Станислав Семенов: Бэйэ оҥорон таһаарар хаачыстыбалаах аһынан-үөлүнэн нэһилиэнньэни хааччыйыахтаахпыт

Бүгүн Дьокуускай куоракка бааһынай уонна тыа хаһаайыстыбатын кэпэрэтииптэрин ассоциациятын быыбардыыр-отчуоттуур мунньаҕа ыытылынна.

Манна биһиги улууспутуттан 3 аграрий кытынна: “Кириэстээх” тыа хаһаайыстыбатын дириэктэрэ Владимир Егоров, “Забота” ТХПКК бэрэссэдээтэлэ Римма Семенова уонна бааһынай хаһаайыстыба салайааччыта Станислав Семенов. Станислав Семенов 2015 сылтан бааһынай хаһаайыстыба тэринэн, хортуоппуй үүннэриитинэн дьарыктанар.

Кини бүгүҥҥү мунньахтан санаатын бу курдук үллэстэр:

-Тыа хаһаайыстыбатынан дьарыктанар тэрилтэлэр ассоциацияларын мунньаҕар сүрүннээн олохтоох бородууксуйаны дэлэтиигэ улахан кэпсэтии барда. Сири оҥорон, араас оҕуруот аһын олордон нэһилиэнньэни бэйэбит аспытынан хааччыйар билиҥҥи сүрүн сорукпут буолар.

Дьиэ кэргэн хаһаайыстыбата үлэни кыайа тутар. Онон маннык хаһаайыстыбалар күүскэ сайдыахтарын наада диэн эттилэр. Оҕолору, эдэрдэри сири кытта үлэҕэ үөрэтиҥ, бэйэ бородууксуйата элбээн онтон аһыыр-таҥнар бириэмэтин өйдөтүҥ диэн сүбэ биэрдилэр.

Билиҥҥи балаһыанньаҕа, араас санкциялар биһиги дойдубутугар биллэриллэ турар кэмнэригэр олохтоох аһы-үөлү күүскэ дэлэтэрбит наада. Бэйэ оҥорон таһаарбыт хаачыстыбалаах аһынан-үөлүнэн нэһилиэнньэбитин хааччыйыахтаахпыт.

Мунньахха аграрийдар бу салаа сайдыытыгар элбэхтик санааларын этиннилэр. Бэйэлэрин былааннарын кытары билиһиннэрдилэр, уопут атастаһыытын да курдук барда. Онон бүгүҥҥү сорукпут – бэйэ олохтоох бородууксуйатын дэлэтии буолар.
Мунньах түмүгэр быыбардааммыт салайааччыбытынан иккистээн Александр
Еремеевич Артемьевы 100 бырыһыан куоластаан таллыбыт.

***

Пресс-служба Администрации МР «Сунтарский улус (район)»