххын симэн, ол кэмҥэ төннөн көр эрэ,” – диэн көрдөспүппэр, Игорь бу бэлиэ түгэни өйдүү биэрдэ: «Мин, дьиҥэр,  оҕо эрдэхпиттэн ыллыыр этим. Оскуола5а сылдьан сыанаттан түспэт буоларым, онно олохтоох телевидениеҕа, саҥа ыллаан эрэр оҕону холбоон диэн сакаастыыллар этэ, онон бэйэм дойдубар, Ньурба5а, син биллэр этим.

– Ол аата,  оскуола5а сылдьан сулус этин буолла5а?

-Суох, оннук суо5а. Бары билэр буоланнар, наадыйбаттар. Буолуохтаа5ын курдук этэ. Онтон куоракка музыкальнай училище5а туттарсан киирбитим уонна уорэхпэр мэһэйдэтиэм диэн оччо-бачча ылсыбакка сылдьыбытым. Санаабар, 4 куурустан эҥин ыллаан саҕалыам диирим быьыылааҕа. Оччолорго, сана са5алаан эрэр продюсер, Аполлон Томскай, “Игорь, чэ ылсан улэлэьиэх,”- диирин, суолта5а уурбат курдук этим.  Онтон, кини, арай,  Икс-Ап бөлөҕү оҥорон таһаарда. Уолаттары хомуйда, ырыа оҥордулар, ыллаатылар, радиоҕа тахсан, биллэр буоллулар. Уонна ити  Комомольскай болуоссакка кэнсиэр буолбутугар, кинилэри хайдахтаах курдук дьон сэҥээрбиттэрин көрөн, кырдьыгынан эттэххэ, ымсыырбытым.

– Оччолорго эстрада сулустарын итинник өрө туталлар эбит ээ, билигин сыанаҕа ким да автограф ыла сүүрэрин көрбөппүн ээ..

— Ууу,  ынырык этэ. Былааһы ылбыттара. Кыыс боҕо, бу санаатахха, “Айыы куо” студия кыргыттара, уолаттары төгүрүйэн хаартыскаҕа түһүү,афтограф ылыы бөҕө, ол түгэҥҥэ  миэхэ, бу сип-сибилигин, бу  мүнүүтэттэн саҕалаан, ырыаһыт буолабын- диэн күүстээх баҕа санаа киирбитэ  уонна дьиэлээн иьэн,  Аполлоҥҥа, мантан ыла ырыаһыт буолабын- диэн эппитим. Ырыа оҥордум, бастаан табыллыбата, онтон  атын аранжировщикка оҥотторон тута сөбүлээт. «Тыа уолчаана», «Студент кыыс”,  “Ньурба  кыыһа”- үс  ырыа оҥоһуллан тахсыбыттара.  Ол кэннэ радиоҕа биэрбиппэр, биир ый иһинэн киэҥ сэҥээриини ылбыттара, онон сыанаҕа, «Икс-Ап» бөлөх  курдук  көрсөр буолбуттара (кулэр).  Дьэ, итинтэн ыла күүстээх үлэ саҕаламмыта, гастролларга сылдьан республиканы бүттүүнүн кэрийэрбит. Оччолорго оннук кэм этэ, “Руки вверх” эҥин долгуна сана кэлбитэ, ону биһиги, ол истиилинэн үлэлээн бардахпыт. Эдэр саха уолаттара тэтимнээх ырыалары ыллыырбыт, “муодунай” таҥастары таҥнарбыт,   нууччалыы эттэххэ, “ажиотаж” бөҕө буолбута. Бу, биллэн турар,  сорохторого охсуулаах этэ.

–  “Сулус ыарыыта” эйиигини хаарыйбатаҕа дуо?

