ТҮРГЭННИК СИТЭР САЛААНЫ САЙЫННАРЫЫ – БИЛИҤҤИ КЭМ ИРДЭБИЛЭ

Билигин Россия судаарыстыбатын иннигэр бэйэ бородууксуйатынан хааччыныы стратегическай суолтата өссө үрдээтэ. Ол курдук бэйэ аһылыгынан хааччыныы билиҥҥи кэм ирдэбилэ буолла. Онон тыа сирин хас биирдии ыала сүөһү, сылгы, көтөр, сибиинньэ уонна да атын дьиэ кыылын ииттэн бэйэтин дьиэ кэргэнин олохтоох аһылыгынан хааччынарын таһынан онтон тахсар бородууксуйаны батаран дохуот аахсар кэмэ үүннэ.

Атыннык эттэххэ түргэнник ситэр салааҕа киирэр дьиэ кыылларын иитии программатын сөргүтүү кэмэ уолдьаста. «Туймаада Агрохолдинг» АУо нэһилиэнньэҕэ сибиинньэ оҕотун, кууруссаны атыылаан, ыччат сүөһүнү уотууга туттаран үлэлээбитэ хаһыс да сыла.

Бу ый саҕаланыыта тэрилтэ генеральнай директора Перт Ефремов  түргэнник ситэр салааны сайыннарар үлэ хайысхатын балаһыанньата быһаарыллан  түмүктэммитинэн улуустары кытта үлэни саҕалыырга агрохолдинг тэрилтэлэригэр сорудахтаан турардаах.

      СИБИИННЬЭ ОҔОТУН АТЫЫЛААҺЫН УОННА ИИТИИГЭ БИЭРИИ

Быйылгы балаһыанньа быһыытынан “Хатастааҕы сибиинньэ иитэр комплекс” икки хайысханан, сибиинньэ оҕотун атыылыыр уонна иитиигэ биэрии сөбүлэҥнэрин түһэрсэр:

1.Иитиигэ биэрии сөбүлэҥ быһыытынан:

– 25 киилэҕэ диэри ыйааһыннаах сибиинньэ оҕотун15000 солк. сыаналаан сөбүлэҥ быһыытынан иитиэн баҕалаах дьоҥҥо туттарар. Эбии 120 киилэ комбикорм бэриллэр.

– 26-45 киилэҕэ диэри ыйааһыннаах сибиинньэ оҕотун сыаната 17000 солк. тэҥнэһэр. Манна 80 киилэ комбикорм көрүллэр.                                                  – 46-60 киилэ ыйааһыннаах сибиинньэ оҕото 20000 солк. сыаналаах. Эбии 40 киилэ комбикорм көрүллэр.                                                                                     – 61-70 киилэ ыйааһыннаах сибиинньэ оҕотун 24000 солк. ылыахха сөп. Манна 40 киилэ дьэһимиэн бэриллэр.

Төлөбүрүн күһүн себулэн усулуобуйатынан аахсыахха сөп.

2. Атыыга барар сибиинньэ оҕотун сыаната:

– 13-30 киилэҕэ диэри ыйааһыннаах сибиинньэ оҕотун сыаната киилэтэ 410 солк.                                                                                                                            – 31-60 киилэҕэ диэри ыйааһыннаах сибиинньэ оҕотун сыаната киилэтэ 365 солк.                                                                                                                             – 61 үөһэ ыйааһыннаах сибиинньэ оҕотун сыаната киилэтэ 300 солк.

Манна сөбүлэҥ быһыытынан төлөбүрүн тута төлүүгүт.

Сибиинньэ оҕотун атыыласпыт уонна иитиигэ ылбыт дьон тиэйиитин бэйэлэрэ уйуналлар. Эбэтэр транспортнай ороскуот сорох чааһын ТХМ нөҥүө улуустар уйунуохтарын сөп.

                         КУУРУССА АТЫЫТА

Кууруссаны ииттиэн баҕалаах дьоҥҥо агрохолдинг “Нерюнгритааҕы көтөрү иитэр фабрика”сымыыттыыр кууруссаларын атыытын тэрийэр. Манна усулуобуйа быһыытынан биир куурусса сыанатын 420 солк. быһан илин эҥэр улуустарын кииннэригэр диэри тиэрдэн биэрэллэр. Тиэйии ороскуотун сорох чааһын ТХМ нөҥүө улуустар уйунуохтарын сөп.

                       ЫЧЧАТ СҮӨҺҮНҮ УОТУУ

Биир хайысха ыччат сүөһүнү сөбүлэҥ быһыытынан уотууга туттарыы 2021 сыллаахха бигэргэммит усулуобуйа балаһыанньатынан ыытыллар. Ыччат сүөһүнү уотууга тутуон баҕалаах дьон Хаҥаласка “Бөртө сылгы собуота” ХЭТ, Дьокуускайга “Туймаада Экоферма” ХЭТ, Өлүөхүмэҕэ “Кладовая Олекмы” ХЭТ, Тааттаҕа “Победа” ХЭТ уонна Мииринэй оройуонугар “Новай сопхуос” салалталарын кытта быһа кэпсэтэн сөбүлэҥ түһэрсиэххитин сөп.

***
Прокопий ХАБАРОВ