Мэҥэ Хаҥаластан 10 ыал дьиэ атыылаһарыгар сэртипикээттэннэ

Мэҥэ Хаҥалас улууһугар элбэх оҕолоох 10 ыал дьиэ атыылаһарыгар сэртипикээккэ тигистэ.  5 уонна онтон элбэх оҕолоох ыал дьиэлэнэригэр-уоттанарыгар биир кэмнээх социальнай төлөбүрү оҥоруу бырагырааматыгар улахан болҕомто ууруллар.

Мэҥэ Хаҥалас улууһугар бу бырагырааманан 2019 сылга 10 элбэх оҕолоох ыал хабыста.  Соторутааҕыта улуустааҕы нэһилиэнньэ социальнай харысхаллаах буолуутун управлениетыгар бырагыраамаҕа хапсыбыт ыалларга сэртипикээттэри туттарыы үөрүүлээх түгэнэ буолбута. Павловскайтан Надежда Павлова, Балыктаахтан Лилия Мохначевская, Хочоттон Николай Никаноров, Бүтэйдээхтэн Елизавета Кузьмина, Майаттан Аксинья Осиповаитиэннэ Төҥүлүттэн Вера Гаврильева, Екатерина Харитонова, Марианна Цыпандина, Марианна Шарина уонна Оксана Шкулева сэртипикээккэ тигистилэр.

Хас биирдии төрөппүт оҕотун сөптөөх усулуобуйаҕа улаатыннаран, киһи хара оҥорон, иитэн, үөрэттэрэн, туһалаах киһи оҥорор ыра санаалаах.

Төҥүлү олохтоохторо Вера Гаврильева уонна Екатерина Харитонова иккиэн билигин огдообо хаалбыттар. Дьиэ кэргэҥҥэ дурда-хахха, өйөбүл буолар, иитэр-аһатар эрдэрэ Күн сириттэн соһуччу күрэммиттэрэ аҕыйах сыл буолбут. Онон бу бырагырааманан өйөбүл оҥоһуллуута кинилэр курдук дьиэ кэргэннэргэ олус наадалааҕа өйдөнөр. Гаврильевтар уонна Харитоновтар   2012 сыллаахха сэртипикээккэ уочаракка турбуттар. Сэттэ сылынан баҕа санаалара туолан, бэйэлэрэ этэллэринэн, дьолго тиксэннэр сүргэлэрэ көтөҕүллүбүт.

‒ Биһиги 7 оҕолоохпут. Улахаммыт 22 саастаах, кырабыт оҕо саадыгар сылдьар. Үс улаханнарым ‒ устудьуоннар. Онон кинилэр Дьокуускайга олорон үөрэнэллэригэр, инникитин үлэлииллэригэр анаан тиксибит сэртипикээппинэн 2 хостоох кыбартыыра ылаары докумуонун эккирэтиһэ сылдьабын. Сэртипикээппит суумата 3,5 мөлүйүөн солкуобай  этэ. Онуоха мин Ийэ хапытаалын эбэммин, 3 мөлүйүөн 900 тыһыынча солкуобайдаах кыбартыыраны ылыахтаахпыт. Олус үөрдүбүт-көттүбүт, судаарыстыбабыт биһигини өйөөн күүс-көмө буоларыгар махтанабыт, ‒ диир Вера Николаевна.

‒ Биэс оҕолоохпут. 2012 сыллаахха кэргэним бэйэтэ эккирэтиһэн докумуону туттарбыта. Улахаммыт бу күһүн 23 сааһын туолар, кырабыт 11-дээх. Көрүллүбүт үбүнэн Дьокуускай куоракка саҥа тутулла турар дьиэттэн кыбартыыра ыллыбыт. Үлэҕэ эһиилги сылга киирэрэ былааннанар. Үрдүкү салалтабытыгар үрдүк махталбытын тиэрдэбит, биһиги дьиэ кэргэҥҥэ олус улахан көмө буолла, ‒ диэн Екатерина Пахомовна ис сүрэҕиттэн махтанар.

Судаарыстыба өттүттэн элбэх оҕолоохтору өйүүр бырагыраама баара хайҕаллаах. Элбэх оҕолоох дьиэ кэргэни өйүүр үлэ-хамнас  дойдубут инники кэскилэ туруктаах буоларыгар  тирэх буолара саарбаҕа суох.

***

Ааптар: Виктория БЕЛОЛЮБСКАЯ