-Бастаан соҺуйбутум. Ол эрээри, бу санаатахха, көрөөччүлэр аан маҥнайгыттан тута  учугэйдик көрсүбэтэхтэрэ эмиэ да үчүгэй эбит. Ол санаабын испэр тута сылдьыбытым уонна дьон сүбэтэ туһалаабыта. Ырыа бүгүн баар, сарсын суох, бугун эйиигин истэллэр, сарсын атын ырыаны сэҥээрэллэр -диэн өйдөбүл сиргэ кытаанахтык турарбар тирэх буолбута. Билигин санаатахха, ол саҕана ырыа ис хоһооно, өйдөбүлэ буолбакка, ырыа тэтимэ уонна матыыба бастакы миэстэҕэ  турар этэ… Бары да,  «Бу мин баарбын, уол оҕото”  диэн санаанан салайтара сырыттахпыт, кэрэ аҥардарга көстө-биллэ сатаан…

– Хайа эрэ түгэҥҥэ хал буолбатаҕын да?

-Ол саҕана пейджер баар этэ, маны тэҥэ  абонентскай дааһыкка сурук бөҕөтө кэлэрэ.  Аполлон анаан-минээн биһиги туспутунан хаһыаттарга эҥин суруналыыстарга суруйтарара, иннэ гынан кэнсиэр кэннэ дьонтон  куотар да түгэннэр баалллара (күлэр). Ол эрээри, хал буолбатаҕым, төттөрүтүн, ыллыыр-туойар баҕа санаам күүһүрэн испитэ.

-Музыкальнай училищены бүтэрэн баран салгыы хайаатын?

-Фортепиано кылааһын бүтэрбитим. Ол эрээри, учууталынан  үлэлии барар санаам суох этэ. Дьиҥэр, ырыаһыт буоларга музыка үөрэҕэ булгуччу наадата суох, оннооҕор, баҕа өттүнэн, дууһата хайдах сытарынан ыллыыр киһиэхэ  классика мэһэйдиэн да сөп дии саныыбын.  Ол эрээри, мин музыка  уорэхтээҕим миэхэ улаханнык туһалыыр. Уонна маннык идэлээхпинэн киэн туттабын диэххэ сөп. Ол кэмҥэ төнүннэххэ…  уолаттарым оруобуна эстрада тыйаатырыгар  үлэлии киирбиттэрэ, миигин ыҥырбыттарыгар, тэҥинэн киирэн хаалбытым уонна 2008 сыллаахха, спортка  барыахпар диэри  үлэлээбитим. Ол саҕана билиҥҥи курдук испэктээкил эҥин туруоруллубат, репетиция үрдүгэр репетиция, кэлии-барыы суоҕа, биир тылынан эттэххэ, улахан үлэ барбат этэ, сыбаайба, үбүлүөй  эрэ тэрийииннэн муҥурданыы баара… Ол курдук,  Спорт үрдүкү  маастарыстыбатын оскуолатыгар старшай тренеринэн үлэлээн саҕалаабытым. Онтон «Спортинг» хааччахтаммыт эппиэтинэстээх тэрилтэни  дириэктэр быһыытынан салайбытым, ону тэҥэ, спортинг федерациятын толорооччу дириэктэрэ этим. Ол да буоллар ырыабын бырахпакка туох баар куоракка буолар тэрээһиннэргэ барытыгар кыттарым. Ити курдук,  2011-12 сс. диэри мэйиим эргийиэр диэри үлэлиирим. Онтон эмискэ  барытын тохтоппутум… Үнтү сылайан хаалбыт курдук этим, ыытааччы эҥин быһыытынан үүнүөхпүн баҕарбытым, инник үлэҕэ, биллэн турар, ол кыаллыбат этэ… Билигин урбаанньыт быһыытынан үлэлиибин уонна сөбүлүүр дьарыктарбар – спортка, ырыаҕа болҕомтобун уурабын.

-Спортинг сыаналаах баҕайы спорт дии, аҥардас биир эрчиллиигэ тыһыынчанан харчы баранар дииллэр?

-Биир эрчиллиигэ 10  тыһыынча барыан сөп, биир күннээх эрчиллиигэ. Онтон биир курэхтэһиигэ Россияҕа баран кыттарга суусчэкэ  тыһыынча баранар. Ону уйунар буоллахха сылдьаҕын,  мээнэ киһи дьарыктаммат спорда, дьиҥинэн,  баҕалаах элбэх буоллаҕа.  Мин эмиэ, ол иһин кэлин мээнэ үчүгэйдик дьарыктаммаппын,  баҕам баһаам да, үп-харчы өттүнэн кыаҕым оннук улахан  буолбатах.

