Эдэр артыыстар бэйэлэрин үрдүк таһымнаах профессионал быһыытынан көрдөрүүлэрэ, өрөспүүбүлүкэбитигэр үрдүк ситиһиини аҕалла, биир дойдулаахтара Пелагея Кычытарованан киэн туттабыт.
Биир дойдулаахпыт Пелагея Кычытарованы куйаар ситимин нөҥүө кэпсэппиппин ааҕааччыларга тиэрдэбин.
Бастаан Гея Кычытарова үөрэнэр кэмигэр миэхэ бастакы интервьютун биэрбитин санаан ылыахха. Гея кыра сааһыгар Кытай Өрөспүүбүлүкэтигэр Пекин куоракка Пекиннээҕи норуоттар икки ардыларынааҕы цирковой искусство кэллиэһигэр Ньурбаттан үөрэнэ барбыта. Ол саҕана Саха сириттэн Чурапчыга, Амгаҕа, Мэҥэ-Хаҥаласка, Намҥа, Уус-Алдаҥҥа, Хаҥаласка, Дьокуускайга уонна Бүлүү бөлөх улуустарыттан Ньурбаҕа преподавателлэр кэлэннэр кытаанах сүүмэрдээһини ыыппыттара.Уһулуччу талааннаах оҕолору түмэн кастины аһарданнар Кытайга үөрэххэ ыыталабыттара. Чурапчыттан төрүттээх Калачев Петр Николаевич салайааччыларынан ананан оҕолору илдьэттии сылдьан үөрэттэрбитэ.
Пекиннээҕи норуоттар икки ардыларынааҕы цирковой колледж үрдүк таһымнаах каадырдары, артыыстары бэлэмнээһиҥҥэ сыаллаах-соруктаах оҕолору үөрэтэр. Элбэх тириэньэрдэр оҕолору эрчийэллэр, үөрэтэллэр. Кытайга үөрэнэ барбыттар үөрэхтэрин ситиһээри биир да сыл төрөөбүт дойдуларыгар барбакка үөрэнэллэр. Кэлин үөрэппит оҕолоро тас дойдуларынан Японияҕа уо.д.а. сирдэринэн сылдьан күн бүгүҥҥэ диэри ситиһиилэри аҕалаллар.
«Азия оҕолоро» спортивнай оонньуулары циркэ артыыстара киэргэтэллэр, акробатическай нүөмэрдэри толорон миэстэлэһэллэр. Пелагея Кычытаровалаах бөлөхтөрө «Каучук» акробатическай нүөмэри толороннор боруонса призёра хаһаайыннара буолбуттара.
Гея Кычытарова 16 сааһыгар норуоттар икки ардыларынааҕы цирковой искусство колледжын 7 сыл үөрэнэн бүтэрэн диплом ылбытын туһунан биһиги хаһыаппыт сырдатан ааспыта.
— Пекиннээҕи норуоттар икки ардыларынааҕы цирковой колледжка Саха сириттэн сүүмэрдээһиҥҥэ биһиги 2-с көлүөнэ буолабыт, 20 оҕо буолан үөрэммиппит. Үөрэхпин бүтэрэн Дьокуускайдааҕы Марфа уонна Сергей Расторгуевтар ааттарынан Государственнай циркэҕэ артыыһынан үлэҕэ киирбитим, акробат-эквилибрист, воздушнай гимнаһынан үлэлиибин. Циркэҕэ 14-с сылбын үлэлиибин.
2021 сыллаахха Пелагея Михайловна Кычытароваҕа циркэҕэ эҥкилэ суох үлэтин иһин, СӨ култууратын туйгуна ааты иҥэрэллэр.
-Пелагея Михайловна, Алматы куоракка фестивалга кыттыбытын туһунан ааҕааччыларга сонуҥҥун үллэһин эрэ.
— Алматы куоракка норуоттар икки ардыларынааҕы «Circus Festival» фестивалга дьүөгэбинээн Анна Максимовалыын воздушнай парнай көлүөһэҕэ дуэт «DIO SELESTIA» нүөмэри толордубут. Биһигини СӨ култууратын туйгуна, циркэ артыыһа, гимнаст Владимир Куприянов эрчийбитэ уонна бэйэбит нүөмэрбитин чочуйан бэлэмнээбиппит. Хас нүөмэр аайы тыҥааһыннаахтык бэлэмнэнэбит, сарсыарда 9 чаастан репетициялар саҕаланаллар, киэһэ хойукка диэри толоруохтаах нүөмэрбитин чочуйабыт.
Дьарыктаныы түгэниттэн
Бу иннинэ ааспыт сылга Казань куоракка ыытыллыбыт «Эхо Азии» фестивалга дьүөгэбинээн Анна Максимовалыын «DUO SELESTIA» воздушнай нүөмэрбитинэн кыттыбыппыт. Манна Вьетнамтан, Башкирияттан, Казахстантан, Узбекистантан, Татарстантан, Бурятияттан, Удмурдияттан уонна Саха сириттэн кыттыбыттара.
-Циркэ артыыһа хас сыл циркэҕэ үлэлиэхтээҕий?
-Циркэҕэ 15 сыл кэнниттэн сынньалаҥҥа (пенсияҕа) тахсыахха сөп.
-Циркэ үлэһиттэрэ толорор нүөмэрдэрэ уустугунан оһоллонуу-дэҥнэнии түбэлтэтэ тахсарынан страховкалааххыт буолуо?
— Аһаа, көрүллэр.
-Элбэх сирдэринэн сылдьааччы артыыстар өйдөөн хаалбыт сирдээхтэр. Эн ханнык дойдуну өйдөөн хаалбыккыный?
-Японияҕа сырыыбыт миэхэ үчүгэй өйдөбүлү хаалларбыта.Бу дойдуну олуһун сөбүлээбитим, олоҕум устата умнубатым буолуо.
-Түмүккэ биир дойдулаахтаргар тугу этиэҥ этэй?
-Биир дойдулаахтарбар туох баар үчүгэйи, эдэр ыччаттарга, биир саастыылаахтарбар туохтан да толлумаҥ, тостумаҥ диэн этиэхпин баҕарабын, туох баар санаабыккыт туоллун.
***
Кэпсэттэ Антонина Семенова
Оставить комментарий