НЬУРБА КҮНДЭЭДЭТИГЭР САҤА ТААС ОҔО УҺУЙААНА ТУТУЛУННА

Ньурба улууһун Күндээдэ нэһилиэгэр муниципальнай-чааһынай бииргэ үлэлээһин чэрчитинэн былырыын саас «Региональнай сайдыы» ХЭТ 50 миэстэлээх уһуйаан дьиэтин сыбаайатын түһэрбитэ. Онтон үлэтин саҕалаан, тупсаҕай көрүҥнээх улахан дьыссаат дьиэтин тутан дьэндьэтэн таһаарда.

СӨ Бырабыыталыстыбатын Бэрэссэдээтэлин 1-кы солбуйааччыта Алексей Стручков уонна Бырабыыталыстыба чилиэннэрэ Ньурбаҕа кэлэ сылдьан манна таарыйан, уһуйаан дьиэтин биһирии көрдүлэр.

«Региональнай сайдыы» ХЭТ Ньурбатааҕы тэрилтэтин салайааччыта Альберт Васильев иһитиннэрэринэн, дьыссаат 1000 кв. м. иэннээх. Барытын тэрилтэ бэйэтин харчытынан туппуттар. Дуогабарынан 2020 сылга диэри бүтэриэхтээхтэрин, үлэлэрин эрдэлээн бүтэрдилэр.

Иккиһин эргиллэн үлэлээбэт курдук, дьыссаат таһынааҕы тупсаран оҥоруутун үлэлэрин эмиэ толордулар. Улуус хамыыһыйата тахсан дьиэни көрөн туппут. Саҥа уһуйааҥҥа миэбэлэ уонна тэрилэ атыылаһылыннаҕына үөрүүлээхтик аһыллыаҕа.

***

Ааптар: Геннадий Антонов