Онтон артыыс  идэтэ төһө  барыстааҕый?

– Маннык этиэххэ сөп, артыыс буоллаххына, гостэрилтэ үлэһитин хамнаһынааҕар,  чэ, икки төгүл элбэх барыстаныахха сөп. Саха сиригэр биир да улаханнык байбыт-тайбыт артыыһы көрө иликпин. Бу төрүөтэ- аудиториябыт кыратыттан тахсара буолуо. Быһа холоон  500 тыһыынча киһиттэн, эйиигин сэҥээрээччитэ эрэ истэр. Төһө да сэҥээрдиннэр, ыҥырыыга сылдьар буол, бэйэ дьыалалаах, бизнестаах дьон курдук харчыламмаккын.

Манна диэн эттэххэ, тус эйигин сугуруйээччилэрин сутэрдилэр дии. Сыанаҕа тахсарын аччаата, ырыаларгын  мээнэ истибэппит. Тоҕо? Айар үлэ кириисиһэ, биитэр тугуй?

-Дьиҥэр ыҥыраллар ээ. Сыбаайбаларга,  юбилейдарга сакааһым элбэх. Кэлин өссө элбээн иһэр курдук. Арай радиога иһиллибэппин, кэнсиэрдэргэ, тэлэбиисэргэ көстүбэппин, куонкурустарга кыттыбаппын. Тоҕо? То5о диэтэр, саҥа ырыаларым суохтар. Бу төрүөтэ-  хас да сыл куолаһым  сибээскэлэрэ ыалдьыбыттара буолар,  кыайан ырыа устубакка сырыттым. Онтукам кэнсиэрдэргэ, ол- бу араас тэрээһиннэргэ биллибэт эрээри,  студияҕа ыллыырбар, дьэ өтөн тахсар. Бу кэлин арыый буолан,  дьэ куускэ ылсан улэлээн эрэбин. Ол иһин, интервью биэрэргэ тута сөбүлэстим, түгэнинэн туһанан, айар үлэбэр болҕомто ууран, истээччилэрбин саҥа ырыалар күүтэллэр диэн эрэннэриэхпин баҕарабын.

–Игор Егоров тус олоҕо, эмиэ сэттэ күлүүстээх кистэлэҥ диэхпитин сөп.  Кэргэннээх дуу, суох дуу? – диэн ыйытыы үгүс кэрэ-аҥары долгутар буолуохтаах.

– Со5отох хаһан да сылдьыбата5ым. Гражданскайынан холбоһон олорбутум, элбэхтик, (күлэр),! Бастакы кэргэммин кытары кыыстаахпыт, кини  билигин 6-с кылааһы бутэрдэ, мин оҕом олоҕор аҕа быһыытынан мэлдьи баарбын. Ийэтин кытары кини туһугар истиҥ сыһыаммытын сүтэрбэтэхпит, онон оҕолоох буолан, сирдээҕи аналбын толордум диэн бигэ санаалаах сылдьабын.  Билигин кэргэннээхпин, сокуонунан холбоһо иликпит да буоллар, бииргэ 6-с  сылбытын  олоробут.

-Саахсаланартан, официально ыал буолууттан то5о куттана5ын?

-Куттаммаппын  гынан баран…   бириэмэ хайдах эрэ олус түргэнник барар,  сүүрүктээх өрүс дохсуннук устарын курдук барыта бэйэтин хаамыытынан балысханнык баран иһэр, барыта үчүгэй, ким да ыксаппат да курдук… онон итинник түгэннэргэ болҕомто ууруллубакка да хаалар… Эр киһи өйүн отутугар тутар дииллэрэ, кырдьык, оруннаах эбит. Дьиэ-уот, ыал буоларым туһунан билигин дьэ,  дьоһуннук  толкуйдуубун…

-Ол аата,  сурэҕим аҥара буол диирин чугаһаабыт буоллаҕа дуу?

