МЭҤЭ ХАҤАЛАС УЛУУҺУГАР КЫАЙЫЫ ЗНАМЯТА КЭЛЛЭ

Атырдьах ыйын 20 күнүгэр Мэҥэ Хаҥалаһы кытта үйэ аҥарыттан ордук доҕордуу сыһыаннаах Алдан оройуонун дэлэгээссийэтэ улуус дьонугар-сэргэтигэр Кыайыы Знамятын  аҕалла. Арассыыйа Бэрэсидьиэнэ Владимир Путин 2020 сылы Өйдөбүнньүк уонна Албан Аат сылынан биллэрбитэ. Оттон өрөспүүбүлүкэҕэ быйыл ыам ыйыттан эһиил ыам ыйыгар диэри Ил Дархан Айсен Николаев Ыйааҕынан ыытыллар Улуу Кыайыы сылын чэрчитинэн улуустарынан ыам ыйын 10 күнүттэн Кыайыы Знамятын эстэпиэтэтэ айанныыр.

Мэҥэ Хаҥаласка Знамяны Алдан оройуонун байыаннай комиссариатын салайааччыта Олег Бабич улуус баһылыгын эбээһинэһин толорооччу Владимир Птицыҥҥа үөрүүлээх быһыыга туттарда.

Үрдүк суолталаах тэрээһиҥҥэ эдэр армеецтар хамсааһын иитиллээччилэрэ кытыннылар. Эдэр көлүөнэҕэ ананар бэлиэ түгэҥҥэ эҕэрдэ тылларын Мэҥэ Хаҥалас уонна Уус Алдан улуустарын байыаннай комиссариатын салайааччы Аял Петров, улуустааҕы бэтэрээннэр сэбиэттэрин бэрэссэдээтэлэ Маргарита Максимова анаатылар.

Улууспутугар Кыайыы Знамятын биир бастакынан Ороссолуода нэһилиэгэр көрүстүлэр. Баһылык Илья Макаровуонна сэрии сылын оҕото, Чурапчы көһүүтүн кыттыылааҕа Анна Афанасьева ыччакка анаан эҕэрдэлэрин тиэртилэр. Бу күн Кыайыы Знамятын Хаптаҕай олохтоохторо эмиэ үөрэ көрүстүлэр. Баһылык Екатерина Гаврильева, сэрии кыттыылааҕа Николай Назаров долгуйан туран олохтоохтору бу дьоһун суолталаах эстэпиэтэ нэһилиэктэригэр кэлбитинэн эҕэрдэлээтилэр. Тэрээһиҥҥэ Социалистическай Үлэ Дьоруойа Екатерина Новгородова, сэбиэскэй-партийнай үлэ бэтэрээнэ Петр Ларионов ыалдьыттаатылар.

Кыайыы Знамята эстэпиэтэ быһыытынан улууспут 31 нэһилиэгэр барытыгар айанныаҕа итиэннэ атырдьах ыйын 30 күнүгэр Амма улууһугар атаарыллыаҕа.

***

Ааптар: Виктория БЕЛОЛЮБСКАЯ