– Оннук!

–Онтон кыыскын иитэргэр  туохха болҕомто уураҕын?

-Кини туһунан личность буоларын өрө тутабын. Улахан иитиитэ – сүрүннээн ийэтиттэн, мин аҕа оруолун толорорго дьулуһабын. Кып-кыра эрдэҕиттэн, саҥара да илигиттэн, «Эн саамай кыраһыабайгын, өйдөөххүн, түргэҥҥин, күүстээххин» – эҥин диэн мэлдьи этэ сылдьабын, итинниккэ, “программаланар” дии саныыбын. Бириэмэбин аттарынан бииргэ буола сатыыбын  уонна саамай сүрүнэ – таптал наада. Оҕону таптал иитэр.

-Эстрадаҕа чугастык билсэр, доҕордоһор дьонуҥ кимий, конкуренция диэн баар дуо?

– Оннук суох курдук. Бары бэйэбит туспа эйгэлээх буоллахпыт. Доҕотторум Вася Еремеев, Лэгэнтэй, убайдарбыт Лэкиэс, Бүөккэ Бөтүрүөп, Байбал – бары бииргэ сылдьабыт, бултка, бырааһынньыктарга.  Кыргыттартан Олимпия,  Күннэй,  Далаана буолан алтыһабыт.

– Эстрадаҕа сымыйа сурах-садьык элбэх…

– Ити – мэтээл биир өртө. Оооолох наадыйбаппын. Ким да сирэйбэр туох да диэбэт, саҥарбат. Онтон ити дьыбаан  комментатордара эҥин, баҕар,  политическэй да өттүнэн кыбытан киллэрбиттэрэ диэн… ирдэбиллээҕим бэрт буолан буолуо (күлэр). Били айдааннаах сурах, барыта оруобуна суотабай, чуолаан,  ватсап үөдүйэр кэмигэр түбэспитэ… онно, биһиги, сахалар, сонурҕаан, социальнай ситимҥэ суруллубуту  барытын итэҕэйэ, тарҕата сатыы сылдьар кэммит этэ…Билигин оннук буолбатах,  тугу эмит сымыйаннан суруй эрэ, тута биллиэ, дьон өйдөннө, информацияны сыымайдыыры сатыыр буолла. Миэхэ туох эмэ куһаҕаны, сымыйаны  сирэйбэр этэр эр киһи бу билиҥҥэ  диэри көстө илик.

– Бу теманы таарбыйбычча… эн ол, тустаахха уустук кэми,  хайдах  аһарбыккыный?

-Чэпчэкитик, (ооотой) боростуойдук, миигиннээҕэр, хата,  доҕотторум кыыһырбыттара, абарбыттара. Черный пиар буолла5а,  оруобуна мин онно рейтиным аһара намыһах этэ ээ. (күлэр)

-“Черный пиар тоже пиар” дииллэригэр дылы да?

-Черный пиар не тоже пиар, а лучший пиар. Миэхэ бэйэҥ сакаастаабытын  дуо диэхтэригэр диэри. Сөхпүтүм диэн, ситиһиилэрбин, кыайыыларбын-хотууларбын ким да итинник кэпсээбэт этэ ээ.. Ити сурах тарҕанарыгар, оруобуна,  Россия чемпионатыгар Саха сирин чиэһин көмүскүү сылдьыбытым, кыайыы өрөгөйдөөх көтөн кэлбиппэр, ол туһунан ким да кэпсээбэтэҕэ, хата, хоп-сип түргэнник тарҕаммыт этэ.

-Быыбардарга төһө үлэлэһэҕин?

-Урут-уруккуттан үлэлээн кэлбитим. Эдэр сылдьан улахан толкуйа  суох,  харчы төлөөтүлэр да,  үлэлиир эбит буоллахпына, кэлин, санаам сытар эрэ буоллаҕына,  ылсабын. Хандьыдаат ханнык партияны өйүүрүй, туох үлэни ыытар былааннааҕый, олоҕу көрүүтэ хайдаҕый-  бу барыта улахан суолтаны ылар. Харчы туһугар эрэ үлэлиир сыыһа. Сэрэхтээх буолуон сөп,  араас дьон баар.

Политиканы ол аата быһаарсар буолла5ын?

-Быһаарсабын(күлэр) Аан дойдуга, Россия5а баар политиканы сэҥээрэбин, куруук кэтиибин диэххэ сөп.

-Оччотугар, билиҥҥи балаһыанньаны туох дии саныыгын, тас дойдулары кытары сыһыаны, дойду, республика ис политикатын?

Россия –баараҕай держава, биһигини бытарыта сатыыллар. Барыбытын кыра-кыра гына арааран кэбистэхтэринэ,  биһиги, дьэ, кэхтэбит. Россия тула өттүнэн Нато буойускалара тураллар. Севастополи, Крымы ылбатахпыт буоллар, Черноморскай флопппутун үүрэн, Натолар кимэн киириэхтэрэ  этэ. Ону тугу да гынар кыахпыт суох буолуо этэ. Билигин  Аан Дойдуга сэрэхтээх буолууга биир  сүрүн  боппуруос турар: ракета ыыттахтарына, биһиэхэ дылы хас бириэмэнэн көтөн  кэлиэҕэй, ону,  биһиги  барытын куттала суох (обезвреди) гынабыт дуу суох дуу – диэн…

Украина, Россия  сыһыанын көрдөххө. Украина улахан анара биһиги бырааттыы норуоттарбыт буолаллар. Кинилэргэ  Арҕаа  политика киирэн, иһиттэн сиэтэ. Бэйэлэрин дьоннорун туруоран сокуона суох переворот онордулар, итиэннэ  “сокуонунан”, быыбар онорон былааска турбут дьон легитивнай буолан хаалаллар. Янукович үчүгэй киһи буолбатах эрээри, былааска өссө куһаҕан киһи кэлбитэ билигин өтө көстөр.  Биллэн турар, Россия улахан сыананы төлөөтүбүт –кризис, аҥардас биһигини Саха сирин ылан көрдөххө,  муостабыт тутуллааһына…. олохпут таһыма мөлтөөтө… ол эрээри,  Крымы, Севастополи ыллахпыт дии. Бу биһиги куттала суох буолуубутугар сүрүн оруоллаах.

– Онтон Саха сиригэр эмиэ дьон сөбүлээбэт саҥата элбээтэ, Ил Дархамыт утары араас утары киирсиилэр, митиннэр субу-субу куөдьүйэр буоллулар, төһө  дьалхааннаах кэм кэллэ дии саныыгын?

-Хайа ба5арар политик өр үлэлээтэҕинэ, итинник баар буолар. Бэйэм да холобурбар ыллахха, мин оннубар,  били кэмҥэ, ким баҕарар түбэһиэн сөп этэ.  Холобур, бу киһини утары хамаанда баар буолан, стратегия онорон сурах тарҕаттаххына, норуот бэйэтэ иилэ хабан ылыаҕа. Ону киһи  бэйэтэ итэҕэйэ  сыһыар диэри…

Ханнык баҕарар былаас, нууччалыы эттэххэ, «плюһа, минуһа” элбэх. Мин националист буолбатахпын эрээри,  сахалар бэйэ-бэйэлэрин өйүөхтэрин, биир сомоҕо буолуохтарын ис сүрэхпиттэн баҕарабын. Биир киһи үөһэ тахсан эрдэҕинэ, аллараа тардар куһаҕан кэмэлдьибитин  умнуох, бэйэбит дьоммутун өйүөх тустаахпыт

– Эстрадабытыгар төннүөх. Таһыммыт хайдаҕый?

-Куһаҕана суох. Хаачыстыба өттүнэн, вокальнай талааммытынан үрдүк таһымҥа турабыт диэххэ наада. Биһиги бэйэбит эйгэбитигэр сылдьабыт буо. Сахалыы ыллыыбыт. Биир эмэ киһи  нууччалыы ыраастык ыллыыра эбитэ буоллар, онно продюсердаах, өйөбүллээх буоллаҕына, Россия эстрадатын таһымыгар аа-дьуо  тахсыан соп этэ. Саха Сириттэн бааллар дии,  Дайнеко, L-ONE, манна сылдьыбыттара буоллар, баҕар биллибэккэ да хаалыахтарын сөп этэ.

-Чугас дьоҥҥуттан эйиигин ордук ким өйдүүрүй, өйүүрүй?  Дьоҥҥун кытары төһө билсэҕин?
– Ийэм, аҕам Ньурба5а бааллар, куруутун сибээстэһэбин, кун аайы телефонунан кэпсэтэбин, бара-кэлэ сылдьабын.

-Онтон сынньалаҥын хайдаҕый? Төһө «тусовкаларга» эҥин сылдьа5ын?

Сынньалаҥым булка, спортиҥҥа, ыта эрчиллэ бардахпына, сынньана сылдьар курдукпун.

Бу куһаҕан, оннук гыныма, манна күүлэйдээмэ диэн мээнэ араара сатаабаппын. Саамай сүрүнэ, куһаҕан дьаллыкка ылларыма, дьоҥҥо куһаҕаны баҕарыма уонна оҥорума диэн өйдөбүллээхпин. Дьону кытта баран алтыһан, кэпсэтэн, караоке  ыллаахтахпына,  туох куһаҕана кэлиэй, ол эмиэ айар үлэбэр эрчиллии курдук буолар.

– Онтон «Бааһынайдар” диэн өйдөбүл баар да, эстрадаҕа?  Хаһан эрэ оннук кэнсиэргэ кыттан турардааххын?

-Итинник араарар наадата суох дии саныыбын. Мин сахабын дэнэбин, төрүт сахалыы иитиилээхпин, эһэм тойугун истэн уллааппытым. Кини Ньурбаҕа биллэр улахан тойуксут, олоҥхоһут этэ. Кинини кытары оҕо эрдэхпиттэн, булка-алка, окко тэҥҥэ сылдьыһарым, оҕо саадыгар таһара, онно дьэ,  күнү быһа туойа сылдьара. Онон этэргэ диэри, норуотум төрүт культуратын эппэр-сииммэр иҥэрэн улааппытым.

– Бэйэн үөлээннэхтэргин кытары тэҥҥээтэххэ, эт-сиин өттүнэн бэйэн формаҕын тута сылдьар эбиккин. Спортинг ураты тугунан дьарыктанаҕын?

-Бассейҥҥа сылдьабын, кыралаан суурэбин, кэлин элбэхтэ сатыы хаамар буоллум. Штанганан гантелинэн улаханнык  дьарыктаммаппын, ытыыбар кыратык мэһэйдиэн соп.

– Сөптөөх аһылык?

-Биирдээ мэ оннукка киирэн ылабын. Икки эҥин ыйга саахары, тууһу, сыаны-арыыны бүтүннүү суох гынан кэбиһэбин. Бастаан утаа,  куртахпын эмтэнэ таарыйа саҕалаабытым, кэлим онтукам үгэс курдук буолла. Эт-сиин инниккэ олус сайҕанар, ырааһырар эбит, бэйэтин ыйааһынын булар. 10-тан  ордук  киилэ ыйааһыны  бырахтым.

-Кэрэ анаргыттан тугу ирдиигин, хайдах баарынан ылынаҕын дуу?

-Араас, ханнык ба5арар сыһыаҥҥа оннук баар. Кини миигитэн тугу эрэ ирдиир, мин киниттэн ирдиирим диэн, ол ирдиирин  ирдээбэтигэр…(улаханнык күлэр) өйдөөтүҥ?

Өйдөөн, өйдөөн…  (тэҥинэн күлэбин)

-Сүрүннээн, күнүү баар буолааччы, кыратык. Дьиҥэр, онно төрүөтэ диэн, билигин интернет баар, инстаграмм, фейсбук, в контакте, онно киирэн тахсарым буолар (күлэр)

Дьон эйгэтигэр сылдьар буоларым быһыытынан, доҕотторум куустэринэн киллэрбиттэрэ. Бастаан утаа, сэҥээрбэтэҕим, тоҕо,  туохха наадалааҕый диэн. Онтон сылдьан эрэ, арай өйдөөбүтүм,  кэлин онтуката суох сатаммат курдук буолан хаалбыппын,  (күлэр) дьиэбэр кэллэхпинэ,  киирэн көрөбүн, ким-ханна сылдьарын…  онно син биир кырасыабай  кыргыттар бааллар, миэхэ доҕотторго киирэллэр,  мин киирэбин…  итинниккэ кыра өйдөспөт түгэннэр баар буолааччылар… Онон кими эрэ сотторбут буоллахпына, ол мин буолбатах,  (күлэр) (оонньоон этэбин).Уопсайынан, дьону кытары кэпсэтэрбин, алтыһарбын сөбүлүүбун, ол туораттан баҕар атыннык да көстүөн сөп буолуо…  Мин олоҕу көрүүм оннук-  дьоҥҥо элбэҕи биэрэбин, оннук эмиэ төттөрү  ирдиибин, быһата, аһаҕас киһибин.

– Киэҥ араҥа Игорь Егоров туһунан өссө  тугу билбэтий?

-Туох да кистэлэҥ  суох. Кыратык сүрэҕэ суохпуун, солуннары  көрө-көрө дьиэбэр сытыахпын сөөп,  Аан Дойду, Россия политикатын истэбин, ону булгуччу билиэхпин наада. Уонна, онтон…  ырыам өттүгэр, кырдьык,  үлэлиэхпин наада. Тыаҕа бардахпына, ону сытыытык ис-испиттэн  баҕаран кэлэбин, дурдаҕа олорон, биитэр тыынан устан иһэн, бу ырыабын  ситэриэхпин, дьоҥҥо тиэрдиэхпин наада диэн баҕа санаам күүскэ үүйэ тутар, онтон куоракка кэлэн, күннээҕи түбүккэ сыппаан хаалар  курдук…

-Онон былаанын тугуй?

-Онон былааным, ба5а санаам итиннэ сытар. Мантан сайын онно күүскэ болҕомто ууран улэлиэм этэ.  Соторутааҕыта сана ырыа айбытым, онтукабын ситэрбит  киһи… дьон да хоһоонноругар айыллыбыт ырыалары таһаарыам этэ. Дьиҥэр, ырыа-  мин дьиҥнээх  аналым буоллаҕа. Ырыаҕа өссө да сүрүн тылларбын этэ илкпин, муҥутуур чыпчаалым- иннибэр.

-Аартык ааҕааччыларыгар тугу баҕарыан этэй?

-Олох диэн дохсун сүүрүктээх өрүс. Хаһан да,  ханна да чэпчэки буолбатах этэ.  Былыр- былыргыттан барыта олох туһугар охсуһуу баара. Ол иһин  олохтон хаалсыбакка, сүүрүгү кытта тэҥҥэ барсан, наада буоллагына, утары да устан, бэйэ суолун буларгытыгар баҕарабын. Сахалар  элбиэхтэрин наада дии саныыбын. Арахсымаҥ,  элбэх ыал баар буоллун (олоххо араас буолар). Доруобуйаны көрүнүөххэ наада. Билигин дьон барыта спордунан дьарыктанар, чөл олохтоох,  кэрэ ис-тас туруктаах буоларга дьулуһар. Оннук кэм кэллэ. Ону тутуһан, олоххутун тупсаран иннигит диэки харса суох айаннаан иһин!

-Игорь, дириҥ ис хоһоонноох сэһэргэһиин иһин махтал!

– Эйиэхэ махтал, дьиҥэр,  маннык арыллан, аһаҕастык мээнэ кэпсээччим суох. Өссө да ааҕааччыларгыт элбии турдуннар, ситиһиилэри баҕарабын.

****

Анна Захарова.

Aartyk.ru

 

Обсуждение • 2

Добавить комментарий
  1. Дима Оконешников

    Наьаа учугэй интервью буолбут! Игорь, кытаат!

  2. ситиьиини Игорьга

    Аьа5ас, дирин ис хоьоонноох интервью буолбут.

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»